Category

Fréttir

LAUS STAÐA Í DÓMNEFND

By | Fréttir | No Comments

LAUS STAÐA Í DÓMNEFND ÍSLENSKU TÓNLISTARVERÐLAUNANNA

Stjórn SAMTÓNs sem er bakhjarl Íslensku tónlistarverðlaunanna ( ÍSTÓN ) hefur ákveðið að gefa félagsmönnum aðildarfélaga SAMTÓNs kost á að bjóða sig fram til starfa sem fulltrúar í dómnefnd í flokknum sígild- og samtímatónlist vegna tónlistarársins 2019.

Æskilegt er að þeir einstaklingar sem sitja í dómnefndum hafi umtalsverða þekkingu á viðkomandi sviði og þeir komi að hluta til úr röðum höfunda, flytjenda og/eða framleiðenda eða hafi fjallað um tónlist í fjölmiðlum.

Við skipun dómnefnda skal eins og unnt er taka tillit til aldursdreifingar og jafnrar stöðu karla og kvenna. Enginn einstaklingur í dómnefnd má vera viðriðinn útgáfu nokkurra þeirra hjóðrita sem tilnefnd verða fyrir árið 2019.

Stjórn SAMTÓNs mun fara yfir umsóknir og velja síðan 3 til 4 nýja fulltrúa í dómnefndina. Þeir sem hafa hug á því að senda inn umsókn er vinsamlega bent á að fara inn á slóð þá sem tilgreind er hér á eftir og að fylla út umsóknareyðublaðið og senda á

http://goo.gl/forms/U7qYCS4s9d

Umsóknarfrestur er til 1. apríl.

INGA ELÍN design gerir verðlaunagrip Íslensku tónlistarverðlaunanna.

Tilnefningar ásamt rökstuðningi dómnefnda

By | Fréttir | No Comments

Tilnefningar til Íslensku tónlistarverðlaunanna 2018 voru kynntar 20. febrúar að viðstöddu fjölmenni á Bryggjunni brugghúsi.

 

Hér að neðan er að finna lista yfir tilnefningar til Íslensku tónlistarverðlaunanna 2018 ásamt rökstuðningi dómnefnda úr öllum flokkum.

DJASS OG BLÚS – TILNEFNINGAR

PLATA ÁRSINS

Karl Olgeirsson – Mitt bláa hjarta
Mitt bláa hjarta inniheldur fjórtán nýja djasssöngva. Bæði tónsmíðar og textar eru grípandi með hnyttnum skírskotunum í íslenskan veruleika. Fjöldi söngvara og hljóðfæraleikara kemur fram á plötunni og er hún kærkomin viðbót í flóru íslenskra djasssöngva.

DÓH Tríó – DÓH
Hér er sköpunarkrafturinn við völd og DÓH tríói halda engin bönd á fyrstu plötu sinni.
Spilagleðin er taumlaus og víðáttan útgangspunktur í tónsmíðum hljómsveitarinnar.

Sunna Gunnlaugs – Ancestry
Platan Ancestry leiðir hlustandann inn í heim þar sem lag og ljóð rennur saman í eitt. Tríó Sunnu Gunnlaugs leikur ásamt finnska trompetleikaranum Verneri Pohjola en aðrir meðlimir tríósins eru þeir Þorgrímur Jónsson kontrabassaleikari og Scott McLemore trommari.

Agnar Már – Hending
Hugljúf plata þar sem tónsmíðarnar fá að njóta sín í einfaldleika dúettformsins. Hljóðfæraleikur þeirra Agnars og gítarleikarans Lage Lund er listilega vel samofinn þar sem fjölmörgum stílbrögðum er teflt saman.

Scott McLemore – The Multiverse
Diskurinn The Multiverse ber nafn sitt með rentu. Tónsmíðarnar streyma hver á eftir annarri þar sem hljóðfæraleikurinn einkennist af spilagleði og áreynslulausri för út í hið óþekkta.

TÓNVERK ÁRSINS

Mitt bláa hjarta
Tónskáld: Karl Olgeirsson
Textahöfundur: Karl Olgeirsson
Ballaða sem dansar á mörkum djass og hefðbundins sönglags. Kallast á við íslensk kórlög frá miðri síðustu öld og fjallar um þau óljósu mörk náttúru og mannlegra tilfinninga.

Norðurljós
Tónskáld: Sigmar Þór Matthíasson
Upphafs- og titillag heilsteyptrar og spennandi frumraunar Sigmars Þórs Matthíassonar. Verkið Norðurljós er eins og frumgerðin, bæði litríkt og á stöðugri hreyfingu.

Ancestry
Tónskáld: Sunna Gunnlaugs
Verkið dregur innblástur frá norrænum hefðum með sínum fimmundum í bassa en laglínan kallar fram aðra hljóma sem um leið opnar fyrir frjálst hugarflug. Tónverkið byrjar mjög lágstemmt en nær hámarki í lokin.

To Catch a Glimpse
Tónskáld: Scott McLemore
Tónsmíðin er full af krafti en á sama tíma íhugul. Þannig mætast andstæður og fortíðarinnar er minnst á meðan horft er til framtíðar.

Bugða
Tónskáld: Agnar Már Magnússon
Hér hlykkjast raddir píanós og gítars hverjar um aðra í fallegu og áhugaverðu samtali sem unun er að hlýða á. Þægilegt lag í anda þeirra tónsmíða sem Agnar Már er þekktur fyrir.

 LAGAHÖFUNDUR ÁRSINS – DJASS OG BLÚS

Karl Olgeirsson
Karl Olgeirsson skilar af sér 14 nýjum djasssöngvum á hljóðriti og á nótum á árinu 2018. Verkin eru fjölbreytt og aðgengileg án þess að gefa nokkurn afslátt af fagurfræði eða innihaldi. Fersk vindhviða inn í tónlistarlífið.

 Sunna Gunnlaugs
Sunna Gunnlaugsdóttir er þjóðinni þekkt sem einstaklega ötull og áhugaverður djasshöfundur. Af plötunni Ancestry ber hæst að nefna samnefnt lag en aukinheldur hefur Sunna samið bæði fyrir kvikmynd og sjónvarp.

Scott McLemore
Auk þess að senda frá sér eina af betri djassplötum ársins, The Multiverse, á Scott McLemore tvö firnasterk lög á plötu Sunnu Gunnlaugsdóttur, Ancestry, sem einnig kom út á árinu.

Agnar Már Magnússon
Á haustmánuðum kom út platan Hending sem Agnar Már Magnússon vann í samstarfi við norska gítarleikarann Lage Lund. Á henni sýnir Agnar enn á ný hversu næmur og hæfileikaríkur lagahöfundur hann er.

 Sigmar Þór Matthíasson
Sigmar Þór Matthíasson sýnir á sinni fyrstu sólóplötu ákaflega fjölbreytta og skemmtilega takta sem gefa bæði fögur fyrirheit og staðsetja hann jafnframt í fremstu röð djasstónskálda.

TÓNLISTARFLYTJANDI ÁRSINS – EINSTAKLINGUR

Kjartan Valdimarsson
Kjartan Valdemarsson er einn virkasti og ástsælasti tónlistarmaður þjóðarinnar og hefur verið um árabil. Hann hefur leikið inn á fjöldann allan af hljómplötum, á tónleikum og unnið mikið í leikhúsi, útvarpi og sjónvarpi – ýmist sem tónskáld, útsetjari eða hljóðfæraleikari.

Sunna Gunnlaugs
Sunna er þekkt sem sérlega ötull og afkastamikill djasspíanóleikari og tónlistarkona. Síðasta ár er þar ekki undanskilið. Auk þess að senda frá sér eina af betri djassplötum síðasta árs Ancestry, hefur hún komið fram á fjölda tónleika bæði innanlands sem utan.

Magnús Trygvason Eliassen
Magnús Trygvason Eliassen er að öðrum ólöstuðum, einn eftirsóttasti trommuleikari Íslands. Meðal hljómsveita sem Magnús leikur með má nefna, adhd, Moses Hightower, amiinu og Snorra Helgasyni ásamt mörgum öðrum hljómsveitum í íslenskum djassi, tilraunatónlist og poppi.

Jóel Pálsson
Jóel Pálsson hefur verið atkvæðamikill í íslensku djasslífi undanfarin 25 ár. Jóel gaf út sína sjöundu hljómplötu með frumsömdu efni, Dagar koma, á árinu 2018. Hann er meðlimur í Stórsveit Reykjavíkur, hljómsveitinni Annes, Arnold Ludvig sextet og SJS BigBand. Þess utan leikur Jóel reglulega með ýmsum listamönnum, má þar nefna á hljómplötum Karls Olgeirssonar og Sigmars Þórs sem komu út 2018.

Daníel Helgason
Daníel Helgason er einstaklega fjölhæfur gítarleikari og kemur víða við starfi sínu sem flytjandi lifandi tónlistar og í hljóðverum landsins. Hann er einn fárra íslenskra gítarleikara sem hefur tileinkað sér kúbanska tresgítarinn og kafað í stílbrögð tónlistar Suður-Ameríku. Ásamt flytjandastarfinu er Daníel afkastamikið tónskáld og meðlimur tríósins DÓH.

 TÓNLISTARFLYTJANDI ÁRSINS – HÓPAR

 Stórsveit Reykjavíkur
Starfsemi Stórsveitar Reykjavíkur var með blómlegasta móti á síðasta ári. Hljómsveitin hélt marga fjölbreytta og metnaðarfulla tónleika þar sem lögð var áhersla á nýja tónlist, bæði innlenda sem erlenda. Stórsveitin stóð að nýárssveiflutónleikum í Eldborg ásamt gestasöngvurum, jólatónleikum fyrir fjölskylduna með Góa auk þess að tengjast skólastórsveitum og stórsveitum áhugamanna á stórsveitadaginn. Allir tónleikarnir fóru fram í tónlistarhúsinu Hörpu og voru vel sóttir.

DÓH – Tríó
DÓH-tríó eru Daníel Helgason (gítar og rafbassi), Óskar Kjartansson (trommur) og Helgi Rúnar Heiðarsson (saxafónn). DÓH-tríóið var stofnað árið 2013 og hafa þeir félagar leikið víða, m.a. á Jazzhátíð Reykjavíkur. Tríóið leikur frumsamda tónlist.

Ingi Bjarni Trio
Tríó Inga Bjarna inniheldur þrjá virka tónlistarmenn frá Íslandi og Færeyjum, þá Inga Bjarna Skúlason á píanó og Magnús Trygvason Eliassen trommara (ADHD, amiina) frá Íslandi og Bárð Reinert Poulsen (The Fjords, Espen Berg Trio) frá Færeyjum á bassa. Tríóið hefur spilað á tónlistarhátíðum eins og Young Nordic Jazz Comets, Copenhagen Jazz Festival, Reykjavík Jazz Festival, Iceland Airwaves og fleiri.

TÓNLISTARVIÐBURÐUR ÁRSINS

Blúshátíð í Reykjavík
Blúshátíð í Reykjavík 2018 var sett með blússkrúðgöngu frá Leifsstyttu og niður Skólavörðustíginn, laugardaginn 24. mars. Á Blúshátíð í Reykjavík 2018 voru þrennir stórtónleikar á Hilton Reykjavík Nordica í dymbilviku.

Tónleikaraðir Jazzklúbbsins Múlans
Tuttugasta og fyrsta starfsár Múlans árið 2018 var að vanda metnaðarfullt og sýndi gott þversnið af því sem er að gerast í íslensku djasssenunni. Fjöldi tónleika voru 43 og fram komu margir af fremstu tónlistarmönnum og -konum landsins ásamt nokkrum vel völdum erlendum gestum.

Tónleikaröð Stórsveitar Reykjavíkur
Fjölbreytt og metnaðarfull tónleikaröð í tónlistarhúsinu Hörpu þar sem lögð var áhersla á nýja tónlist, bæði innlenda og erlenda, sögulega mikilvæga tónlist frá ýmsum tímum og tónlist fyrir börn, auk tengingar við skólastórsveitir og stórsveitir áhugamanna.

Jazzhátíð Reykjavíkur
Jazzhátíð 2018 fór fram dagana 5.-9. september 2018. Á hátíðinni kom fram fjöldi innlendra og erlendra listamanna á samtals 20 viðburðum. Það er í takt við virka jafnréttisstefnu Jazzhátíðar Reykjavíkur að konur komu að mörgum þessara 20 viðburða og voru 7 viðburðir leiddir af konum en það hlutfall hefur farið vaxandi undanfarin ár. Samstarf innlendra og erlendra listamanna var í brennidepli í ár sem og útgáfa á nýju efni.

Freyjujazz
Tónleikaröðin Freyjujazz fór fram í Listasafni Íslands með tónleikum annars vegar í júlí og ágúst og hins vegar í október og nóvember, auk einna stakra tónleika í desember. Alls 13 tónleikar á árinu. Markmið Freyjujazz er að gera konur sýnilegri í djassi auk þess að skapa vettvang fyrir djasskonur að koma fram og þannig ýta undir aukin samstarfs kynjanna.

 

SÍGILD- OG SAMTÍMATÓNLIST – TILNEFNINGAR

PLATA ÁRSINS

Anna Þorvaldsdóttir – AEQUA
Afar vönduð útgáfa. Gefur heildstæða mynd af kammerverkum Önnu Þorvaldsdóttur og afburða hljóðfæraleikur sendir áheyrandann í ferðalag um hinn einstaka hljóðheim Önnu. Verkin hafa hvert og eitt sína dáleiðandi útgeislun en saman á plötu virka þau eins og heilt sólkerfi! Unun á að hlýða.

Jóhann Jóhannsson – Englabörn & Variations
Tónlist Jóhanns Jóhannssonar við leikritið Englabörn eftir Hávar Sigurjónsson hefur fyrir löngu unnið sér mikilvægan sess. Á nýútgefinni plötu, Englabörn & Variations, votta vinir og samstarfsmenn Jóhanni virðingu sína með því að fullgera verkið Englabörn & Variations, en Jóhann vann að endurútgáfu verksins þegar að hann féll sviplega frá á liðnu ári. Útkoman er sérlega fallegur diskur þar sem frábærum tónsmíðum Jóhanns eru gerð skil af sjaldgæfu innsæi og næmni. Fágætur diskur og verðmætur.

 Þráinn Hjálmarsson – Influence of buildings on musical tone
Hér gefur að heyra fimm kammerverk eftir Þráin Hjálmarsson tónskáld sem samin eru fyrir flytjendur í fremstu röð: CAPUT, Ensemble Adapter, Íslenska flautukórinn, Nordic Affect og Kristínu Þóru Haraldsdóttur. Ótrúlega heildstæð og mögnuð plata sem vex við hverja hlustun.

Víkingur Heiðar Ólafsson – Johann Sebastian Bach
Hljómborðstónlist eftir Johann Sebastian Bach er viðfangsefnið á nýjustu plötu Víkings Heiðars Ólafssonar. Óhætt er að fullyrða að Víkingur geri tónlist þessa mikla meistara barokksins hreint frábær skil og viðtökur á heimsvísu eftir því. Stórkostleg plata í alla staði.

Erla Dóra Vogler og Eva Þyri Hilmarsdóttir – Jórunn Viðar – Söngvar
Erla Dóra Vogler og Eva Þyri Hilmarsdóttir færa hlustendum höfundarverk Jórunnar Viðar á einkar fallegum diski sem inniheldur, auk þess fjársjóðar sönglaga sem þekktur er, tónsmíðar eftir Jórunni sem heyrast nú í fyrsta sinn. Samspil þeirra er einstakt og túlkunin innblásin.

Nordic Affect – He(a)r
Platan He(a)r er enn ein rósin í hnappagat tónlistarhópsins Nordic Affect en platan hefur að geyma sjö splunkuný verk eftir Maríu Huld Markan Sigfúsdóttur, Önnu Þorvaldsdóttur, Mirjam Tally, Hildi Guðnadóttur og Höllu Steinunni Stefánsdóttur. Verkin eru öll samin sérstaklega fyrir tilstilli Nordic Affect og eru flutt af einstakri innlifun og næmi. Frábær plata.

TÓNVERK ÁRSINS

Farvegur – Þuríður Jónsdóttir
Farvegur var frumfluttur á tónlistarhátíð Rásar 1 í nóvember 2018 en verkið var pantað af Rás 1. Í verkinu fléttast saman fiðlu- og náttúruhljóð; fiðluleikurinn var í höndum Unu Sveinbjarnardóttur sem gerði verkinu einstök skil. Djúp og ágeng náttúruhljóð voru frábærlega útfærð – flutningur verksins og upplifun af því afar eftirminnileg.

From My Green Karlstad – Finnur Karlsson
Sérlega eftirtektarvert og innblásið tónverk. Finnur Karlsson er án nokkurs vafa eitt af eftirtekarverðari tónskáldum yngri kynslóðarinnar.

Loom – María Huld Markan Sigfúsdóttir
Loom býr yfir dáleiðandi og tímalausri fegurð. Hljóðheimurinn forn og nýr í bland, undiraldan þung og heillandi. Loom hljómaði í fyrsta sinn á Reykjavík Festival í Los Angeles í apríl árið 2017 en hérlendis hljómaði það í fyrsta sinn á á Myrkum músíkdögum í upphafi ársins 2018. Verkið er frábærlega túlkað af Nordic Affect á nýjustu plötu hópsins.

METACOSMOS – Anna Þorvaldsdóttir
Margslungið verk og mikilvæg varða á ferli eins af okkar helstu tónskálda. Ævintýralega magnað og dáleiðandi ferðalag inn í andstæður ógnar, átaka og fegurðar.

Silfurfljót – Áskell Másson
Í Silfurfjlóti, konsert fyrir klarínettu og hljómsveit, fer fram ljóðrænt samtal milli einleikara og hljómsveitar sem einkennist af birtu og tærleika. Framvinda verksins færir hlustendum seiðandi laglínur jafnt sem stórbrotnar myndir í tónmáli hljómsveitarinnar.

Spectra – Anna Þorvaldsdóttir
Flæðandi tónmál – hljóðheimur og línur sem ásækja mann löngu eftir að hlustun er lokið. Seiðandi en jafnframt ögrandi tónvefur.

Split thee, Soul, to Splendid Bits (attn.: no eternal life/light this time around) – Bára Gísladóttir
Sterk rödd höfundar skín í gegnum verk Báru, hvort heldur sem um er að ræða umfangsmikil verk eða smærri. Í Split thee, Soul, to Splendid Bits nýtir Bára sér hljóðheim barokks á nýstárlegan hátt í afar heillandi tónverki.

TÓNLISTARVIÐBURÐUR ÁRSINS – TÓNLEIKAR 

Budapest Festival Orchestra og Iván Fischer – Tónleikar í Eldborg, Hörpu
Það er sannkallaður stórviðburður þegar hingað til lands rekur á fjörur ein af allra bestu sinfóníuhljómsveitum heims. Því var eftirvæntingin mikil fyrir komu Budapest Festival Orchestra ásamt aðalstjórnanda þeirra Iván Fisher. Hljómsveitin ungverska stóð undir öllum þeim væntingum sem til hennar voru gerðar og gott betur því stórkostlegir tónleikar hennar munu seint líða úr minni þeirra sem á hlýddu.

#bergmálsklefinn
Með athyglisverðari óperusýningum seinni ára. Hrá en úthugsuð sýning sem á beint erindi við samtímann og brýtur blað í sýningargerð í óperuuppfærslum á Íslandi.

Brothers – Íslenska óperan
Stórfengleg uppfærsla á magnþrunginni óperu, skipuð frábærum listamönnum í hverju hlutverki, bæði innan sviðs og utan. Einsöngvarar ásamt og kór Íslensku óperunnar og Sinfóníuhljómsveit Íslands undir stjórn tónskáldsins Daníels Bjarnasonar sköpuðu eina eftirminnilegustu óperusýningu sem sett hefur verið upp hér á landi.

Víkingur Heiðar Ólafsson – útgáfutónleikar, Bach
Til að fagna útgáfu nýjustu plötu sinnar, fyrir hið virta útgáfufyrirtæki Deutsche Grammophon, blés Víkingur Heiðar til tónleika í Eldborgarsal Hörpu. Víkingur bauð upp á Bach og Beethoven og túlkaði og kynnti tónlistina af slíku listfengi að lengi verður í minnum haft. Frábærir tónleikar.

Barokkbandið Brák – Spíralar Versala
Barokkhópurinn Brák bauð upp í dans á tónleikum sínum, Spíralar Versala, þar sem endurvakin var sú stemmning sem ríkti í höllum Sólkonungsins. Tónlist, dans, glaumur og gleði myndaði órofa heild sem einkenndi barokktónlist Frakka. Á þessum tónleikum Barokkbandsins Brákar sameinuðust fyrrnefndir þættir í sterkri listrænnni útkomu sem veitti unnendum barokktónlistar fágæta innsýn inn í þetta skemmtilega tímabil tónlistarsögunnar.

Edda II: Líf guðanna – 23. mars / Sinfóníuhljómsveit Íslands og Schola Cantorum
Hið tímabæra verkefni, Edda II: Líf guðanna, braut blað í tónleikasögu Íslands. Mögnuð frammistaða kórs, hljómsveitar einsöngvara birti hugarheim tónskáldsins Jóns Leifs og sýn hans á arfinn sem liggur í Eddukvæðunum á áhrifamikinn og stórbrotinn hátt.

Íslendingasögur – Sinfónísk sagnaskemmtun – hátíðarviðburður fullveldisafmælisins 1. desember
Íslendingasögur – sinfónísk sagnaskemmtun, fór ótroðnar slóðir í efnistökum jafnt sem fagurfræðilegri umgjörð. Óvænt, glettið og tilfinningaþrungið sjónarspil sem veitti yfirgripsmikla mynd af okkar sameiginlega menningararfi, hið stóra jafnt sem smáa, það nýja og hið fornkveðna. Með frásagnarlegum þræði sem teygði sig gegnum aldirnar til nútímans var birt krafa um skýra og bjarta framtíðarsýn til handa landi og þjóð.

TÓNLISTARFLYTJANDI ÁRSINS – EINSTAKLINGAR

Sæunn Þorsteinsdóttir
Sæunn Þorsteinsdóttir er einn fremsti hljóðfæraleikari landsins. Hún býr yfir framúrskarandi tækni og ýtir stöðugt á mörk hins mögulega. Árið 2018 kom hún m.a. fram sem einleikari með Sinfóníuhljómsveit Íslands þegar hún frumflutti á Íslandi sellókonsertinn Quake eftir Pál Ragnar Pálsson og lék Bow to String eftir Daníel Bjarnason auk þess sem hún frumflutti sellókonsertinn Wanderlied eftir Betsy Jolan í Bandaríkjunum. Sæunn kom auk þess fram á fjölmörgum tónleikum, m.a. með strengjakvartettinum Decode, beggja vegna Atlantsála.

Una Sveinbjarnardóttir
Una Sveinbjarnardóttir er einstaklega næmur, fjölhæfur og metnaðarfullur listamaður, hvort sem er í starfi sínu í Sinfóníuhljómsveit Íslands, Strokkvartettnum Sigga eða margvíslegum einleiksverkefnum. Á árinu frumflutti hún m.a. ný tónverk eftir Þuríði Jónsdóttur, Veronique Vöku, Oliver Kentish og Hauk Þór Harðarson.

Víkingur Heiðar Ólafsson
Víkingur Heiðar hefur fyrir löngu skipað sér í sess meðal allra fremstu listamanna þjóðarinnar. Á liðnu ári hélt hann frábæra útgáfutónleika til þess að fagna útgáfu nýs geisladisks með tónlist Johann Sebastians Bach auk þess sem hann frumflutti nýjan píanókonsert Hauks Tómassonar.

TÓNLISTARFLYTJANDI ÁRSINS – HÓPAR

Barokkbandið Brák
Barokkbandið Brák hefur á undanförnum árum vakið verðskuldaða athygli fyrir frábæran flutning og frumlega nálgun á tónlist barokktímabilsins. Það er ávallt sterk upplifun að sjá og heyra þennan úrvals tónlistarhóp sem hefur á skömmum tíma skipað sér í flokk eftirtektarverðustu kammerhópa landsins.

Kammersveitin Elja
Kammersveitin Elja er skipuð ungum tónlistarmönnum í fremstu röð og hefur á sínum stutta starfsaldri vakið eftirtekt fyrir sérlega vönduð vinnubrögð og einstaklega ferskt og skemmtilegt verkefnaval þar sem blandað er saman gömlu og nýju, klassík og framúrstefnu á sannfærandi og næman hátt. Fyrsta flokks flutningur!

Schola Cantorum
Á árinu 2018 bar hæst þátttaka Schola Cantorum í Eddu II; Lífi guðanna eftir Jón Leifs ásamt Sinfóníuhljómsveit Íslands og einsöngvurum. Kórparturinn í því verki hefur löngum verið talinn á mörkum hins syngjanlega og vann kórinn sannkallað þrekvirki með söng sínum. Fjölbreytt verkefnaval var á hádegistónleikum og auk tónleika á allraheilagramessu má benda á lykilhlutverk kórsins í hátíðardagskrá í tilefni af aldarafmæli fullveldis Íslands.

Nordic Affect
Afar afkastamikið ár Nordic Affect einkenndist af fjölbreyttum verkefnum með frábæru samspili og einstaklega næmri listrænni stjórnun – allt með gæði og nýsköpun í fyrirrúmi. Hvert verkefni var afar vel afmarkað og bauð áheyrendum sífellt upp á ný sjónarhorn á starf hópsins og tónlistarflutning, ásamt því að beina kastljósinu að tónskáldunum sem hópurinn vinnur með.

Strokkvartettinn Siggi
Strokkvartettinn Siggi hefur frá upphafi verið í fremstu röð kammerhópa og unnið ötullega að nýsköpun í tónlistarlífi hér á landi. Tónleikar þeirra á Listahátíð í Reykjavík, þar sem verk eftir íslensk tónskáld voru leikin á hljóðfæri sem öll eru smíðuð af Jóni Marínó Jónssyni, voru afar eftirminnilegir og ekki síður tónleikar þeirra í Hörpu í október síðastliðnum. Fagmennska í hvívetna og heillandi samspil.

SÖNGVARI ÁRSINS 

Benedikt Kristjánsson tenór
Benedikt Kristjánsson söng hlutverk Guðspjallamannsins í Jólaóratoríu Bachs með Dómkórnum undir stjórn Kára Þormar af fádæma listfengi sem einkenndist af næmri túlkun á tónlæsi auk þess sem björt tenórrödd hans naut sín í aríum verksins svo unun var á að hlýða.

Eyjólfur Eyjólfsson
Tenórsöngvarinn Eyjólfur Eyjólfsson kom, sá og sigraði í hlutverki Loka Laufeyjarsonar í uppfærslu á Þrymskviðu sem haldin var í tilefni af níræðisafmæli tónskáldsins Jóns Ásgeirssonar.

Oddur Arnþór Jónsson
Það er ekki heiglum hent að taka að sér burðarhlutverk í nýrri óperu með afar skömmum fyrirvara. Slíkt gerði baritónsöngvarinn Oddur Arnþór Jónsson í óperunni Brothers eftir Daníel Bjarnason þar sem hann túlkaði hlutverk Michael stórkostlega í eftirminnilegri uppfærslu, bæði hvað varðar leik og söng.

SÖNGKONA ÁRSINS

Hallveig Rúnarsdóttir
Hallveig Rúnarsdóttir blómstraði í verkefnum sínum á liðnu ári. Hún á jafnt heima í barokktónlist, klassík, ljóðasöng og samtímatónlist og hefur einstakt lag á að snerta hjörtu áheyrenda. Hún heillaði áhorfendur meðal annars með söng sínum í Klassíkin okkar og skemmti ungum sem öldnum í titilhlutverkinu í frumflutningi á óperunni Gilitrutt eftir Hildigunni Rúnarsdóttur. Verulega gjöfult ár hjá heillandi listakonu.

Hanna Dóra Sturludóttir
Hanna Dóra fór afar fallega með hin ýmsu hlutverk sín í bæði tónleikauppfærslum og óperusýningum. Hún söng í jafn ólíkum verkum eins og Sálumessu eftir Duruflé og Jólaóratoríunni eftir J.S. Bach með Dómkórnum, Eddu II eftir Jón Leifs með Sinfóníuhljómsveit Íslands og í hlutverki móðurinnar í óperunni Brothers. Afar gott ár hjá einni af okkar bestu söngkonum!

Valgerður Guðnadóttir
Valgerður Guðnadóttir hefur á undanförnum árum fest sig í sessi sem ein fremsta söngkona okkar og eitt af aðalsmerkjum hennar er að þau verkefni sem hún tekst á við eru af fjölbreyttum toga. Á liðnu ári sýndi hún meðal annars stórkostlega frammistöðu í hlutverki Christine í Óperudraugnum, lét ljós sitt skína á jólatónleikum Sinfóníuhljómsveitar Íslands sem og Vínartónleikum og tókst á við hlutverk Völvunnar í Völuspá eftir Þorvald Bjarna Þorvaldsson.

TÓNLISTARVIÐBURÐUR ÁRSINS – HÁTÍÐIR

Myrkir músíkdagar
Myrkir músíkdagar hafa einstaka sérstöðu meðal tónlistarhátíða á Íslandi og vægi út fyrir landsteinana. Þeir eru einstakur vettvangur nýsköpunar fyrir íslensk samtímatónskáld og opna hringsjá út í þróunina utan Íslands, með stórkostlegri breidd erlendra gesta meðal tónskálda og flytjenda. Frábær listræn stjórnun, fjölbreytt val tónleikastaða auk ýmis konar viðburða með ungum tónlistarmönnum og áheyrendum eykur mjög á framsækinn hátíðarblæ Myrkra músíkdaga.

Óperudagar í Reykjavík
Með fádæma framtakssemi og sterkri listrænni sýn hafa stjórnendur Óperudaga sýnt fram á nýja möguleika og hinar fjölbreyttustu birtingarmyndir óperuformsins. Bæði með því að færa það til nútímans og hylla hið hefbundna, auk þess að fara nýstárlegar leiðir í að ná til og heilla áhorfendur.

Reykholtshátíð
Metnaðarfull tónlistarhátíð á sögufrægum slóðum og fögrum stað með sterkan listrænan fókus. Þar mætast fyrirtaks tónlistarflutningur og jafnvægi milli erlendra sígildra verka og íslenskra tónverka sem sjaldan hafa verið flutt hér á landi. Heildstætt faglegt yfirbragð á hátíð sem vaxið hefur ásmegin með ári hverju að undanförnu.

OPINN FLOKKUR / ÞJÓÐLAGATÓNLIST / LEIKHÚS- OG KVIKMYNDATÓNLIST

 PLATA ÁRSINS – ÞJÓÐLAGATÓNLIST

Ylja – Dætur
Gömlu íslensku þjóðlögin lifna við í nýjum útsetningum þeirra Gígju, Bjarteyjar og Guðmundar Óskars. Tónlistarflutningur allur, umgjörð og hljóðvinnsla er til fyrirmyndar.

Ásgeir Ásgeirsson – Travelling Through Cultures
Gítarleikarinn Ásgeir Ásgeirsson sendir hér frá sér aðra plötu hvar hann sameinar tvo ólíka menningarheima. Íslensku þjóðlögin fá hér enn ævintýralegri blæ þar sem hljómur Austurlanda litar lögin sínum einkennandi litum. Sigríður Thorlacius gefur tónlistinni svo aukinn slagkraft og útkoman verður bæði frumleg, vönduð og skemmtileg.

Umbra – Sólhvörf
Á Sólhvörfum tekur Umbra hlustandann í heillandi ferðalag þar sem tónlist tengd dimmum vetrardögum er í forgrunni. Lögin eru sum hver vel þekkt en önnur minna, en eiga það sameiginlegt að vera framúrskarandi útsett og flutt af þessum frábæra hópi tónlistarkvenna. Virkilega vönduð plata.

Umbra – Úr myrkrinu
Dularfullur og seiðandi hljóðheimur íslensks og miðevrópsks tónlistararfs miðalda. Út úr myrkrinu og inn í ljós birtist okkur hinn heillandi heimur fjölröddunar fyrri alda í fegurð og frumleika sem á erindi við nútímann.

Teitur Magnússon – Orna
Frumleg og ögrandi plata og alls ekki hefðbundin þjóðlagaplata. Fer þvert á mörk og mæri, heldur þeim skrýtileika sem var að finna á 27 en er á yfirborðinu áhlýðileg, þjóðlagakennd poppplata þar sem allt er smávegis á skakk og skjön.

 

ÚTGÁFA ÁRSINS – LEIKHÚS OG KVIKMYNDATÓNLIST

Atli Örvarsson – Lói, þú flýgur aldrei einn
Lói – þú flýgur aldrei einn er afar vel heppnað tónverk við söguna um Lóa litla sem er að læra að bjarga sér úti í hinum harða heimi. Tónlistin er lituð af tilfinningum Lóa litla og er allur skalinn túlkaður af mikilli næmni og fagmennsku Atla Örvarssonar.

Davíð Þór Jónsson – Kona fer í stríð
Tónlistin við mynd Benedikts Erlingssonar, Kona fer í stríð, gegnir óvanalega ríku hlutverki því hún er algerlega órofa hluti af myndmáli hennar. Tríóið sem hana flytur, með höfundinn Davíð Þór Jónsson í fararbroddi, er nokkurs konar framlenging á sjálfri aðalsögupersónu kvikmyndarinnar. Tónlistin og kvikmyndin mynda því órofa heild.

Gyða Valtýsdóttir – Mihkel
Um er að ræða fyrstu kvikmyndatónlistina í fullri lengd sem Gyða Valtýsdóttir vinnur, en Mihkel/Undir halastjörnu er kvikmynd eftir Ara Alexander Ergis Magnússon. Flæðið er dularfullt, ljóðrænt og seiðandi og ber höfundinum fagurt vitni.

Veigar Margeirsson – Efi, dæmisaga
Áhrifamikil tónlist Veigars í leikverkinu Efa, dæmisögu, skipar stóran sess í sýningunni en þetta er fyrsta verkefni Veigars fyrir Þjóðleikhúsið. Ljóðræn og falleg tónlist, í senn látlaus og tregafull.

Jóhann Jóhannsson – Mandy
Síðasta höfundarverk Jóhanns Jóhannssonar. Stórbrotið tónverk þar sem teknótragískar melódíur togast á við hið ljóðræna.

 

PLATA ÁRSINS – OPINN FLOKKUR

 Sunna Friðjóns – Enclose
Afar frambærilegt verk frá þessari lítt þekktu tónlistarkonu. Dreymin popplög og knýjandi kammerstykki mynda görótta blöndu sakleysis og einhvers óræðara og hættulegra. Sóley hin íslenska og Agnes Obel hin danska eru á meðal merkjanlegra áhrifavalda.

Maximús Músíkús og Sinfóníuhljómsveit Íslands – Maximús fer á fjöll
Maxímús Músíkús Hallfríðar Ólafsdóttur heldur áfram að heilla heimsbyggðina. Að þessu sinni fer Maxímús á fjöll og hrifning hans á íslenskri náttúru skilar sér í tónum og takti. Glaðlegt og leikandi tónverk sem hrífur alla, jafnt unga sem aldna.

Gyða Valtýsdóttir – Evolution
Gyða Valtýsdóttir sýnir gríðarlega sterk höfundareinkenni á fyrstu sólóplötu sinni með frumsömdu efni. Strengir læðast um og rafhljóð sindra og humma undir og yfir. Þversögn einkennir plötuna, hún er kraftmikil og sannfærandi, en um leið viðkvæmnisleg og blíð. Söngrödd Gyðu er notuð á áhrifaríka vegu og sellóleikur hennar, í senn skapandi og persónulegur, setur mark sitt á alla framvindu.

Hekla – Á
Þeramínið hefur lengi verið dularfullur förunautur dægurtónlistarinnar, gægist óforvarandis inn í tónlist poppara eins og The Beach Boys eða rokkara eins og Pixies. Hekla (Magnúsdóttir) hefur nýtt þetta hljóðfæri í tónsköpun sinni sem er í fullum blóma á þessari þriðju plötu hennar. Tónlistin er seiðandi, surgandi og naumhyggjuleg og ógn leynist við hverja þúfu. Melankólía og viss helgi rennur fallega um plötuna og það algerlega áreynslulaust.

Kjass – Rætur
Nærgætin og umlykjandi tónlistin er í djassbúning en íslensk þjóðlög til grundvallar, sem Fanney Kristjáns Snjólaugardóttir syngur á sama hátt. Þagnir eru notaðar á áhrifaríkan hátt, gítarstrokurnar koma eftir tveggja sekúndna bið, píanósláttur varlegur og mjúkur og upptaka innileg, þar sem maður heyrir skrjáfið þegar tónlistarmennirnir færa sig til í sætunum.

 

LAG ÁRSINS/TÓNVERK ÁRSINS Í OPNUM FLOKKI

Snorri Hallgrímsson – I Know You´ll Follow
Hægstreym og falleg smíð af fyrstu plötu Snorra, hinni stórgóðu Orbit. Strengir og þekkileg rafhljóð bítast á en yfir tónar tær falsetturödd Snorra og kórónar þannig verkið.

Arnór Dan – Stone By Stone
Falsettufurstinn Arnór Dan fetar nýjar brautir. Sjaldan hefur fegurð og framúrstefna fengið sín betur notið en í þessari firnagóðu smíð.

Gyða Valtýsdóttir – Moonchild
Einstakt rökkurpopp úr ranni Gyðu Valtýsdóttur, hvar ómstríðir strengir og söngrödd Gyðu – sem virðist spretta fram úr óræðum handanheimi – byggja undir stemningu sem er ekkert minna en himnesk.

Veigar Margeirsson – Efi
Hugljúf tónsmíð leidd áfram af tregaþrunginni spennu. Undurfalleg laglínan, studd af mystískum hljómum og hljóðheimi strengjahljóðfæra, dregur upp tregablandnar myndir í hugskotssjónum þess er á hlýðir.

JFDR – Gravity
Jófríður Ákadóttir heldur áfram að heilla tónlistarunnendur hér sem erlendis með vel til fundnu tilraunapoppi sínu. Gravity, sem var gefið út á súkkulaðistöng, kitlar bragðlauka tónvísra svo um munar.

 

PLÖTUUMSLAG ÁRSINS – ÞVERT Á FLOKKA

The Vintage Caravan – Gateways
Ljósmyndun/ljósmyndavinnsla/listræn stjórn – Julian Haas
Umbrot og hönnun – Jón Ingi Stefánsson
Umslag er bæði súrt og sækadelískt, með sterkum og hrópandi litum. Tónar fullkomlega við innihaldið, sem er rokk undir sterkum áhrifum frá áttunda áratugnum.

Jóel Pálsson – Dagar koma
Hönnuður – Alli Metall
Nostursamlegt umslag; grátóna og skarpt, sem vinnur á fallegan hátt með íslenska náttúru án þess að detta ofan í klisjur. Gróf áferð umslagsins, með saumuðum köntum, gefa því heimilislegan blæ. Gulrauður, áberandi punktur setur svo „punktinn“, glæsilega yfir i-ið.

Jónas Sig – Milda hjartað
Ljósmyndun – Bernhard Kristinn
Hönnun – Ámundi Sigurðsson
Sterk ljósmynd af andliti höfundar undirstrikar titil plötunnar og efniviðinn vel. Jónas er í senn mildur í fasi og einbeittur, nákvæmlega eins og djúpir textarnir sem fjalla um styrk kærleikans í viðsjárverðum samtímanum.

Skálmöld – Sorgir
Hönnun – Kristjan Lyngmo
Sorgir er plata sem fjallar um ódæðisverk, drauga og forynjur. Einfalt en kraftmikið umslagið hnykkir smekklega á þeim hildarleikjum sem berast um tónrásirnar.

Umbra – Sólhvörf
Ljósmyndun – Lilja Birgisdóttir
Hönnun – Inga Birgisdóttir
Stílhreint umslag sem kallast fallega á við heiti plötunnar, Sólhvörf. Ljósbrot, skuggi og litir eru í fullu samræmi við sjálfa plötuna.

 

UPPTÖKUSTJÓRN ÁRSINS – ÞVERT Á FLOKKA

Jónas Sig. – Milda hjartað
Upptökustjórn: Ómar Guðjónsson
Hljóðmynd Milda hjartans, skírskotar að sumu leyti til flauelsmýktar söngvaskálda áttunda áratugarins en tekur líka til hráleika og kynngikrafts, eins og heyra má í smellinum „Dansaðu“. Heildarhljómurinn er lífrænn og umlykjandi og heldur hlustandanum þægilega föngnum allt til enda.

Ylja – Dætur
Upptökustjórn: Guðmundur Óskar Guðmundsson
Heildaráferð plötunnar Dætur er skýr, útsetningar hreinar og beinar og söngraddir Gígju og Bjarteyjar njóta sín afar vel. Hér má vel greina nýjan hljóm hjá Ylju og þarf engan að undra, enda töframaðurinn Guðmundur Óskar sem stýrir hönnun hljóðmyndarinnar.

Víkingur Heiðar Ólafsson – Johann Sebastian Bach
Upptökustjórn: Christopher Tarnow
Fyrir mörgum er hið einkennandi gula merki Deutsche Grammophon merki um gæði og það á sannarlega við nýjustu plötu Víkings Heiðars. Framúrskarandi flutningi Víkings Heiðars eru gerð frábær skil í frábærri upptöku, þar sem píanóleikur Víkings Heiðars nýtur sín til fulls.

Auður – Afsakanir
Upptökustjórn: Auðunn Lúthersson, Addi 800, Glenn Schick.
Afsakanir er afar vel unnin plata. Heillandi og seiðandi hljóðheimur sem grípur hlustandann við fyrsta tón. Afar heildrænt verk þar sem er vel hlúð að smáatriðum og stóru myndinni.

John Grant – Love Is Magic
Upptökustjórn: Ben Edwards
Hljóðheimur John Grant á Love Is Magic fer með okkur í heilhring frá síðustu plötu. Gamalt diskó. Danstónlist og fönk ofan á seiðandi laglínur og texta John Grant blandast einkar vel og platan hljómar eins og flytjandinn hafi lengi gengið með hljóðheiminn í maganum.

Valdimar – Sitt sýnist hverjum
Upptökustjórn: Pétur Ben (upptökustjóri) Magnús Öder (hljóðblöndun) Alan Douches (hljómjöfnun)
Lífrænt, krafmikið og fallegt er það sem kemur upp í huga þegar hlustað er á plötuna Sitt sýnist hverjum með hljómsveitinni Valdimar. Útsetningar og hljóðblöndun eru eins og best verður á kosið og er spilamennskan svo fumlaus að það er líkt platan sé tekin upp lifandi. Þó heyrir maður aukahljóð sem eru svo lystilega blönduð saman við hljóðheiminn. Afar heilsteypt og fersk plata.

ROKK, POPP, RAF, RAPP OG HIP HOP

PLATA ÁRSINS – POPP

Prins Póló – Þriðja kryddið
Þriðja kryddið er ólíkt öllu því sem Svavar Pétur Eysteinsson, Prins Póló, hefur gert áður. Hljóðheimurinn er kunnuglegur en það er þó allt annað upp á teningnum hér. Tónlistin á plötunni er alla jafna strípuð, einfaldir tölvutaktar, búlduleitir og kassalaga hljóðgervilshljómar í bland við frábærar melódíur en ávallt óvæntar sveigjur og beygjur. Frumlegheit í bland við aðgengi. Stuð og angurværð og það er aldrei of seint að fá sér kaffi.

John Grant – Love Is Magic
Eftir þriggja ára bið sendir John Grant loksins frá sér sína fjórðu breiðskífu, Love is Magic. Hér kveður við dálítið nýjan tón eða hvað? Hljómplatan er ekki alveg eins og fólk hefði mátt búast við og við gætum orðað það á þann hátt: Þetta er erfiðasta þrautin sem Grant hefur lagt fyrir sína aðdáendur til þessa. Verkið gengur fullkomlega upp í heildina, hvort sem er í ballöðum eða bullandi raftónlistarhljóðheim sem við erum farin að þekkja svo vel frá „rosalegasta manndjöfli“ sem við eigum nokkurn tíma eftir að hitta.

 Jónas Sig – Milda Hjartað
Milda hjartað er sterkt! Maður gengur að gæðunum vísum hjá Jónasi. Aldrei lognmolla hjá þessum öfluga tónlistarmanni. Milda hjartað stígur frá fyrri plötum Jónasar á nokkuð afgerandi hátt. Þetta er falleg plata, vær og einlæg. Siglir rólega áfram og er ekki snöggmelt verk. Skyndibiti er þetta ekki, nei, þetta er hægeldað.

Svavar Knútur – Ahoy! Side A
Svavar Knútur hefur á undanförnum árum áunnið sér miklar vinsældir fyrir einlægni og ástríðu í sinni tónlist. Á síðasta ári mátti greina áhugaverða ogspennandi þróun í hans hljóðheimi á plötunni Ahoy! Side A. Þar segir Svavar skemmtilega frá þessu eilífa ferðalagi sem lífið er og gerir það listavel.

GDRN- Hvað ef
Alvöru metnaðarfullt popp með stóru „pjéi” og dassi af „erri og béi“. Hér er á ferðinni einstaklega frambærileg frumraun þar sem allt smellur saman, frábærar lagasmíðar og áhugaverðir textar. Heilsteyptur hljóðheimur ljær plötunni einkennandi blæ  þar sem GDRN leggur upp með spennandi dýpt og dulúð.

PLATA ÁRSINS – ROKK

Valdimar – Sitt sýnist hverjum
Með margverðlaunaðan söngvara í framlínunni og valinn mann í hverju rúmi í hljómsveitinni Valdimar kemur kannski ekki á óvart að hljómplatan þeirra Sitt sýnist hverjum sé hlaðin gæðum. Þá er bætt í jöfnuna samstarfi þeirra við upptökustjórann Pétur Ben og útkoman verður jafnvel enn meira spennandi og pínu hættulegri. Sterkt verk og heilt í gegn, þar sem að textarnir spila stóra rullu. Hljóðheimurinn bæði stór og mikilfenglegur.

Benny Crespo’s Gang – Minor Mistakes
Ofboðslega flott og kröftug plata frá gæðasveitinni Benny Crespo’s Gang, sú fyrsta síðan árið 2007. Minor Mistakes er full af sniðugum smáatriðum sem vert er að höggva eftir. Þrátt fyrir að lögin séu flókin og beri merki þess að meðlimir sveitarinnar kunni sitt fag, þá eru þau samt grípandi og afskaplega útvarpsvæn.

The Vintage Caravan – Gateways
Spilagleði og vinnusemi hefur gert hljómsveitina Vintage Caravan að einni bestu rokksveit landsins. Á Gateways blandast snilldarvel klassísku rokkáhrifin og svo áhrif frá nýrra rokki. Vintage Caravan hefur fundið sinn hljóm og er það vel.

Dr. Spock – Leður
Hljómsveitin Dr. Spock er náttúruafl. Það myndast ósjálfráður fiðringur og spenna þegar að sveitin lætur á sér kræla jafnvel þó að maður viti ekkert hvað standi til. Leður er frábær tjáning frá upphafi til enda.

Hórmónar – Nananabúbú
Hórmónar sigruðu Músiktilraunir árið 2016 og hafa þau æ síðan vaxið ásmegin í spilamennsku og lagasmíðum. Hljómsveitin liggur ekki á skoðunum sínum og tæpa þau í lögum sínum á málefnum sem að margir þora ekki að snerta á. Gríðarlega öflugt tónleikaband sem tónar vel við öflugan boðskapinn.

 

PLATA ÁRSINS – RAPP OG HIP HOP

JóiPé & Króli – Afsakið hlé
Á annarri plötu sinni sýna þeir JóiPé & Króli að þeir eru komnir til að vera í íslensku tónlistarlífi. Vel smíðaðir taktar, grípandi laglínur og leiftrandi söngur og rímur eru aðalsmerki plötunnar ásamt frábærri upptökustjórn og hljóðblöndun.

Elli Grill – Pottþétt Elli Grill
Elli Grill hljómar ekki eins og neinn annar íslenskur rappari. Hljóðheimur hans er myrkur og taugastrekktur og minnir á tónlist úr dystópískri brúðumynd. Elli Grill sjálfur er hvæsandi köttur, litli bróðir Satans, einhver sem gæti breytt sér í þúsund maura. Draugaleg hæðni Ella heillar, enda hefur hann fullkomið vald á sviðspersónu sinni, en það eru taktarnir, viðfangsefnið og framsetningin sem gera Pottþétt Elli Grill að því heilsteypta og heillandi verki sem hún er.

Birnir – Matador
Frábær og persónuleg frumraun frá Birni, sem þrátt fyrir ungan aldur hefur stimplað sig inn bæði sem lagahöfundur og flytjandi. Með stórskotalið íslenskra flytjanda í gestahlutverkum nær Birnir að skapa eitt sterkasta verk íslenskrar rappsögu. Heiðarleg og lýsandi fyrir tíðarandann.

Herra Hnetusmjör – KBE kynnir: Hetjan úr hverfinu
Herra Hnetusmjör sýnir sig og sannar með afgerandi hætti á plötu sinni Hetjan úr hverfinu. Hún er uppfull af spikfeitum töktum og þéttum rímum og myndi henta vel á fóninn áður en kíkt er út á lífið með strákunum á góðu laugardagskvöldi, það er einfaldlega erfitt að sitja kyrr á meðan maður hlustar. Attitjúdið drýpur af hverju strái, góð pródúsering og skýrmæltar rímur Hnetusmjörsins einkenna þessa plötu sem á mikið lof skilið.

Cyber – Bizness
Rappsveitin Cyber hefur verið iðin við tónleikahald og útgáfu undanfarin ár. Plata þeirra Bizness ber þess glöggt merki. Hljómur sveitarinnar er mjög þéttur og samstarfið þeirra fullkomlega straumlínulagað. Bizness er engu að síður mjög tilraunakennd og allt að því leikræn plata. Lögin eru vel samin og grípandi, klippur og almenn hljóðsmölun er notuð á skemmtilegan og oft kómískan hátt. Hljóðheimur og heildarsvipur plötunnar er til fyrirmyndar.

 

PLATA ÁRSINS – RAFTÓNLIST

Auður – Afsakanir
Önnur plata tónlistarmannsins Auðuns Lútherssonar er gríðarlega heilsteypt verk og inniheldur tíu lög sem haldast í hendur og saman segja einlæga sögu. Platan einkennist af sterkum lagasmíðum og nær óaðfinnanlegri upptökustjórn og hljóðblöndun. Þar hefur augljóslega verið nostrað við smáatriðin og hljóðheimurinn er skemmtilega lífrænn en einstaklega vandaður.

aYia-aYia
Á þessari sjálftitluðu frumraun tekst hinu dularfulla raftríói aYia að mynda fallega, kraftmikla og jafnframt brotakennda stemmingu sem er alltumlykjandi á öllum níu lögum plötunnar. Ein sterkasta frumraun rafsveitar um árabil.

Kælan Mikla – Nótt eftir nótt
Með Nótt eftir Nótt hefur Kælan Mikla fest sig í sessi sem ein af mest spennandi sveitum landsins. Drungalegur og rafskotinn glundroði sem smýgur inn að beini

Andi – Allt í Einu
Melódískt rafpopp undir sterkum áhrifum frá ítaló-diskói níunda áratugarins. Galsafullar lagasmíðar sem renna vel saman í taktfastri hrynjandi og skapa heild sem tekur hlustandann í “andlegar” víddir dansgólfsins.

Hermigervill – II
Hermigervill hefur lengi átt sér stóran aðdáendahóp og er þekktur fyrir bísna líflegan flutning á tónleikum og sínar rauðu, síðu fléttur. Á nýjustu plötu hans fær stíllinn og hljóðheimurinn sem við þekkjum frá Hermigervli að njóta sín, í bland við ögn frábrugðnari, á köflum tilraunakenndari og draumkenndari lög. Saman verður úr þessi líka frábæra plata.

 

SÖNGKONA ÁRSINS – VERÐLAUN ÞVERT Á FLOKKA

GDRN (Guðrún Ýr Eyfjörð Jóhannesdóttir)
Guðrún Ýr hefur átt frábært ár með útgáfu plötunnar Hvað ef. Frábær söngkona, laga- og textahöfundur svo eftir er tekið. Hljómurinn í röddinni áreynslulaus og sannfærandi.

Margrét Rán
Hljómsveitin Vök hefur verið á hraðri siglingu uppá við og er enn. Það er ekki síður að þakka söngkonunni Margréti sem ljáir henni rödd sína fyrir utan sterkar lagasmíðarnar. Öryggið uppmálað og hljómurinn heilsteyptur.

JFDR (Jófríður Ákadóttir)
Rödd Jófríðar hrífur ávallt alla með sér í spennandi ferðalag. Tónlist hennar er ævintýraleg og tilraunakennd og röddin notuð sem hljóðfæri sem gengur fullkomlega upp.

Brynhildur Karlsdóttir
Ung og efnileg söngkona hljómsveitarinnar Hórmónar. Kraftmikil rödd hennar og framkoma var eftirtektarverð á árinu.

Bríet
Bríet kom sterk inn á þessu ári og sannar sig sem bæði söngkona og lagahöfundur. Seiðandi rödd hennar, næmni og góð túlkun setur hana í fremstu röð söngkvenna á nýliðnu ári.

 

SÖNGVARI ÁRSINS – VERÐLAUN ÞVERT Á FLOKKA

Auður
Það hefur verið gaman að fylgjast með ferðalagi Auðuns Lútherssonar á árinu. Flottur söngvari sem á fullt inni. Syngur af innlifun textana sína sem eru fullir af tilfinningum.

Valdimar Guðmundsson
Frábær frammistaða hans á nýju plötunni Sitt sýnist hverjum vakti athygli dómnefndar. Ótrúlega flott rödd með ótal blæbrigðum. Getur verið flauelsmjúk og kraftmikil í senn.

John Grant
Frábær túlkandi og röddin seiðandi sem fer yfir allan tilfinningaskalann. Nístir inn að beini með túlkun sinni og raddbeitingu.

Króli (Kristinn Óli Haraldsson)
Króli kom fram á sjónarsviðið fyrir rúmu ári og hefur verið áberandi í íslensku rappsenunni. Á síðustu plötu JóaPé&Króla tefldi hann fram vaxandi hæfileikum sínum sem sálarsöngvari með frábærum árangri, rödd hans er líkt og hann sjálfur, orkumikil og full af lífi.

Svavar Knútur
Svavar hefur verið lengi að og er einn af þeim duglegustu í bransanum að spila út um allt. Á þessu ári kveður við nýjan tón og frábært að sjá og heyra hann halda áfram að þroskast og þróast.

 

LAG ÁRSINS – ROKK

Benny Crespo’s Gang – Another Little Storm
Benny Crespo’s Gang tekur sér alltaf góðan tíma í hlutina. Það er líka alltaf biðarinnar virði. Gríðarlega vel samið og vel flutt rokklag.

Valdimar – Stimpla mig út
Samstarf hljómsveitarinnar Valdimar og Péturs Ben á plötunni Sitt sýnist hverjum hefur verið afar gjöfult. Stimpla mig út er eitt sterkasta lag plötunnar þar sem að textinn spilar gríðarstóra rullu.

Une Misere – Wounds
Une Misére eru að stimpla sig inn sem ein allra frambærilegasta rokksveit landsins. Hljómsveit sem að heillar þá sem sjá og heyra, jafnvel þó að fólk sé ekki fyrir rokk í þyngri kantinum. Wounds er gríðarlega kraftmikið lag og varla annað hægt en að lufttromma með.

Hórmónar – Kynsvelt
Hórmónar hafa vakið verðskuldaða athygli síðan að sveitin sigraði Músiktilraunir árið 2016. Af mörgum talin ein besta tónleikasveit landsins þar sem að kraftur og boðskapur fer saman. Hluta boðskaparins má t.d. heyra í laginu Kynsvelt.

Hatari – Spillingardans
Lagið Spillingardans frá Hatara sameinar sterka ádeilu, góða lagasmíð og óaðfinnanlegan flutning að vanda. Hárbeitt svikamylla sem svíkur engan.

 

LAG ÁRSINS – POPP

Auður – Heimskur og breyskur
Lagið Heimskur og breyskur opnar plötuna Afsakanir sem kom út í nóvember 2018. Lagið hefur að geyma dramatískan og fallegan hljóðheim þar sem fljótandi hljóðgervlar, þéttur hiphop/R&B taktur ásamt einlægum og fallegum texta og söng Auðuns kemur saman á unaðslegan hátt. Útsetningin er full af skrauti og smáatriðum sem er raðað saman af mikilli gaumgæfni þannig að úr verður þessi fallega og einlæga útkoma.

Prins Póló – Líf ertu að grínast
„Líf ertu að grínast“ kom út vorið 2018 og varð fljótt eitt mest spilaða lagið á útvarpsstöðvunum af auðskiljanlegri ástæðu. Þetta er sjóðandi sumarsmellur með stáltrommum og öllu tilheyrandi, eins og prinsinum einum er lagið. Einfaldar en snillilega samdar og eftirminnilegar laglínur, hnyttinn texti og hið frábæra, einkennandi Prins Póló „sánd“. Eintóm gleði og stuð!

Vök – Autopilot
Vök hefur vaxið mikið undanfarin ár og þróað sinn hljóm áfram yfir í töluvert poppaðri átt. Sveitin hefur þar að auki aldrei verið jafn þétt „live“ og þar fer Margrét Rán fremst í flokki sem gríðarlega flottur framherji. Lagið Autopilot er snillilega vel samið popplag sem situr eftir í heilanum við fyrstu hlustun. Þéttur og sannfærandi hljóðheimurinn og töff rödd Margrétar fara gríðarlega vel saman og skapa þarna eitthvað einstakt og eftirminnilegt.

GDRN ft. Floni & ra:tio – Lætur mig
Mýktin í bassanum og fljótandi synthunum skapa andstæðu á móti skörpum taktinum í þessu frábæra lagi með GDRN. Seiðandi mjúk og sexí rödd Guðrúnar og autotune-að, ryþmískt og tilfinningaríkt rappið hjá Flona fara einstaklega vel saman. Dramatískt og fallegt en á sama tíma dimmt og ótrúlega töff lag þar sem GDRN, Floni og ra:tio sameina krafta sína og skapa þetta meistaraverk.

Bríet – In Too Deep
Hefur allt sem að gott popplag þarf að hafa. Flott melodía, góð pródúsering og geggjaður flytjandi. Bríet heldur manni algjörlega og maður vill hreyfa sig með. Hljóðheimurinn er skemmtilegur og gítarriffið sem er í gegnum lagið er grípandi.

 

LAG ÁRSINS – RAPP OG HIP HOP

JóiPé & Króli – Í átt að tunglinu
„Í átt að tunglinu“ sló rækilega í gegn sumarið 2018 og ekki að ástæðulausu. Ótrúlega þétt og flott píanógrúvið með ólíkum röddum þeirra JóaPé og Króla yfir er syndsamlega ávanabindandi og grípandi.

Logi Pedro – Dúfan mín
Gríðarlega vandaður og þéttur hljóðheimurinn og falleg sönglínan í „Dúfan mín“ var m.a. það sem heillaði fólk upp úr skónum þegar lagið kom út í byrjun árs 2018. Það er í senn sterkt og grípandi, einlægt og fallegt.

Birnir – Út í geim
Birnir fangar áskoranir hversdagsins og ástarinnar í tregafullri og sterkri lagasmíð. Einlægur og á persónulegu nótunum, studdur af stórum hljóðheim.

Herra Hnetusmjör & Ingi Bauer – Upp til hópa
Grípandi poppmelódía frá Herra Hnetusmjör og Inga Bauer. Lag sem stimplar sig rækilega inn í alla hópa. Það er örðugt að hrista þennan vel heppnaða slagara úr hausnum.

Cyber – Hold
Hiphop-sveitin Cyber sýnir hér að þær eru í hópi frambærilegasta tónlistarfólks þjóðarinnar. Tilvistarlegar vangaveltur úr hversdagsleikanum er viðfangsefni lagsins Hold og er listavel flutt af sveitinni. Takturinn er seiðandi og dularfullur og skapar viðeigandi umgjörð fyrir þann ískalda veruleika sem Cyber tekst á við í laginu.

 

LAGAHÖFUNDUR ÁRSINS – VEITT ÞVERT Á FLOKKA

Auður – Auðunn Lúthersson
Lögin á plötunni Afsakanir eru hvert öðru betra, allt frábærlega smíðuð og uppbyggð popplög með grípandi laglínum sem fá mann til að söngla með þó maður sé einn úti að labba og eigi í hættu á að líta út eins og asni ef maður mætir einhverjum. Útsetningarnar eru virkilega flottar og vandaðar og hljóðheimurinn sömuleiðis. Hvort sem það eru tilfinningarík og melankólísk lög eða hressari grúv sem fylgir von, þá færir Auðunn okkur þau á silfurfati.

GDRN (Guðrún Ýr Eyfjörð Jóhannesdóttir)
Taktsmíði og meðfylgjandi hljóðmottur eru í fullkomnu jafnvægi við framfærsluna, nýmóðins og svalar. Drífandi og tilfinningaþrungin smíð en í senn grípandi popp sem hæfir vel þessari vaxandi stjörnu.

Svavar Pétur Eysteinsson
Á plötu Prins Póló, Þriðja kryddið má heyra einn skemmtilegasta kokkteil margra tónlistartegunda sem heyrst hefur undanfarin ár. Alveg sama hvort Prinsinn ætlar með okkur á dansgólfið eða á koddann, þá virðist það ganga upp hjá honum. Umfram allt afskaplega skemmtilegur lagahöfundur.

Jónas Sig
Stuð. Tregi. Angurværð. Ánægja. Losti. Öll þessi orð geta bundið tónlist Jónasar Sig saman. Á Milda hjartað fangar hann öll stig skynjunar og úr verður góður hrærigrautur tilfinninga.

Valdimar
Hljómsveitin Valdimar nær enn á ný að senda frá sér lög sem hitta rækilega í mark. Taktfast rokkið með hæfilegum grodda byggir undir angurværan söng og laglínur sem ná alltaf að dáleiða áheyrandann.

 

TEXTAHÖFUNDUR ÁRSINS – VEITT ÞVERT Á FLOKKA

Auður – (Auðunn Lúthersson)
Auðunn skrifar í fyrsta skipti á íslensku og liggur það ekki síður vel fyrir honum en að skrifa á ensku. Auðunn berskjaldar sig algjörlega og semur texta sína beint frá hjartanu enda eru þeir hreinskilnir, einlægir og tilfinningaríkir og auðvelt fyrir flesta að tengja við þá á einhvern hátt.

Jónas Sig
Jónas Sig er fyrir löngu búinn að sanna sig sem einn sterkasti textasmiður þjóðarinnar. Á plötunni Milda hjartað er Jónas flugbeittur. En um leið sannur og oft á tíðum ljúfur. Hann hefur þann einstaka hæfileika, að þegar hann talar. Þá hlustar fólk.

GDRN (Guðrún Ýr Eyfjörð Jóhannesdóttir)
Einkar heillandi popptextar með mikla dýpt og dulúð og í senn grípandi og öðruvísi. GDRN mætir hér til leiks með sterka, ferska og sannfærandi rödd og segir skemmtilega frá.

Svavar Pétur
Á nýjustu plötu Prins Póló heldur Svavar Pétur áfram að syngja okkur skemmtilega texta. Hin barnslega einlægni, í bland við alvarleika og þráðbeinann sannleik oft á tíðum, heldur Svavar manni við hlustir til enda hvers lags, í hvert skipti. Það er yfirleitt of seint að fá sér kaffi þegar manni finnst kominn tími til þess.

Valdimar
Textar Valdimars á Sitt sýnist hverjum bera merki um þroska og þor. Bæði í listinni sem og lífinu sjálfu. Fallega ort um lífið og tilveruna og baráttu hvers manns um að gera sjálfan sig og umhverfi sitt betra.

 

TÓNLISTARFLYTJANDI ÁRSINS

Hatari
Eins og segir í innsendingartexta listamanns. “Fyrir að afhjúpa linnulausu svikamyllu hversdagsleikans árið 2018.” Eiginlega ekki hægt að skýra þetta betur. Kraftmikið listrænt atriði sem fær alla sem á horfa til þess að staldra við og hlusta til enda.

Auður – (Auðunn Lúthersson)
Auðunn er öruggur á sviði vel studdur af gospel-skotnum bakröddum, þéttum bassaleik og hljómborði og stekkur stundum sjálfur á gítarinn. Það hefur verið einkar ánægjulegt að fylgjast með hversu vel honum hefur farið fram á síðustu misserum.

Vintage Caravan
Vintage Caravan er ein öflugasta tónleikasveit landsins. Þéttleiki, góður hljóðfæraleikur og spilagleði nær að hrífa áhorfandann með í þessu rótskotna rokki sem lætur engan ósnortinn.

Hórmónar
Með Brynhildi Karlsdóttir söngkonu Hórmóna fremsta í flokki tekur bandið áhorfendur á sitt vald frá fyrsta tóni með mögnuðum persónutöfrum og stórbrotni sviðsframkomu. Þéttasta pönksveit landsins og þótt víðar væri leitað.

JóiPé & Króli
Fáir listamenn koma jafn oft fram opinberlega og JóiPé & Króli. Sviðsframkoma þeirra er alltaf hlaðin skemmtanagildi og þeir hafa einstakt lag á að koma sínum áhorfendum í stuð. Alveg sama á hvaða aldri þeir eru. Þeir sannarlega eru sterk tenging milli ungs fólks og þeirra sem eldri eru.

 

TÓNLISTARVIÐBURÐIR ÁRSINS

Aldrei fór ég suður
Á undanförnum 15 árum hefur tónlistarhátíðin AFÉS fest sig all rækilega í sessi sem einn af stóru viðburðunum í íslensku tónlistarlífi. Árið 2018 sló þessi hátíð aðsóknarmet og er talið að íbúafjöldi Ísafjarðarbæjar hafi tvöfaldast um páskahelgina. Á hátíðinni hafa alltaf allar tegundir íslenskrar dægurtónlistar átt sér samastað og hafa aðstandendur hlúð jafn vel að grasrótinni sem og þeim sem reynsluna hafa.

Fiskidagstónleikarnir á Dalvík.
Fiskidagstónleikarnir hafa verið haldnir frá árinu 2013 við hafnarsvæðið á Dalvík í tengslum við bæjarhátíðina Fiskidaginn Mikla þar í bæ. Á tónleikunum er íslenskri dægurtónlist haldið afar hátt á lofti og sér í lagi íslenskri poppsögu í gegnum árin. Flytjendur koma þar fram og flytja sína stærstu slagara í bland við þjóðargersemar. Allir syngja með. Eitthvað sem er ríkt í okkar eðli.

Háskar
Raftónlistarhátíðin Háskar var haldin í fyrsta sinn á síðasta ári í Iðnó. Grundvöllur fyrir slíka hátíð í Reykjavík er greinilegur og er hún komin til að vera. Á heilum degi í Iðnó kom fjöldinn allur af tónlistarfólki úr geiranum og flutti verk sín og tónlist.

Valdimar – Útgáfutónleikar
Hljómsveitin Valdimar hefur undanfarin ár verið ein allrabesta tónleikasveit landsins. Á útgáfutónleikunum sýndi sveitin mátt sinn og megin og troðfyllti Háskólabíó og flutti lög af plötu sinni Sitt sýnist hverjum í bland við sín eldri lög. Sveitin er afar vel spilandi og nái að fanga athygli áhorfandans af mikilli næmni.

John Grant – Love is Magic
Útgáfutónleikar John Grant fyrir plötuna Love is Magic sem haldnir voru í Hörpu á haustdögum eru enn ofarlega í huga þeirra sem þá sóttu. John Grant og sveit hans hafa undanfarin ár ferðast vítt og breitt um víða veröld til tónleikahalds og er því konfekt fyrir augu og eyru að upplifa viðburð af þessu tagi. Sveitin sýnir afar heillandi sviðsframkomu og John hefur fyrir margt löngu fangað hjörtu landsmanna.

 

BJARTASTA VON RÁSAR 2

Une Misére
Hljómsveitin Une Misére er ein af kraftmestu og mest spennandi rokksveitum landsins um þessar mundir. Hún hefur vakið athygli fyrir fítonskraft í tónlist sinni og orkumikla sviðsframkomu. Nýverið samdi hljómsveitin við þýsku útgáfuna Nuclear Blast og hreif hún fjölmarga gesti með sér á nýafstaðinni Eurosonic-hátíð í Hollandi.

Matthildur
Matthildur kom fram á sjónarsviðið árið 2018 með hvelli, en á árinu gaf hún út lögin Heartbeat og Wonder sem öll eru samin af henni. Í tónlist hennar má greina áhrif frá söngkonunum og lagasmiðunum  Jill Scott, Ellu Mai og Kehlani. Matthildur tók þátt í að búa til plötuna Afsakanir með Auði sem var ein af plötum ársins og var hún einn umtalaðasti listamaðurinn á Iceland Airwaves.

ClubDub
Þrátt fyrir ungan starfsaldur gerði ClubDub allt vitlaust á árinu með laginu Clubbed Up sem fór yfir milljón spilanir á Spotify. Sama ár gaf sveitin út plötuna Juice Menu, Vol 1 sem naut mikilla vinsælda. Nýverið kom að auki út heimildarmynd um hljómsveitina svo hitinn er mikill í kringum hana.

Bríet
Bríet gaf út sína fyrstu smáskífu árið 2018. Hún vakti strax mikla athygli og þrátt fyrir ungan aldur og hárfína rödd er mikil vigt í tónlist hennar. Seiðandi rödd Bríetar, næmni og góð túlkun setur hana í fremstu röð söngkvenna. Það má búast við því að árið 2019 verði enn stærra hjá henni, en hún er nú þegar farin að funda í Bandaríkjunum og flytja tónlist sína þar.

Bagdad Brothers
Hljómsveitin Bagdad Brothers kom sem ferskur og hressilegur indírokk-andvari á árinu. Þeir byggðu hægt en örugglega upp orðspor með tónleikum og þröngskífum en sprungu svo út á síðustu Iceland Airwaves hátíð, og nú síðast með plötunni Sorry. Tónlistin einkennist af letilegum en útpældum gítarhljómum, söngurinn er kynflöktandi falsetta sem er í senn áreynslulaus og kraftmikil, og textarnir eru súrrealísk samsuða sem malar í kassanum.

 

ALBUMM.IS OG ÍSLENSKU TÓNLISTARVERÐLAUNIN

Auður – Afsakanir
Leikstjóri: Erlendur Sveinsson
https://www.youtube.com/watch?v=dskXLtVxLdY
Myndbandið/myndin heltekur áhorfandann frá fyrstu töku en verkið er bæði skemmtilegt og hlaðið ólýsanlegri orku. Auður er mikill snillingur og listamaður fram í fingurgóma. Heilsteypt verk sem fær á köflum hárin til að rísa á hnakkanum!

Between mountains – Into the Dark
Leikstjóri: Haukur Björgvinsson
https://www.youtube.com/watch?v=Tp4AHG8OkRg
Ótrúlega vel skotið, klippt og lýst myndband og svo er sagan einstaklega frábær. Hér er allt hugsað til hins ýtrasta og nostrað er við hvert smáatriði.

GDRN – Lætur mig ft. Floni & ra:tio
Leikstjóri: Ágúst Elí
https://www.youtube.com/watch?time_continue=1&v=Av0p2g9Hm9Q
Myndbandið er eins og draumur og maður sogast inn í sýndarheim sem erfitt er að segja skilið við. Svart vatn, þrumur og eldingar! Töff myndband með „dimmum” pælingum en samt eitthvað svo fallegt.

Herra Hnetusmjör – Fóbó
Leikstjóri: Eiður Birgisson
https://www.youtube.com/watch?v=fW2V_vZw77M
Frábært myndband og virkilega vel hugsað og skotið. Maður fær það á tilfinninguna að maður sé að horfa á erlenda spennumynd. Skemmtileg saga með trylltum “slow motion” senum!

 Hugar – Saga
Leikstjóri: Máni Sigfússon
https://www.youtube.com/watch?v=_59PUqHkLsY
Virkilega vel skotið og klippt myndband en einnig er lýsingin alveg til fyrirmyndar. Stemningin í myndbandinu er margþrungin og smellpassar laginu. Tilfinningaríkt og þétt!

Ólafur Arnalds – re:member
Leikstjóri: Thora Hilmar
https://www.youtube.com/watch?v=oAhO5eegMfY
Virkilega töff myndband sem kannski passar ekkert endilega við lagið. Sem er ótrúlega skemmtilegt og fær myndbandið samt til að virka á einhvern ótrúlegan flottan hátt. Skemmtilegar tökur og gott andrúmsloft.

Special-K – Date Me I’m Bored
Leikstjóri: Kristín Helga Ríkharðsdóttir
https://www.youtube.com/watch?v=YPdWAA48LJU&t=21s&fbclid=IwAR3VCp6oPZs3qopjumPwyLIHz3wmLfMVm8mv2btndPmYuwkz2GM-0rEopm8
Special-K er lundi, allavega í þessu myndbandi. Hér fá litir að njóta sín afar vel og öll umgjörð myndbandsins er til fyrirmyndar, sem og allar pælingar. Búningar, förðun og lýsing gerir myndbandið frekar furðulegt en samt svo mjög skemmtilegt.

Teitur Magnússon ásamt Mr. Silla – Orna
Leikstjóri: Logi Hilmarsson
https://www.youtube.com/watch?v=nHG9XkSO-ZY
Teitur er einkar lunkinn við að semja hressar melódíur sem festast við hausinn á manni. Myndbandið við Orna er einkar skemmtilegt og smellpassar andrúmslofti lagsins. Teitur er auðvitað galdrakall þannig að myndbandið er ekkert svo langt frá persónuleika hans. Mjög skemmtilegt.

 

 

Íslensku tónlistarverðlaunin verða veitt þann 13. mars í Hörpu. Hægt verður að fylgjast með hátíðinni í beinni útsendingu hjá RÚV.

 

 

 

Tilnefningar til Íslensku tónlistarverðlaunanna

By | Fréttir | No Comments

 

Tilkynnt hefur verið hverjir það eru sem hljóta tilnefningar til Íslensku tónlistarverðlaunanna fyrir árið 2018.

Flestar tilnefningar til Íslensku tónlistarverðlaunanna hljóta Auður, Valdimar, GDRN, Jónas Sig, Víkingur Heiðar, Sunna Gunnlaugs, Umbra, Anna Þorvaldsdóttir, JóiPé & Króli, Herra Hnetusmjör og Gyða Valtýsdóttir.

Íslensk tónlist blómstrar sem aldrei fyrr og ljóst er að tónlistarárið í fyrra var bæði glæsilegt, spennandi og fjölbreytt. Af innsendingum og tilnefningum má dæma að margar góðar plötur litu dagsins ljós, gnægt var af glæsilegum tónleikum og viðburðum af ýmsum toga auk þess sem stöðugri nýliðun gætir í íslensku tónlistarlífi. Íslensk tónlist stendur því traustum fótum og greinilegt er að íslenskt tónlistarfólk er metnaðarfullt, skapandi og leitandi í list sinni, enda voru innsendingar sem bárust Íslensku tónlistarverðlaununum gríðarlega margar og fjölbreyttar í öllum flokkum og báru þess merki að tónlistarárið 2018 hafi verið æði fjölskrúðugt.

Flestar tilnefningar í ár hlýtur Auður, alls átta tilnefningar en platan hans Afsakanir sló heldur betur í gegn á nýliðnu ári. Hljómsveitin Valdimar átti gríðargóðu gengi að fagna í fyrra og hlýtur sjö tilnefningar í flokki rokktónlistar. Fast á hæla Valdimars kemur tónlistarkonan Guðrún Ýr eða GDRN með sex tilnefningar, fyrir plötu ársins í popptónlist, sem söngkona ársins og texta- og lagahöfundur svo fátt eitt sé nefnt en innkoma hennar var sem ferskur andvari á nýliðnu ári. Jónas Sig hlýtur fimm tilnefningar í flokki popptónlistar fyrir plötu sína Milda hjartað. Jónas er þar á persónulegri nótum en áður og er m.a. tilnefndur sem bæði laga- og textahöfundur ársins. Að auki fær Milda hjartað tilnefningu fyrir hljóðheiminn þar sem félagi Jónasar, Ómar Guðjónsson er ábyrgur fyrir Upptökustjórn en það er verðlaunaflokkur sem er endurvakinn nú í ár. Í hiphoppinu eru það svo JóiPé & Króli ásamt Herra Hnetusmjör sem eru atkvæðamestir með þrjár tilnefningar.

Í opnum flokki hlýtur hljómsveitin Umbra þrjár tilnefningar en það gerir einnig Gyða Valtýsdóttir sem á m.a. plötur bæði í opnum flokki og í kvikmyndatónlist. Í flokki djass og blústónlistar er Sunna Gunnlaugs atkvæðamest með fjórar tilnefningar en svo eiga þeir Scott McLemoreKarl Olgeirsson og Agnar Már Magnússon þrjár hver. Árið í sígildri og samtímatónlist var geysisterkt og fjölbreytt að mati dómnefndar. Hvað varðar fjölda tilnefninga þá er það Víkingur Heiðar Ólafsson sem hlýtur í ár fjórar tilnefningar fyrir útgáfu sína og flutning á verkum Johann Sebastian Bach. Anna Þorvaldsdóttir fylgir þar á eftir og er með þrjár tilnefningar í flokki sígildrar og samtímatónlistar, fyrir plötu sína AEQUA og tónverkin METACOSMOS og Spectra.

Í ár verða veitt 37 verðlaun auk Heiðursverðlauna Íslensku tónlistarverðlaunanna. Veitt verða verðlaun í flokki popp-, rokk-, hiphop- og raftónlistar, djass- og blústónlistar, sígildrar- og samtímatónlistar og í opnum flokki. Í þeim síðasta eru veitt verðlaun fyrir plötu ársins í opnum flokki, fyrir leikhús- og kvikmyndatónlist auk loks þjóðlagatónlist.

Líkt og áður skera nokkur verðlaun sig úr. Bjartasta vonin í sígildri og samtímatónlist og í djass og blústónlist er útnefnd af dómnefnd og tilkynnt á verðlaunahátíðinni sjálfri hver það er sem hlýtur þá nafnbót en Bjartasta vonin í flokki popp-, rokk-, hiphop- og raftónlistar verður tilnefnd af starfsfólki Rásar 2 og fer kosning fram á vefnum Ruvmenning.is. Þegar kemur að vali á Tónlistarmyndbandi ársins þá er það dómnefnd á vegum Albumm.is sem tilnefnir og fer kosning fram á heimasíðu Albumm, þar sem einnig er hægt að horfa á myndböndin átta sem þóttu skara fram úr.

Íslensku tónlistarverðlaunin verða veitt í Hörpu miðvikudaginn 13. mars og verður verðlaunahátíðin í beinni útsendingu á RÚV. Kynnir kvöldsins er Saga Garðarsdóttir.

Það er Samtónn sem stendur að baki Íslensku tónlistarverðlaununum en aðilar að Samtóni eru STEF – Samband tónskálda og eigenda flutningsréttar, Tónskáldafélag Íslands, Félag tónskálda og textahöfunda, SFH-Samband flytjenda og hljómplötuframleiðenda auk aðildarfélaga.Tilgangur Samtóns er að vinna að sameiginlegum hagsmunum og styrkja stöðu höfunda, flytjenda, framleiðenda og annarra rétthafa að tónlist. Samtónn kemur fram sameiginlega fyrir hönd íslenskra rétthafa og tónlistarfólks.

Það var Ylja sem lék fyrir gesti á Bryggjunni í dag þegar tilnefningar voru kynntar.

Eftirtaldir hljóta tilnefningu til Íslensku tónlistarverðlaunanna árið 2018.

Rokk, popp, raftónlist, rapp og hip hop – Tilnefningar 2018

Plata ársins – Rapp og hip hop

JóiPé & Króli – Afsakið hlé
Elli Grill – Pottþétt Elli Grill
Birnir – Matador
Herra Hnetusmjör – KBE kynnir: Hetjan úr hverfinu
Cyber – Bizness

Plata ársins – Rokk

Valdimar – Sitt sýnist hverjum
Benny Crespo’s gang – Minor Mistakes
The Vintage Caravan – Gateways
Dr. Spock – Leður
Hórmónar – Nananabúbú

Plata ársins – Popp

Prins Póló – Þriðja kryddið
John Grant – Love Is Magic
Jónas Sig – Milda Hjartað
Svavar Knútur – Ahoy! Side A
GDRN- Hvað ef

Plata ársins – Raftónlist

Auður – Afsakanir
aYia-aYia
Kælan Mikla – Nótt eftir nótt
Andi – Allt í Einu
Hermigervill – II

Söngvari ársins

Auður
Valdimar Guðmundsson
John Grant
Króli (Kristinn Óli Haraldsson)
Svavar Knútur

Söngkona ársins

GDRN (Guðrún Ýr Eyfjörð Jóhannesdóttir)
Margrét Rán
JFDR (Jófríður Ákadóttir)
Brynhildur Karlsdóttir
Bríet

Lag ársins – Rokk

Benny Crespo’s Gang – Another Little Storm
Valdimar – Stimpla mig út
Une Misere – Wounds
Hórmónar – Kynsvelt
Hatari – Spillingardans

Lag ársins – Popp

Auður – Heimskur og breyskur
Prins Póló – Líf ertu að grínast
Vök – Autopilot
GDRN ft. Floni & ra:tio – Lætur mig
Bríet – In Too Deep

Lag ársins – Rapp og hip hop

JóiPé & Króli – Í átt að tunglinu
Logi Pedro – Dúfan mín
Birnir – Út í geim
Herra Hnetusmjör & Ingi Bauer – Upp til hópa
Cyber – Hold

Textahöfundur ársins

Auður – (Auðunn Lúthersson)
Jónas Sig
GDRN (Guðrún Ýr Eyfjörð Jóhannesdóttir)
Svavar Pétur – Prins Póló
Valdimar

Lagahöfundur ársins

Auður – Auðunn Lúthersson
GDRN (Guðrún Ýr Eyfjörð Jóhannesdóttir)
Svavar Pétur Eysteinsson
Jónas Sig
Valdimar

Tónlistarviðburður ársins

Aldrei fór ég suður
Fiskidagstónleikarnir á Dalvík.
Háskar
Valdimar – Útgáfutónleikar
John Grant – Love is Magic

Tónlistarflytjandi ársins

Hatari
Auður – (Auðunn Lúthersson)
The Vintage Caravan
Hórmónar
JóiPé & Króli

Bjartasta vonin – Verðlaun veitt í samstarfi við Rás 2

Bagdad Brothers
Bríet
ClubDub
Matthildur
Une Misère

Tónlistarmyndband ársins – Verðlaun veitt í samstarfi við Albumm.is

Albumm.is og Íslensku Tónlistarverðlaunin
Auður – Afsakanir – Leikstjóri: Erlendur Sveinsson
Between mountains – into the Dark – Leikstjóri: Haukur Björgvinsson
GDRN – Lætur mig ft. Floni & ra:tio – Leikstjóri: Ágúst Elí
Herra hnetusmjör – Fóbó – Leikstjóri: Eiður Birgisson
Hugar – Saga – Leikstjóri: Máni Sigfússon
Ólafur Arnalds – re:member – Leikstjóri: Thora Hilmar
Special-K – Date Me I’m Boerd – Leikstjóri: Kristín Helga Ríkharðsdóttir
Teitur Magnússon ásamt Mr. Silla – Orna – Leikstjóri: Logi Hilmarsson


Tilnefningar til Íslensku tónlistarverðlaunanna 2018 – Opinn flokkur

Plata ársins – Þjóðlagatónlist

Ylja – Dætur
Ásgeir Ásgeirsson – Travelling through cultures
Umbra – Sólhvörf
Umbra – Úr myrkrinu
Teitur Magnússon – Orna

Plata ársins – Opinn flokkur

Sunna Friðjóns – Enclose
Maximús Músíkús og Sinfóníuhljómsveit Íslands – Maximús fer á fjöll
Gyða Valtýsdóttir – Evolution
Hekla – Á
Kjass – Rætur

Útgáfa ársins – Leikhús- og kvikmyndatónlist

Atli Örvarsson – Lói þú flýgur aldrei einn
Davíð Þór Jónsson – Kona fer í stríð
Gyða Valtýsdóttir – Mihkel
Veigar Margeirsson – Efi, dæmisaga
Jóhann Jóhannsson – Mandy

Lag ársins/Tónverk ársins í Opnum flokki

Snorri Hallgrímsson – I know you´ll follow
Arnór Dan – Stone by stone
Gyða Valtýsdóttir – Moonchild
Veigar Margeirsson – Efi
JFDR – Gravity

Plötuumslag ársins

The Vintage Caravan – Gateways
Jóel Pálsson – Dagar koma
Jónas Sig – Milda hjartað
Skálmöld – Sorgir
Umbra – Sólhvörf

Upptökustjórn ársins

Jónas Sig. – Milda hjartað – Ómar Guðjónsson
Ylja – Dætur – Guðmundur Óskar Guðmundsson
Víkingur Heiðar Ólafsson – Johann Sebastian Bach – Christopher Tarnow
Auður – Afsakanir – Auðunn Lúthersson, Addi 800, Glenn Schick
John Grant – Love Is Magic – : Ben Edwards
Valdimar – Sitt sýnist hverjum – Pétur Ben (upptökustjóri) Magnús Öder (hljóðblöndun) Alan Douches (hljómjöfnun)

 

Sígild- og samtímatónlist – Tilnefningar  2018

Plata ársins

Anna Þorvaldsdóttir – AEQUA
Jóhann Jóhannsson – Englabörn & Variations
Þráinn Hjálmarsson – Influence of buildings on musical tone
Víkingur Heiðar Ólafsson – Johann Sebastian Bach
Erla Dóra Vogler og Eva Þyri Hilmarsdóttir – Jórunn Viðar – Söngvar
Nordic Affect – He(a)r

Tónverk ársins

Farvegur – Þuríður Jónsdóttir
From My Green Karlstad – Finnur Karlsson
Loom – María Huld Markan Sigfúsdóttir
METACOSMOS – Anna Þorvalds
Silfurfljót – Áskell Másson
Spectra – Anna Þorvalds
Split thee, Soul, to Splendid Bits (attn.: no eternal life/light this time around) – Bára Gísladóttir

Söngvari ársins

Benedikt Kristjánsson
Eyjólfur Eyjólfsson
Oddur Arnþór Jónsson

Söngkona ársins

Hallveig Rúnarsdóttir
Hanna Dóra Sturludóttir
Valgerður Guðnadóttir

Tónlistarflytjandi ársins – Einstaklingar

Sæunn Þorsteinsdóttir
Una Sveinbjarnardóttir
Víkingur Heiðar Ólafsson

Tónlistarflytjandi ársins – Hópar

Barokkbandið Brák
Kammersveitin Elja
Schola Cantorum
Nordic Affect
Strokkvartettinn Siggi

Tónlistarviðburður ársins

Budapest Festival Orchestra og Iván Fischer – Tónleikar í Eldborg, Hörpu
#bergmálsklefinn
Brothers – Íslenska óperan
Víkingur Heiðar Ólafsson – útgáfutónleikar, Bach
Barokkbandið Brák – Spíralar Versala
Edda II: Líf guðanna – 23. mars / Sinfóníuhljómsveit Íslands og Schola Cantorum
Íslendingasögur – Sinfónísk sagnaskemmtun – hátíðarviðburður fullveldisafmælisins 1. desember 

Tónlistarviðburðir ársins

Myrkir músíkdagar
Óperudagar í Reykjavík
Reykholtshátíð

Bjartasta von í sígildri og samtímatónlist verður kynnt 13. mars þegar tónlistarverðlaunin verða afhent.

  

Djass og blús – Tilnefningar 2018

Plata ársins

Karl Olgeirsson – Mitt bláa hjarta
DÓH Tríó – DÓH
Sunna Gunnlaugs – Ancestry
Agnar Már – Hending
Scott McLemore – The Multiverse

Tónverk ársins

Mitt bláa hjarta – Tónskáld: Karl Olgeirsson  / Textahöfundur: Karl Olgeirsson
Norðurljós – Tónskáld: Sigmar Þór Matthíasson
Ancestry – Tónskáld: Sunna Gunnlaugs
To catch a glimpse – Tónskáld: Scott McLemore
Bugða – Tónskáld: Agnar Már Magnússon

Lagahöfundur ársins

Karl Olgeirsson
Sunna Gunnlaugs
Scott McLemore
Agnar Már Magnússon
Sigmar Þór Matthíasson

Tónlistarflytjandi ársins – Einstaklingur

Kjartan Valdimarsson
Sunna Gunnlaugs
Magnús Trygvason Eliassen
Jóel Pálsson
Daníel Helgason 

Tónlistarflytjandi ársins – Hópar

Stórsveit Reykjavíkur
DÓH – Tríó
Ingi Bjarni Trio

Tónlistarviðburður ársins

Blúshátíð í Reykjavík
Tónleikaraðir Jazzklúbbsins Múlans
Tónleikaröð Stórsveitar Reykjavíkur
Jazzhátíð Reykjavíkur
Freyjujazz

Bjartasta von í djass og blús verður kynnt á hátíðinni þann 13. mars næstkomandi.

Opnað fyrir skráningu

By | Fréttir, news | No Comments

Opnað fyrir skráningu til Íslensku tónlistarverðlaunanna 2018

Framkvæmdastjórn Íslensku tónlistarverðlaunanna vill vekja athygli á því að opnað hefur verið fyrir umsóknir til Íslensku tónlistarverðlaunanna 2018.

Öllu íslensku tónlistarfólki, öllum tónskáldum, útgefendum og öðrum hagsmunaaðilum sem gefið hafa út nýja íslenska tónlist, haldið tónleika eða sent frá sér ný lög, tónverk eða myndbönd árið 2018 er frjálst að senda inn tilnefningar í viðeigandi flokka. Flokkarnir eru þrír:

1. Klassík og samtímatónlist.
2. Djass og blús.
3. Popp, rokk, rapp, raftónlist, kvikmynda- og leikhústónlist og önnur tónlist.

Verðlaunaflokkum hefur fjölgað síðastliðin tvö ár en bætt hefur verið við rappi og hip-hop, raftónlist, þjóðlagatónlist og kvikmynda- og leikhústónlist. Breytingarnar hafa fallið í góðan jarðveg og gefist vel. Þessir verðlaunaflokkar eru þó háðir þeim afmörkunum að nægilega margar frambærilegar tilnefningar berist í þessa tilteknu flokka. Í ár má finna nokkrar einfaldar breytingar á flokkum auk þess sem ein verðlaun bætast við en veitt verða verðlaun fyrir upptökustjórn og listræna gerð hljóðmyndar á hljóðriti.

Opið verður fyrir tilnefningar til 15. janúar 2019.

  • Veitt eru verðlaun fyrir tímabilið 1. janúar til 31. desember 2018
  • Skilafrestur á innsendingum rennur út á miðnætti 15. janúar 2019
  • Tilnefningar til Íslensku tónlistarverðlaunanna verða kynntar um miðjan febrúar 2019
  • Veitt verða 35 verðlaun í alls 3 flokkum
  • Verðlaunahátíðin fer fram í Hörpu miðvikudaginn 13. mars 2019 og verður í beinni útsendingu á RÚV

Á heimasíðu Íslensku tónlistarverðlaunanna, www.iston.is, má finna allar helstu upplýsingar um verðlaunin, reglur, samstarfsaðila, sögu hátíðarinnar, lista yfir verðlaunahafa fyrri ára og einnig þá sem hlotið hafa tilnefningar. Það eru þeir Þormóður Dagsson, Kristinn Evertsson og Steve Anatai sem eiga veg og vanda að glæsilegu útliti og hönnun heimasíðunnar.

Til að skrá verk skal fylgja þessum hlekk en hér er um að ræða innsendingarsíðu Íslensku tónlistarverðlaunanna: https://istonumsokn.firebaseapp.com

Nánari upplýsingar um Íslensku tónlistarverðlaunin 2018

Senda má inn tilnefningar vegna verka sem gefin eru út og frumflutt á árinu. Tónlist má skila á rafrænu formi en jafnframt er mælst til þess að senda inn geisladiska eða plötur ef kostur er á slíku. Dómnefnd í sígildri og samtímatónlist fer fram á fá eintök af diskum eða hljómplötum í hendur hafi þau á annað borð verið gerð.

Tekið verður við eintökum á skrifstofu STEFs sem er að Laufásvegi 40. Tekið er við hljóðritum í viku eftir að lokað er fyrir skráningu umsókna.

Tilnefna má hljómplötu í flokkinum Plata ársins sem inniheldur annaðhvort: 4 ný lög eða fleiri, eða að lágmarki 16 mínútur af nýrri tónlist. Ekki skiptir máli hvort hljóðrit sé gefið út stafrænt eða á föstu formi, en hljóðritið þarf að vera gefið út á árinu sem er að líða og vera aðgengilegt almenningi.

Verðlaun verða veitt í ár fyrir Upptökustjórn ársins þar sem valin er besta hljóðmynd á hljómplötu. Hljóðmynd samanstendur af listrænni framsetningu efnis, hljómi og skýru tónmáli sem hæfir efninu. Eftirfarandi aðilar sem koma að upptökum og gerð hljóðrits geta verið tilnefndir á innsendingu: Listamaður, listrænn stjórnandi (producer), hljóðtæknir sem sá um hljóðblöndun, hljóðtæknir sem sá um hljóðjöfnun og upptökustjóri. Við verðlaunum taka þeir sem tilnefndir eru á skráningu.

Í ár verða veitt 35 verðlaun í 3 flokkum að viðbættum Heiðursverðlaunum Íslensku tónlistarverðlaunanna. Reglur og leiðbeiningar Íslensku tónlistarverðlaunanna er að finna á www.iston.is.
Spurningum og fyrirspurnum varðandi gjaldgengi og fyrirkomulag skal beint til stjórnar í gegnum netfangið iston@iston.is.

Íslensku tónlistarverðlaunin verða veitt í Hörpu miðvikudaginn 13. mars 2019 en tilnefningar verða kynntar um miðjan febrúar.

Stjórn Ístón skipa Margrét Eir Hönnudóttir, Kristján Freyr Halldórsson og Jóhann Ágúst Jóhannsson.

Íslensku tónlistarverðlaunin eru haldin fyrir tilstuðlan hagsmunafélaga tónlistarinnar, FÍH, STEFs og SFH, undir merkjum Samtóns.

Fylgist með okkur á Facebook og Twitter.

Áfram íslensk tónlist!

 

Það vantar í dómnefnd

By | Fréttir | No Comments

SETA Í DÓMNEFND ÍSLENSKU TÓNLISTARVERÐLAUNANNA

Stjórn Íslensku tónlistarverðlaunanna ásamt SAMTÓN (sem er bakhjarl Íslensku tónlistarverðlaunanna) leita til félagsmanna aðildarfélaga SAMTÓNs og aðila sem tengdir eru íslensku tónlistarlífi með það í huga að gefa þeim kost á að bjóða sig fram til starfa sem fulltrúar í dómnefndum vegna tónlistarársins 2018.

Leit stendur yfir að opnum eyrum í dómnefnd sem fjallar um popp, rokk, raf og rapp/hiphop.

Æskilegt er að þeir einstaklingar sem sitja í dómnefndum hafi umtalsverða þekkingu á viðkomandi sviði og þeir komi að hluta til úr röðum höfunda, flytjenda og framleiðenda eða hafi fjallað um tónlist í fjölmiðlum. Sérstaklega er leitað eftir tónlistaráhugafólki á sviði rapps/hiphops og raftónlistar en öll víðtæk þekking á dægurtónlist er af hinu góða.

Við skipun dómnefnda er tekið tillit til aldursdreifingar og jafnrar stöðu karla og kvenna. Enginn einstaklingur í dómnefnd má vera viðriðinn útgáfu nokkurra þeirra hljóðrita sem tilnefnd verða fyrir tónlistarárið 2018. Dómarar eru skipaðir til tveggja ára í senn.
Stjórn Íslensku tónlistarverðlaunanna mun fara yfir umsóknir og velja fulltrúa í dómnefndir fyrir 1. október 2018. Þeir sem hafa hug á því að senda inn umsókn er vinsamlega bent á að fara inn á slóð þá sem tilgreind er hér á eftir og að fylla út umsóknareyðublaðið.

Skráningarform

Bestu kveðjur
Stjórn íslensku tónlistarverðlaunanna

www.iston.is
Facebook-síðan

Dómnefndir Íslensku tónlistarverðlaunanna

By | Fréttir | No Comments

Dómnefndir Íslensku tónlistarverðlaunanna 2018 voru skapaðar með eftirfarandi hætti.

Rokk og Popp

Erla Ragnarsdóttir – Formaður
Matthías Már Magnússon
Arnar Eggert Thoroddsen
Helga Þórey Jónsdóttir
Regína Ósk Óskarsdóttir
Hannes Friðbjarnarson
Ómar Úlfur Eyþórsson

Jass og Blús

Unnur Sara Eldjárn – Formaður
Matthías V. Baldursson
Ingvi Þór Kormáksson
Þóra Sif Svansdóttir
Skúli Þórðarson

Sígild og samtímatónlist

Helgi Jónsson – Formaður  
Grétar Einarsson
Valgerður Guðrún Halldórsdóttir
Tui Hirv
Sigurður Ingvi Snorrason
Ingveldur Ýr Jónsdóttir
Ingvar Jon Bates Gislason

Opin flokkur

Þráinn Baldvinsson
Formenn allra flokka eða stagengill

Sérstaka aðstoð og ráðleggingar veitti Þormar Melsted við greiningu og útskýringar við vali á Plötuumslagi ársins.

Íslensku tónlistarverðlaunin þakkar dómnefndum kærlega fyrir gott og óeigingjarnt starf.

Sérstök viðurkenning veitt vegna framlags til íslensks tónlistarlífs

By | Fréttir | No Comments

 

Daníel Bjarnason fyrstur til að hljóta sérstaka viðurkenningu Samtóns og íslensku tónlistarverðlaunanna

Það var sannarlega kvöldið hans Daníels Bjarnasonar á Íslensku tónlistarverðlaununum en hann er fyrstur til að hljóta sérstaka viðurkenningu Samtóns og Íslensku tónlistarverðlaunanna fyrir störf sín og framlag til íslenskrar tónlistar, en að auki hlaut Daníel þrenn verðlaun sem hann hafði verið tilnefndur til.  

 

Daníel Bjarnason tónskáld og hljómsveitartjóri var sérlega afkastamikill á árinu 2017; Fyrsta ópera hans, Brothers, var frumsýnd í Danmörku; Fílharmóníusveit Los Angeles og fiðlusnillingurinn Pekka Kuusisto frumfluttu fiðlukonsert hans undir stjórn hins heimsþekkta hljómsveitarstjóra Gustavo Dudamels; kvikmyndatónlist Daníels hljómaði í kvikmyndinni Undir trénu, en hann hlaut nýverið Norrænu kvikmyndatónlistarverðlaunin fyrir þá vinnu. Þess utan var Daníel einnig staðarlistamaður Sinfóníuhljómsveitar Íslands auk þess að stjórna hljómsveitinni í fjölmörg skipti.

Í kjölfar samstarfs Daníels og Los Angeles-fílharmóníunnar var tónlistarhátíðin Reykjavík Festival haldin í Walt Disney Hall, tileinkuð Íslandi og íslenskri tónlist. Hátíðin stóð frá 1. apríl til 4. júní 2017 og var Daníel listrænn stjórnandi ásamt hljómsveitarstjóranum Esa-Pekka Salonen. Þar hljómuðu verk um fimmtíu íslenskra tónskálda, þar af voru um átján tónverk frumflutt. Ríflega sextíu flytjendur frá Íslandi bættust í hóp þarlendra tónlistarmanna en hátíðin reyndist einnig farvegur fyrir íslenska popptónlist og myndlist. Óhætt er að fullyrða að sjaldan eða aldrei hefur jafn viðamikil kynning átt sér stað á íslenskri tónlist, þá einkum sígildri og samtímatónlist.

Hugmyndin um Reykjavik Festival vakti athygli þeirra sem standa að Elbphilharmonie í Hamborg. Opnun tónlistarhússins í janúar 2017 var heimsviðburður í listaheiminum sem beðið hafði verið með eftirvæntingu en úr varð að á fyrstu starfsvikum hússins var haldin Íslandshátíð, Into Iceland. Hátíðin stóð í viku og voru þeir Daníel og Esa-Pekka meðal helstu driffjaðra.

Það er ómetanlegt þegar menningarstofnanir á borð við LA Phil. og Elbphilharmonie sjá mikilvægi og nýbreytni í því að halda íslenskri tónlist á lofti. Að sama skapi er ómetanlegt þegar listamenn sem njóta velgengni leggja sig fram við að leyfa öðrum listamönnum að njóta meðbyrsins.

Eins og fyrr segir þá átti Daníel Bjarnason sérlega afkastamikið ár í fyrra og var framlag hans til íslenskrar tónlistar og tónlistarlífs á árinu 2017 alveg ómetanleg og á sér vart hliðstæðu í íslenskri tónlistarsögu. Íslensku tónlistarverðlaunin vilja þess vegna færa honum bestu þakkir með sérstakri viðurkenningu og fær hann fyrstur tónlistarfólks sérstaka viðurkenningu Samtóns og Íslensku tónlistarverðlaunanna fyrir störf sín. Það var forseti Íslands herra Guðni Th. Jóhannesson sem veitti Daníel verðlaunin en auk þess að hljóta þau vann Daníel verðlaun fyrir plötu ársins í flokki sígildrar og samtímatónlistar fyrir plötuna Recurrence þar sem hann stjórnar Sinfóníuhljómsveit Íslands. Fyrsta ópera hans, Brothers, var valin tónverk ársins í flokki sígildrar og samtímatónlistar og að lokum var Undir trénu, tónlist Daníels við samnefnda kvikmynd valin plata ársins í flokki kvikmynda og leikhústónlistar.

Við óskum Daníel Bjarnasyni innilega til hamingju!

 

(Ljósmyndir tók Hörður Sveinsson fyrir Íslensku tónlistarverðlaunin)

Stuðmenn fengu heiðursverðlaun Samtóns

By | Fréttir | No Comments

Stuðmenn heiðraðir

 

Að þessu sinni heiðrum við merka hljómsveit, sem tók fyrstu skrefin árið 1970 í nýstofnuðum menntaskóla í Hlíðunum. Fjórum árum seinna gerðu Lars Himmelbjerg og Leó Löve tvær smáskífur sem vöktu misjöfn viðbrögð, en mjór er mikils vísir.

Á þjóðhátíðardaginn 1975 kom tímamótaplatan Sumar á Sýrlandi og þar kvað við nýjan tón í íslensku rokki. Stuðmenn komu fram með grímur sumarið 1975, svo að enginn þekkti þá, sem var kannski óþarfi, því þeir voru tiltölulega óþekktir. Þegar platan Tívolí kom á markað sumarið 1976 vissu flestir landsmenn hvaða tónlistarmenn skipuðu þessa einstöku hljómsveit.

Stuðmenn tóku sér nokkurra ára hlé en komu aftur með hvelli árið 1981 þegar kvikmyndin Með allt á hreinu var frumsýnd. Stuðmenn og Grýlurnar hittu landsmenn í hjartastað og myndin sló öll fyrri aðsóknarmet. Margir kunna þessa mynd utanað og það er oft vitnað í hana.

Árið 1983 kom hin skrautlega bók Draumur okkar beggja sem fjallar um sögu Stuðmanna og inniheldur borðspil, sem fáir hafa spilað. Sumarið 1984 héldu Stuðmenn vel heppnaða útihátíð í Atlavík og buðu Bítlatrommaranum Ringo Starr og eiginkonu hans til landsins.

Stuðmenn gerðu kvikmyndina Hvítir mávar 1985 og ári seinna fóru þeir í hljómleikaferð um Kína undir nafninu Strax. Hljómsveitin gaf út lagið Moscow Moscow í tilefni af leiðtogafundi Reagans og Gorbatsjovs í Höfða og hélt ærlegt áramótateiti í beinni útsendingu í sjónvarpinu í árslok.

 

 

Stuðmenn hafa tekið breytingum í gegnum tíðina en ætíð haldið sérstöðu sinni. Þeir hafa gert fjölmargar hljómplötur, haldið ótalmörg böll og tónleika, staðið fyrir hæfileikakeppnum þar sem ungt listafólk hefur stigið sín fyrstu skref og meira að segja kom fram með Karlakórnum Fóstbræðrum.

Árið 2004 gerðu Stuðmenn myndina Í takt við tímann og spiluðu í Tívolí í Kaupmannahöfn. Þeir héldu tónleika í Royal Albert Hall í Lundúnum árið 2005, komu fram í Jazz Philharmonic Hall í Pétursborg 2006 og í Cirkus í Kaupmannahöfn 2007.

Stuðmenn hafa verið óþreytandi við að finna upp á ótrúlegustu hlutum og skapa eftirminnileg augnablik. Frumlegur klæðaburður hefur einkennt Stuðmenn í gegnum tíðina, litadýrðin er í fyrirrúmi og leikrænir tilburðir hafa jafnan verið í hávegum. Nýjasta útspil þeirra var Astraltertukubburinn, með nýrri tónlist sem þeir sendu frá sér fyrir síðustu jól.

Stuðmenn hafa veitt þjóðinni ómælda gleði með grípandi söngvum og textum á löngum ferli.

Meðlimir Stuðmanna, fyrr og síðar, hljómsveitar allra landsmanna, eru heiðursverðlaunahafar Íslensku tónlistarverðlaunanna.

– Textaágrip um Stuðmenn ritaði Jónatan Garðarsson

– Lilja Alfreðsdóttir, mennta og menningarmálaráðherra, afhenti Stuðmönnum heiðursverðlaun Samtóns við mikil fagnaðarlæti þeirra sem í salnum voru.

Stuðmenn áttu svo lokaorðið á Íslensku tónlistarverðlaununum og skemmtu sér og öðrum eins og þeim einum er lagið. Heiðursverðlaunin tileinkuðu Stuðmenn afar kærum heiðursmanni, samferðamanni og vini sem engum var líkur – Tómasi Magnúsi Tómassyni.

Það er Samtónn sem stendur að baki Íslensku tónlistarverðlaununum. Að baki Samtón standa FÍH, FHF, STEF, SFS, FTT og Tónskáldafélag Íslands, Tilgangur Samtóns er að vinna að sameiginlegum hagsmunum og styrkja stöðu höfunda, flytjenda, framleiðenda og annarra rétthafa að tónlist. Samtónn kemur fram sameiginlega fyrir hönd íslenskra rétthafa og tónlistarfólks.

 

 

 

(Ljósmyndir tók Hörður Sveinsson fyrir Íslensku tónlistarverðlaunin)

Verðlaunahafar Íslensku tónlistarverðlaunanna

By | Fréttir | No Comments

 

 

Íslensku tónlistarverðlaunin fyrir tónlistarárið 2017 veitt í Hörpu

 

Það var sannarlega kvöldið hans Daníels Bjarnasonar á Íslensku tónlistarverðlaununum – hann er fyrstur til að hljóta sérstaka viðurkenningu Samtóns og Íslensku tónlistarverðlaunanna fyrir störf sín og framlag til íslenskrar tónlistar, en að auki hlaut Daníel þrenn verðlaun sem hann hafði verið tilnefndur til.

 

Daníel Bjarnason átti sérlega afkastamikið ár í fyrra og var framlag hans til tónlistarlífsins ómetanlegt og viðamikið. Hlýtur hann fyrstur tónlistarfólks sérstaka viðurkenningu Samtóns og Íslensku tónlistarverðlaunanna fyrir störf sín á sviði tónlistar þess vegna. Það var forseti Íslands herra Guðni Th. Jóhannesson sem veitti Daníel verðlaunin en auk þess að hljóta þau vann Daníel verðlaun fyrir plötu ársins í flokki sígildrar og samtímatónlistar fyrir plötuna Recurrence þar sem hann stjórnar Sinfóníuhljómsveit Íslands. Fyrsta ópera hans, Brothers, var valin tónverk ársins í flokki sígildrar og samtímatónlistar og að lokum var Undir trénu, tónlist Daníels við samnefnda kvikmynd valin plata ársins í flokki kvikmynda og leikhústónlistar.

Í flokki popp og rokktónlistar var það fyrst Nýdönsk og svo Mammút sem komu sáu og sigruðu. Nýdönsk hlaut fern verðlaun en Mammút þrenn – og spegluðu sveitirnar hvor aðra á skemmtilegan hátt. Platan Á plánetunni Jörð með Nýdönsk var valin poppplata ársins á meðan fjórða breiðskífa Mammút á ferli sveitarinnar, Kinder Versions, var valin rokkplata ársins. Rokklag ársins var valið Breathe into me með Mammút en lag Nýdanskrar, Stundum, var lag ársins í flokki popptónlistar. Daníel Ágúst Haraldsson var kosinn söngvari ársins en Katrína Mogensen var valin söngkona ársins í flokki popp- og rokktónlistar en bæði eru þau í fantaformi með sveitum sínum á breiðskífum síðasta árs. Fjórðu verðlaun Nýdanskrar hlutu þeir Björn Jörundur og Daníel Ágúst þegar þeir voru útnefndir textahöfundar ársins fyrir texta sína á plötunni Á plánetunni Jörð.

Plata ársins í Rapp og hip hop var platan Joey með Joey Christ en hann átti einnig lag ársins í flokki rapptónlistar þar sem lagið Joey Cypher stóð uppi sem sigurvegari en lagið flytur Joey Christ ásamt Herra Hnetusmjör, Birnir og Aron Can. Þetta er í annað sinn sem veitt eru verðlaun fyrir rapp og hiphop-tónlist á Íslensku tónlistarverðlaununum.

Figure frá Vök var valin plata ársins í raftónlist en sveitin var tilnefnd til fimm verðlauna. Raftónlistarlag ársins átti hins vegar Auður, en lag hans I‘d Love var einnig hlutskarpast í netkosningu hjá menningarmiðlinum Albumm.is þar sem kosið var um tónlistarmyndband ársins. Myndbandið við I‘d Love gerðu Auður og Ágúst Elí og þótti það skara framúr að mati lesenda Albumm.

Lagahöfundur ársins í flokki popp, rokk, raf- og rapptónlistar var að þessu sinni hljómsveitin Moses Hightower sem þræðir glæsilega einstigið á milli furðu- og alþýðleika á plötu sinni Fjallaloft. Tónlistin er aðgengileg á sinn einstaka hátt, framreidd af fyrsta flokks tónlistarmönnum sem eru óhræddir við fara sínar eigin leiðir í listsköpun sinni og leita ávallt nýrra leiða í tónsmíðum sínum.

JóiPé og Króli komu iðandi ferskir og sprækir inn á tónlistarsenuna á síðasta ári þegar þeir sprengdu vinsældarskalann með B.O.B.A. og heilluðu alla tónlistaraðdáendur upp úr skónum. Árið var þeirra og framkoma þeirra og fas lét engan ósnortinn og því kemur það ekki á óvart að þeir hafi fengið verðlaun sem tónlistarflytjandi ársins 2017.

Tónlistarviðburður ársins var af dýrari gerðinni en Íslensku tónlistarverðlaunin hlaut Gloomy Holiday í Hörpu sem var hluti af tónleikahátíð Sigur Rósar, Norður og Niður. Hugmyndin var tiltölulega einföld, að taka þekkt jólalög og setja þau í „Sigur Rósar“-legan búning, hægja á þeim og setja í þunglamalegri útsetningar. Skemmst er frá því að segja að hálf þjóðin fór á hliðina yfir tiltækinu og sitt sýndist hverjum. Tvímælalaust einir umtöluðustu og umdeildustu tónleikar seinni tíma.

Margt býr í þokunni, plata Snorra Helgasonar, hlaut tvenn verðlaun. Hún var valin Þjóðlagaplata ársins auk þess sem plötualbúmið þótti það besta að mati dómnefndar en það var Þrándur Þórarinsson sem myndskreytti en uppsetning og umbrot gerði Björn Þór Björnsson. Þetta er í fyrsta sinn sem verðlaun eru veitt fyrir þjóðlagatónlist og það sama gildir um lag ársins í opnum flokki en verðlaunin fengu félagarnir Egill Ólafsson og Sigurður Bjóla fyrir lagið Hósen Gósen af stórgóðri plötu Egils, Fjall.

Hinn fjölhæfi tónlistarmaður Valgeir Sigurðsson átti plötu ársins í opnum flokki þar sem hann býður hlustandanum upp á afar spennandi ferðalag á sinni nýju sólóplötu, Dissonance sem dómnefnd segir bæði heillandi og sterka i umsögn sinni.

Víkingur Heiðar Ólafsson hlaut tvenn verðlaun í flokki sígildrar og samtímatónlistar. Hann fékk verðlaun fyrir tónlistarviðburð ársins fyrir tónleika sína í Eldborg með verkum Philip Glass en auk þess var Víkingur valinn tónlistarflytjandi ársins. Söngvarar ársins í flokki sígildrar og samtímatónlistar voru þau Ólafur Kjartan Sigurðarson og Dísella Lárusdóttir. Ólafur Kjartan var verðlaunaður fyrir skarpa og kraftmikla túlkun á illmenninu Scarpia í Toscu en Dísella fyrir glæsilega einsöngstónleika á Reykholtshátíð þar sem efnisskráin spannaði hin gullnu ár ljóðatónlistar og var sett saman af miklu innsæi.

Hljómsveitin Annes átti plötu ársins, Frost, í flokki djass og blústónlistar en sveitin átti einnig tvær tilnefndar tónsmíðar í flokki tónverka ársins en það kom þó ekki í þeirra hlut að krækja í þau að þessu sinni. Tónverk ársins var valið Pétur og úlfurinn…en hvað varð um úlfinn? eftir Hauk Gröndal en um er að ræða fræðandi og skemmtilegt verk í flutningi Góa og Stórsveitar Reykjavíkur. Lagahöfundur ársins var valinn Sigurður Flosason fyrir tónlist sína á plötunni Green Moss Black Sand sem hefur vakið verðskuldaða athygli. Eyþór Gunnarsson hlaut verðlaun sem tónlistarflytjandi ársins í flokki djass og blús en hann hefur verið einn helsti píanó- og hljómborðsleikari íslenskrar hryntónlistar í tæpa fjóra áratugi.

Freyjujazz var valinn tónlistarviðburður ársins í flokki djass og blús en tónleikaröðin hóf göngu sína í Listasafni Íslands í byrjun árs 2017 og voru haldnir alls 26 tónleikar á árinu. Markmið Freyjujazz er að gera konur sýnilegri í djassi auk þess að skapa vettvang fyrir djasskonur að koma fram og þannig ýta undir aukið samstarf kynjanna.

Björtustu vonirnar

Bjartasta vonin í poppi, rokki, rappi og raf var tilnefnd af starfsfólki Rásar 2 eins og undanfarin ár. Kosning fór fram á vef Rásar 2. Það var hljómsveitin Between Mountains sem hlaut verðlaunin í ár en sveitina skipa tvær sextán og sautján ára stelpur frá Vestfjörðum – þær Katla Vigdís Vernharðsdóttir og Ásrós Helga Guðmundsdóttir. Between Mountains vakti m.a. áhuga Rolling Stone á Iceland Airwaves í haust sem sagði hljómsveitina eina af þeim áhugaverðustu á hátíðinni.

Bjartasta vonin í flokki djass og blús var valinn af dómnefnd og það er Baldvin Snær Hlynsson píanóleikari sem hlýtur heiðurinn í ár. Baldvin Snær Hlynsson varð tvítugur á árinu og fagnaði því meðal annars með því að gefa út aðra sólóskífu sína sem hann kallar Renewal. Þrátt fyrir ungan aldur er með sanni hægt að segja að Baldvin hefur nánast fullmótaðan stíl, sér í lagi þegar kemur að tónsmíðum. Hann hefur lag á að semja tónlist sem er í senn krefjandi og áferðarfalleg

Bjartasta vonin í sígildri og samtímatónlist er Barítónsöngvarinn Jóhann Kristinsson. Jóhann Kristinsson steig fram fullþroska listamaður á sínum fyrstu opinberu einsöngstónleikum ásamt píanóleikaranum Ammiels Bushakevitz á liðnu ári þar sem verk Robert Schumann og Gustav Mahler fylltu efnisskrána og óhætt er að segja að Jóhann hafi heillað áheyrendur upp úr skónum með sinni frábæru rödd og hreint magnaðri túlkun. Frábær frammistaða sem er vísir á enn frekari afrek á tónlistarsviðinu.

Heiðursverðlaun

Að þessu sinni var röðin komin að sjálfum Stuðmönnum að hljóta heiðursverðlaun Samtóns en mennta og menningarmálaráðherra Lilja Alfreðsdóttir veitti Stuðmönnum verðlaunin en þessi merka hljómsveit sem tók sín fyrstu skref árið 1970 í nýstofnuðum menntaskóla í Hlíðunum sló einnig botninn í útsendingu kvöldsins – lokuðu sjóinu eins og Stuðmönnum er einum lagið með pompi og prakt. Stuðmenn hafa veitt þjóðinni ómælda gleði með grípandi söngvum og textum á löngum ferli. Meðlimir Stuðmanna, fyrr og síðar, hljómsveitar allra landsmanna, eru sannir og verðskuldaðir heiðursverðlaunahafar Íslensku tónlistarverðlaunanna.

Fram komu

Dóri DNA var kynnir kvöldsins og skemmtiatriði á Íslensku tónlistarverðlaununum í ár voru fjölbreytt sem og endranær. Fram komu  á hátíðinni: Freyjudjass, Cell7, Birgir, JóiPé X Króli, Dísella Lárusdóttir og Bjarni Frímann, Snorri Helga, Vök og Stuðmenn.

– – –

Alls voru veitt 36 verðlaun en það er Samtónn sem stendur að baki Íslensku tónlistarverðlaununum. Að baki Samtón standa FÍH, FHF, STEF, SFS, FTT og Tónskáldafélag Íslands, Tilgangur Samtóns er að vinna að sameiginlegum hagsmunum og styrkja stöðu höfunda, flytjenda, framleiðenda og annarra rétthafa að tónlist. Samtónn kemur fram sameiginlega fyrir hönd íslenskra rétthafa og tónlistarfólks.

Stjórn Íslensku tónlistarverðlaunanna skipa Margrét Eir og Jóhann Ágúst Jóhannsson

– – –

Sérstakar þakkir frá Íslensku tónlistarverðlaunum fá:

Concept Events, Rúv, Harpa, Lúxor og allir þeir sem komu fram á hátíðinni og lögðu hönd á plóginn á einn eða annan hátt

– – –

Íslensku tónlistarverðlaunin  – Verðlaunahafar og flokkar

 

Opinn Flokkur / Þjóðlagatónlist / Kvikmynda- og leikhústónlist

Plata ársins – Þjóðlagatónlist
Snorri Helgason – Margt býr í þokunni

Plata ársins – Opinn flokkur
Valgeir Sigurðsson – Dissonance

Plata ársins í Kvikmynda- og leikhústónlist
Daníel Bjarnason – Undir trénu

Lag ársins/Tónverk ársins í Opnum flokki
Hósen Gósen eftir Egil Ólafsson og Sigurð Bjólu

Plötuumslag ársins
Margt býr í þokunni – Snorri Helgason – Hönnuðir umslags: Þrándur Þórarinsson myndskreytti en uppsetningu og umbrot gerði Björn Þór Björnsson

Djass og blús

Plata ársins
Annes – Frost

Tónverk ársins
Pétur og úlfurinn…en hvað varð um úlfinn? eftir Haukur Gröndal: Í flutningi Góa og Stórsveitar Reykjavíkur.

Lagahöfundur ársins
Sigurður Flosason

Tónlistarflytjandi
Eyþór Gunnarsson

Tónlistarviðburður ársins
Freyjujazz

Bjartasta vonin
Baldvin Snær Hlynsson

Sígild- og samtímatónlist

Plata ársins
Recurrence – Sinfóníuhljómsveit Íslands undir stjórn Daníels Bjarnasonar.

Tónverk ársins
Brothers eftir Daníel Bjarnason

Söngvari ársins
Ólafur Kjartan Sigurðarson

Söngkona ársins
Dísella Lárusdóttir

Tónlistarflytjandi ársins
Víkingur Heiðar Ólafsson

Tónlistarviðburður ársins
Víkingur Heiðar Ólafsson fyrir tónleika í Eldborg með verkum Philip Glass

Bjartasta vonin
Jóhann Kristinsson 

Popp, Rokk, Raftónlist, Rapp og HipHop

Plata ársins í Rapp og hip hop
Joey Christ – Joey

Plata ársins í Rokk
Mammút – Kinder Versions

Plata ársins í Poppi
Nýdönsk – Á plánetunni jörð

Plata ársins í Raftónlist
Vök – Figure

Söngvari ársins
Daníel Ágúst Haraldsson

Söngkona ársins
Katrína Mogensen

Lag ársins í rokki
Breathe Into Me – Mammút

Lag ársins í poppi
Stundum – Nýdönsk

Lag ársins í rappi
Joey Cypher – Joey Christ (ft. Herra Hnetusmjör, Birnir, Aron Can)

Lag ársins í raftónlist
I´d Love – Auður

Lagahöfundur ársins
Moses Hightower

Textahöfundur ársins
Björn Jörundur/Daníel Ágúst

Tónlistarviðburðir ársins
Gloomy Holiday í Hörpu

Tónlistarflytjandi ársins
JóiPé og Króli

Bjartasta von Rásar 2
Between Mountains

Tónlistarmyndband ársins – Veitt í samstarfi við Albumm.is
Auður – I’d Love / Myndband: Auður og Ágúst Elí.

Heiðursverðlaun og sérstök verðlaun Samtóns og Íslensku tónlistarverðlaunanna

Heiðursverðlaun Samtóns
Stuðmenn

Sérstök viðurkenning Samtóns og Íslensku tónlistarverðlaunanna
Daníel Bjarnason

 

Tilnefningar ásamt rökstuðningi dómnefnda

By | Fréttir | No Comments

Tilnefningar til Íslensku tónlistarverðlaunanna 2017 voru kynntar fyrir helgi að viðstöddu fjölmenni á Bryggjunni brugghúsi. Hér má finna lista með tilnefningum ársins ásamt rökstuðningi dómnefnda.

 

Djass og blús

 

PLATA ÁRSINS

Marína og Mikael – Beint heim

Einlæg og ljúf plata. Falleg og tær rödd Marínu fellur vel við litríkan meðleik Mikaels.

Sigurður Flosason – Green Moss Black Sand

Fjölbreyttar lagasmíðar sem mynda sterka heild.
Skemmtilegur söguþráður í gegnum alla plötuna sem er studdur af frábærum hljóðfæraleik.

Ólafur Jónsson – Tími til kominn

Ber nafn við hæfi. Frjálslegar og hefðbundnar lagasmíðar sem unun er að hlýða á.

Annes – Frost

Önnur plata jazzkvintettsins Annes er nýstárleg, skemmtileg skil milli fortíðar og nútíðar. Valinn maður í hverju rúmi og spennandi tónsmíðar.

Tómas Ragnar Einarsson – Innst inni

Hugljúfar tónsmíðar Tómasar njóta sín vel í næmum samleik þeirra Tómasar og Eyþórs.

 

TÓNVERK ÁRSINS

Trump – Guðmundur Pétursson

Eldfjörugt verk sem kemur sífellt á óvart í fjölbreytni sinni.

Pétur og úlfurinn…en hvað varð um úlfinn? – Haukur Gröndal

Fræðandi og stórskemmtilegt verk í flutningi Góa og Stórsveitar Reykjavíkur.

Þúst – Jóel Pálsson

Vel uppbyggð og seiðandi tónsmíð.

Serenading the moon – Sigurður Flosason

Frábært samspil einkennir þessa lagasmíð sem er léttleikandi með þungri undiröldu.

Tími til kominn – Ólafur Jónsson

Hefðbundinn jazzópus sem einkennist af spilagleði og góðri sveiflu.

 

LAGAHÖFUNDUR ÁRSINS – DJASS OG BLÚS

Tómas Ragnar Einarsson

Er eitt afkastamesta tónskáld í íslenskri jazzmúsík. Tónsmíðar Tómasar á plötunni „Innst inni” eru bæði hrífandi og draumkenndar.

Ólafur Jónsson

Með plötunni „Tími til kominn” stimplar Ólafur Jónsson sig inn sem lagahöfundur með glæsilegum tónsmíðum á sviði jazztónlistar.

Sigurður Flosason

Sýnir enn og aftur hæfileika sína sem jazztónskáld á nýjustu plötunni „Green Moss Black Sand”.

 

TÓNLISTARFLYTJANDI – DJASS OG BLÚS

Sunna Gunnlaugs

Píanistinn Sunna Gunnlaugs kom fram á tónleikum víða um heim á árinu 2017.
Sunna ýtti einnig úr vör tónleikaviðburðinum Freyjujazz og lék þar með þýska bassaleikaranum Eva Kruse, norska trompetleikaranum Hildegunn Øiseth, ungverska fiðlaranum Luca Kézdy, Rósu Guðrúnu Sveinsdóttur baritónsaxófónleikara, Ingrid Örk Kjartansdóttur söngkonu og flutti tónlist eftir Magnús Eiríksson ásamt Leifi Gunnarssyni.

Haukur Gröndal

Haukur Gröndal tónsmiður, hljóðfæraleikari og útsetjari hefur lyft grettistaki í kynningu á jazztónlist á árinu með útgáfu á tónlistarævintýrinu “Pétur og úlfurinn…..en hvað varð um úlfinn?” og öðrum verkefnum þar sem barnamenning er í fyrirrúmi.

Ólafur Jónsson

Ólafur Jónsson hefur starfað sem saxófónleikari í aldarfjórðung. Hann hefur starfað með Stórsveit Reykjavíkur frá árinu 1994 og jafnframt með mörgum af fremstu tónlistarmönnum landsins; Sinfóníuhljómsveit Íslands, á tónleikum og í upptökum, leikið í fjölda leiksýninga og inn á rúmlega 30 hljómdiska þar sem allskonar tónlist hefur skotið upp kollinum, djass, popp, rokk og klassík.

Eyþór Gunnarsson

Eyþór Gunnarsson hefur verið einn helsti píanó- og hljómborðsleikari í íslenskri hryntónlist í tæpa fjóra áratugi. Eyþór hefur leikið inn á ýmsar plötur á árinu (m.a. Annes, Egill Ólafsson, Ólafur Jónsson og Tómas R.) og staðið ásamt Mezzoforte félögum sínum fyrir áhrifamiklum tónleikum í Háskólabíói.

Sigurður Flosason

Sigurður Flosason hefur verið í forsvari fyrir íslenskan jazz áratugum saman.
Hann gaf út plötuna Green Moss Black Sand sem fengið hefur afburða dóma í erlendum miðlum. Stjórnaði Stórsveit Reykjavíkur á eftirminnilegum tónleikum s.s Ella Fitzgerald 100 ára og Gullöld sveiflunnar. Kom auk þess fram á ótal öðrum tónleikum.

 

TÓNLISTARVIÐBURÐUR ÁRSINS

Sumarjazztónleikaröð Jómfrúarinnar

Jómfrúin hefur í 22 ár staðið fyrir Jazztónleikaröð á sumri hverju sem alla tíð hefur verið ókeypis fyrir borgarbúa og landsmenn alla. Tónleikaröðin var fyrst skipulögð af Einari Scheving en mörg hin síðari ár af Sigurði Flosasyni. Þetta er orðinn fastur punktur í borgarsumrinu fyrir marga. Óþarfi er að nefna að flest allir bestu listamenn landsins hafa komið fram á Jómfrúartorginu og þegar vel viðrar er þetta algjör bongóveisla.

Tónleikaröð Stórsveitar Reykjavíkur

Stórsveit Reykjavíkur hefur alla tíð leitast við að hafa verkefnaval sitt fjölbreytt. Auk nýrrar tónlistar, bæði innlendrar og erlendrar, hefur hljómsveitin flutt sögulegar efnisskrár tengdar einstökum höfundum og hljómsveitum. Árið 2017 var engin undantekning, en haldnir voru átta metnaðarfullir og fjölbreyttir tónleikar.

Múlinn

Jazzklúbburinn Múlinn hefur um árabil verið mikilvægur vettvangur fyrir metnaðarfullar dagskrár íslenskra tónlistarmanna á rytmíska sviðinu. Klúbburinn er á sínu 20. starfsári og var starfsemi hans bæði kraftmikil og blómleg á árinu.

Jazz í hádeginu

Jazz í hádeginu er tónleikaröð sem Borgarbókasafnið hefur staðið fyrir síðan í september 2014. Tónleikaröðin hefur frá upphafi fengið góðar viðtökur og árið 2017 var metár þegar hverjir tónleikarnir á fætur öðrum voru haldnir fyrir troðfullu húsi áhorfenda í sölum sem tóku frá 50-100 manns. Markmið tónleikaraðarinnar Jazz í hádeginu er fyrst og fremst að færa jazzinn út í hverfi borgarinnar þannig að fólk geti notið hans í eigin nærumhverfi.

Freyjujazz

Tónleikaröðin Freyjujazz hóf göngu sína í Listasafni Íslands í byrjun árs 2017 og voru haldnir alls 26 tónleikar á árinu.
Markmið Freyjujazz er að gera konur sýnilegri í jazzi auk þess að skapa vettvang fyrir jazzkonur að koma fram og þannig ýta undir aukið samstarf kynjanna.

 

Opinn flokkur / Þjóðlagatónlist / Leikhús og kvikmyndatónlist

 

PLATA ÁRSINS – ÞJÓÐLAGATÓNLIST

Ösp Eldjárn – Tales from a poplar tree

Tales from a poplar tree er einstaklega vel heppnuð plata. Töfrandi rödd Aspar dregur hlustandann ítrekað að henni. Dramatískar og ljúfsárar melódíur fluttar af frábærum hljóðfæraleikurum fullkomna svo heildarhljóm plötunnar.

Snorri Helgason – Margt býr í þokunni

Margt býr í þokunni er afar vel heppnuð tilraun til að tengja saman nýja tíma og þjóðlagahefð okkar Íslendinga frá fornu fari. Sterkar lagasmíðar, vandaður flutningur og ekki skemmir fyrir hvernig þjóðsögurnar ganga í endurnýjun lífdaga. Afar vönduð plata þar sem nostrað er við hvert smáatriði.

Egill Ólafsson – Fjall

Egill sendir hér frá sér eitt sitt besta verk, Fjall. Hér mætast firnasterkar lagasmíðar og frábærir textar og höfundareinkenni Egils eru allt umlykjandi. Hér má greina minni Þursa og Spilverks á köflum. Söngur, hljóðfæraleikur og hljóðblöndun gerir þetta svo að því listaverki sem platan er.

 

PLATA ÁRSINS – LEIKHÚS OG KVIKMYNDATÓNLIST

Frank Hall – Ég man þig

Kvikmyndin Ég man þig vakti mikla athygli þegar hún var frumsýnd á liðnu ári og hlaut frábærar viðtökur. Þessi spennuþrungna saga hélt áhorfendum föngnum og skipaði tónlist og hljóðheimur Franks Hall þar veigamikið hlutverk. Tónlistin Franks rammar sérlega vel inn hið rafmagnaða andrúmsloft myndarinnar.

Ólafur Arnalds – Broadchurch Final Project

Breska glæpaserían Broadchurch hefur vakið athygli um allan heim og á tónlist Ólafs Arnalds ekki síst þátt í því. Tónlist Ólafs er frábærlega samin og fellur mjög vel að efninu og fangar stemmninguna hverju sinni afar vel.

Arnar Guðjónsson – L’homme Qui Voulait Plonger Sur MarsArnari Guðjónssyni tekst að skapa stemmningu sem fangar hlustandann og ferðast með hann um óravíddir alheimsins. Tónlistin stendur vel sem sjálfstætt verk og er dáleiðandi þar sem hún daðrar við stefnur og strauma í raftónlist síðustu áratuga.

Daníel Bjarnason – Undir trénu

Tónlist Daníels Bjarnasonar við myndina Undir trénu er órjúfanlegur hluti frábærrar kvikmyndar. Tónlistin spannar allt litróf þeirra sterku tilfinninga sem myndin hefur að geyma og eykur á upplifun áhorfenda auk þess sem hún stendur vel sem sjálfstætt tónverk.

 

PLATA ÁRSINS – OPINN FLOKKUR

Þorvaldur Þorsteinsson, Megas og Skúli Sverrisson  – Ósómaljóð

Enn heldur Megas áfram að krydda tónlistarlíf okkar Íslendinga. Að þessu sinni flytur hann Ósómaljóð og lög Þorvaldar Þorsteinssonar heitins skálds með liðsinni Skúla Sverrissonar bassaleikara. Hver perlan á fætur annari hljómar á Ósómaljóðum, flutningur ósæmilegrar sveitar Skúla er nánast óaðfinnanlegur og hljóðheimurinn nýtur sín til fulls. Sönn plata sem hittir í hjartastað.

Hafdís Bjarnadóttir – Já

Einstaklega frumleg og skemmtileg smíð þar sem ægir saman ólíkum þáttum sem mynda saman eina sterka heild. Leikgleðin sem einkennir allan hljóðfæraleik gerir plötuna svo að því fallega og einlæga verki sem hún er.

Epic Rain – Dream Sequences

Hljóðheimur Epic rain er vel unnin og melódíurnar hnitmiðaðar innan um vel ígrundaðan og vandaðan hip-hop hljóminn. Kraftmikil og skemmtileg plata.

Valgeir Sigurðsson – Dissonance

Hinn fjölhæfi tónlistarmaður Valgeir Sigurðsson býður upp á afar spennandi ferðalag á sinni nýju sólóplötu, Dissonance. Akústískum strengjahljóðfærum og raftónlist er blandað saman á afar heillandi hátt. Hér er unnið með stóra fleka en um leið nostrað við smáatriði í hvívetna. Heillandi og sterk plata.

Ásgeir Ásgeirsson – Two sides of Europe

Gítarleikarinn Ásgeir Ágeirsson sameinar hér tvo menningarheima á sinni nýju sólóplötu, íslenskan tónlistararf og tyrkneska tónlist. Ásgeiri tekst listilega að skapa tónlist sem bæði gleður og eykur á forvitni hlustandans og hvetur til frekari hlustunar á þessum ólíku tónlistarstefnum. Frábær plata.

 

LAG ÁRSINS/TÓNVERK ÁRSINS Í OPNUM FLOKKI

Ásgeir Ásgeirsson – Izlanda saz semais

Ásgeir og Yurdal Tokcan ná frábærlega saman í þessu frumsamda lagi en það situr vel innan um íslensku þjóðlögin á plötu Ásgeirs, eins og brú á milli ólíkra heima. Vandað tónverk hvar allur flutningur er til fyrirmyndar.

Hafdís Bjarnadóttir – Tunglsjúkar nætur

Í laginu Tunglsjúkar nætur blandar Hafdís saman upptöku með Hljómeyki og Einari Má að lesa ljóðið sem verkið byggir á. Útkoman er skemmtilegur bræðingur hljóðfæra, söngs og upplesturs.

Þorvaldur Þorsteinsson – Manni endist varla ævin

Einstakt ljóð Þorvaldar Þorsteinssonar heitins og lagasmíð nýtur sín vel hér í flutningi Megasar og útsetningu Skúla Sverrissonar og ósæmilegrar hljómsveitar. Undurfallegri tónsmíð eru hér gerð frábær skil.

Egill Ólafsson – Hósen gósen

Hósen gósen! Á sinni nýjustu sólóplötu, Fjall, stendur Egill Ólafsson á hæsta punkti og horfir yfir lendur Þursa og Spilverks. Gríðarsterkur upptaktur frábærrar plötu kyngi magnaðs söngvara og tónsmiðs.

Borgar Magnason – Epilogue

Epilouge eða eftirspil eftir tónskáldið og kontrabassaleikarann Borgar Magnason er hluti af tónlistinni við Faðirinn, leikrit Florians Zellers sem sett var á svið nú í haust. Kyrrlátt en þó drynjandi niðurlag sem er, eins og viðfangsefni leikritsins, í senn átakanlegt og fallegt.

 

Sígild- og samtímatónlist

 

PLATA ÁRSINS

Víkingur Ólafsson – Philip Glass: Piano Works

Piano Works er fyrsta platan sem Víkingur Heiðar Ólafsson tekur upp fyrir hinn virta útgáfurisa Deutsche Grammophon. Tónlistin er eftir Philip Glass og óhætt er að segja að Víkingur Heiðar geri tónlist Glass afburða skil. Frábær plata í alla staði.

Sinfóníuhljómsveit Íslands – Recurrence

Spennandi og gríðarlega vel unnin plata sem sýnir þverskurð af frábærlega vel skrifuðum hljómsveitarverkum nokkurra okkar fremstu samtímatónskálda. Afar mikilvæg útgáfa og þarft framtak hjá Sinfóníuhljómsveit Íslands.

Nordic Affect – Raindamage

Kammerhópurinn Nordic Affect hefur verið afkastamikill á liðnum árum. Nýjasti diskur þeirra, Raindamage hefur að geyma áhrifaríka raftónlist auk verka fyrir fiðlu, víólu, selló, raddir og sembal. Skýr og heilsteypt listræn sýn og listrænn eldmóður skilar sér í gerð þessa disks sem byggir á og bætir við fyrra samstarf Nordic Affect við tónskáldin. Sendir hlustandann í órætt ferðalag. Frábær vinna – unun að hlusta.

Kammerkór Suðurlands – Kom skapari

Mjög áhugaverður hljómdiskur með fjölbreyttum tónverkum sem voru samin sérstaklega fyrir kórinn. Hér er farin óhefðbundin leið í upptökum á íslenskri kórtónlist þar sem unnið er með stúdíóið og tæknilega möguleika þess sem viðbótarhljóðfæri. Sá hljómur sem sú vinna skapar, ásamt því að platan er afurð óvenjumikillar samvinnu kórs og kórstjóra við hin fjölmörgu tónskáld, gerir plötuna sérlega áhugaverða.

Páll Ragnar Pálsson – Nostalgia

Með þessum diski skipar Páll Ragnar Pálsson sér á afgerandi hátt meðal okkar fremstu tónskálda. Diskurinn gefur einstaka og glæsilega innsýn í hans persónulega stíl og kraftmikla hljóðheim þar sem bæði þrumuröddin og blómhvíslið eiga heima. Allur flutningur og upptaka er til fyrirmyndar.

 

TÓNVERK ÁRSINS

Brothers : ópera – Daníel Bjarnason

Óperan Brothers verður að teljast eitt mesta þrekvirki tónskáldsins til þessa. Áhrifarík saga og sterkar sögupersónur einkenna verkið, kór leikur mikilvægt hlutverk og tónmálið er dramatískt og hrífandi. Verkið er einstaklega vel skrifað fyrir bæði hljómsveit og söngvara. Óperan fékk einróma lof áhorfenda og gagnrýnenda eftir frumflutning verksins í Árósum síðastliðið sumar. Mögnuð frumraun tónskáldsins við óperutónsmíðar.

Fiðlukonsert – Daníel Bjarnason

Í ágúst síðastliðnum frumflutti fiðluleikarinn Pekka Kuusisto nýjan fiðlukonsert Daníels Bjarnasonar ásamt Fílharmóníusveit Los Angeles-borgar undir stjórn Gustavo Dudamel. Kjarnmikill, grípandi og einstaklega blæbrigðaríkur konsert. Gríðarlega fallega spunnin og kraftmikil tónsmíð þar sem einleikshljóðfærið og fiðluleikarinn njóta sín til hins ýtrasta.

Quake – Páll Ragnar Pálsson

Konsertinn er skrifaður fyrir hljómsveit og einleiksselló og var saminn fyrir tónlistarhátíðir í Walt Disney Hall í Los Angeles og Elbphilharmonie í Hamborg. Tónmálið er í senn þroskað og einlægt, en jafnframt ögrandi og kröfuhart; tónmál með glansandi yfirtóna í seiðmögnuðum bræðingi úr óravíddum jarðkringlunnar; hraun jafnt sem fínustu náttúrusteindir kristallast fyrir eyrum hlustanda líkt og í hamfaradraumi. Margrætt verk sem situr í manni löngu eftir að síðasti tónninn deyr út.

Echo Chamber – Haukur Tómasson

Víólukonsert Hauks Tómassonar var frumfluttur á Myrkum músikdögum 2017 af Þórunni Ósk Marínósdóttur og Sinfóníuhljómsveit Íslands undir stjórn Petris Sakari. Í grípandi verkinu vinnur tónskáldið með ýmiss konar bergmálsrými í tónlist á einkar hugvitssamlegan hátt. Echo Chamber er stórbrotin og heillandi tónsmíð.

Moonbow – Gunnar Andreas Kristinsson

Kraftmikið og ágengt verk samið af mikilli kunnáttu og innlifun. Vel skrifaður og spennandi strengjakvartett – meðal þeirra eftirtektarverðustu sem komið hafa frá íslensku tónskáldi á seinni árum.

 

SÖNGVARI ÁRSINS

Ólafur Kjartan Sigurðarson : Fyrir hlutverk Scarpia í Toscu

Skörp og kraftmikil túlkun Ólafs Kjartans á illmenninu Scarpia fékk hárin til að rísa á áhorfendum. Hljómmikil rödd hans og blæbrigðaríkur leikur gerði hlutverkinu einstaklega góð skil.

Jóhann Kristinsson : Fyrir einsöngstónleika í Salnum, Schumann og Mahler

Hljómfögur rödd ásamt einstakri næmni í túlkun á ljóðum Schumanns og Mahlers fékk áheyrendur til að gleyma því að þeir væru staddir á fyrstu opinberu einsöngstónleikum Jóhanns. Frábær frammistaða sem er vísir á enn frekari afrek á tónlistarsviðinu.

Oddur Arnþór Jónsson : Fyrir einsöngstónleika í Salnum, Vetrarferðin

Baritónsöngvarinn Oddur Arnþór bauð áheyrendum upp á safaríka og blæbrigðaríka Vetrarferð. Fallegur flutningur og túlkun á þessum hornsteini ljóðatónlistarinnar.

Kristján Jóhannsson : Fyrir hlutverk Cavaradossis í Toscu

Kristján sem söng hlutverkið í 400. skipti, söng af listfengi, krafti og ósvikinni tilfinningu. Hápunktar söngsins voru í senn ofsafengnir og glæsilegir. Kristján lagði salinn að fótum sér í leik og söng.

 

SÖNGKONA ÁRSINS

Auður Gunnarsdóttir: Fyrir hlutverk sitt sem Elle í Mannsröddinni

Auður gerði hinu krefjandi hlutverki í þessari eins manns óperu Poulencs sérlega góð skil með sinni einstöku raddfegurð og myndaði spennandi andstæðu við sitt talandi sjálf. Afar eftirminnileg frammistaða.

Sigríður Ósk Kristjánsdóttir : Fyrir einsöngstónleika í tónleikaröðinni Kúnstpása

Sigríður Ósk bauð áheyrendum upp á fjölbreytta efnisskrá á Kúnstpásutónleikum Íslensku Óperunnar. Músíkölsk túlkun, tæknileg færni og einstök raddfegurð einkenndu þessa eftirminnilegu tónleika þar sem hæfileikar Sigríðar nutu sín til fulls.

Dísella Lárusdóttir : Fyrir einsöngstónleika á Reykholtshátíð

Efnisskrá einsöngstónleika Dísellu á Reykholtshátíð spannaði hin gullnu ár ljóðatónlistarinnar og var sett saman af miklu innsæi. Tónlistarflutningurinn einkenndist af einstakri blöndu af glæsileik og kátínu. Nákvæmur, unggæðingslegur raddhljómur Dísellu og fullkomin raddtækni, ásamt snilldarlegri nálgun í hendingar- og formmótun einkenndi flutninginn svo unun var á að hlýða.

Bylgja Dís Gunnarsdóttir : Fyrir einsöngstónleika í tónleikaröðinni Klassík í Vatnsmýrinni

Bylgja Dís frumflutti á Íslandi, ásamt Hrönn Þráinsdóttur píanóleikara, einn mest spennandi ljóðaflokk síðustu ára, Mr. Tambourine Man eftir bandaríska tónskáldið John Corigliano við texta Bob Dylans. Ljóðaflokkurinn gerir miklar kröfur til flytjenda og er óhætt að fullyrða að Bylgja Dís hafi staðið undir því og gott betur. Magnaður flutningur á sérlega eftirtektarverðum ljóðaflokki.

 

TÓNLISTARFLYTJANDI ÁRSINS

Víkingur Heiðar Ólafsson fyrir glæsilegt og yfirgripsmikið tónleikahald á árinu 2017

Víkingur Heiðar lék á fjölmörgum tónleikum víða um heim á liðnu ári og hlaut hvarvetna mikið lof gagnrýnenda. Hér heima eru tónleikar hans með verkum Philips Glass í Eldborg einkar eftirminnilegir sem og túlkun hans á c-moll konsert Mozarts með Sinfóníuhljómsveit Íslands og Dima Slobodeniouk. Þá frumflutti Víkingur nýjan píanókonsert Hauks Tómassonar með NDR Elbfílharmóníunni í Hamborg og Los Angeles-fílharmóníunni undir stjórn Esa-Pekka Salonen. Hann kom einnig fram á tónlistarhátíðinni Reykjavík Midsummer Music sem fram fór í Hörpu í júní en Víkingur er þar listrænn stjórnandi.

Barokkbandið Brák fyrir tónlistarflutning á árinu 2017 en hljómsveitin hélt samtals sex tónleika á síðastliðnu ári.

Barokkbandið Brák var bæði iðið og einbeitt við köllun sína á árinu, að flytja áheyrendum fágæta barokktónlist í hágæða upprunaflutningi. Sveitin hélt alls sex tónleika í Reykjavík og Skálholti sem voru allir hljóðritaðir af Ríkisútvarpinu. Þrátt fyrir stuttan starfsaldur hefur þessi barokksveit náð aðdáunarverðum hæðum og sýnt kjark í verkefnavali, til að mynda á tónleikum sveitarinnar í Norðurljósasal Hörpu í desember þar sem allir Concerti Armonici eftir Unico Willem van Wassenaer voru fluttir á einum tónleikum.

Ægisif og Hafsteinn Þórólfsson einsöngvari fyrir flutning á Litúrgíu heilags John Chrisostom eftir Sergei Rakmaninov undir stjórn Hreiðars Inga Þorsteinssonar.

Söngsveitin Ægisif hefur vakið verðskuldaða athygli á stuttum ferli fyrir frábæran flutning á eftirtektarverðu efnisvali undir stjórn Hreiðars Inga Þorsteinssonar. Stjórnandinn vinnur með austur- evrópska fagurfræði og nálgun í kórsöng og vefur inn í kórhljóminn. Flutningurinn á verki Rakmaninovs ber þessu frábæran vitnisburð. Einsöngvari Hafsteinn Þórólfsson.

Bjarni Frímann Bjarnason fyrir hljómsveitarstjórn í uppfærslu Íslensku óperunnar á Toscu eftir Giacomo Puccini.

Bjarni Frímann þreytti frumraun sína hjá Íslensku óperunni þegar Tosca var sett á svið síðastliðið haust. Óhætt er að segja að Bjarni Frímann hafi, að öðrum ólöstuðum, verið stjarna þessarar sýningar. Hljómsveitin lék tónlist Puccinis frábærlega undir styrki hljómsveitarstjórn hins unga og hæfileikaríka hljómsveitarstjóra.

Stefán Ragnar Höskuldsson fyrir flautuleik í flautukonsert Iberts með Sinfóníuhljómsveit Íslands

Stefán Ragnar hefur fest sig í sessi sem einn allra fremsti þverflautuleikari heims á liðnum árum. Stefán, sem var nýlega ráðinn sólóflautuleikari Chicago-sinfóníunnar, lék konsert Iberts af aðdáunarverðu listfengi, þar sem tækni, tónn og næmi fyrir tónlistinni sameinuðust. Hreint út sagt frábær flutningur hjá afburða tónlistarmanni.

 

TÓNLISTARVIÐBURÐUR ÁRSINS

Víkingur spilar Philip Glass

útgáfutónleikar Einn eftirminnilegasti tónlistarviðburður ársins 2017 voru útgáfutónleikar Víkings Heiðars Ólafssonar í Eldborgarsal Hörpu þar sem hann lék etýður Philips Glass af því tilefni að tónskáldið stóð á sjötugu. Snilldartök Víkings á verkefninu og látlaust spjall hans um verkin skapaði magnaða stemningu sem seint gleymist.

Purcell í norrænu ljósi – Cantoque Ensemble, Camerata Öresund og Höör Barock, undir leiðsögn fiðluleikarans og barokksérfræðingsins Peter Spissky

Hinn nýstofnaði sönghópur Cantoque Ensemble bauð upp á barokkveislu ásamt Camerata Öresund og Höör Barock á Sumartónleikum í Skálholti. Sjaldheyrð tónlist eftir Henry Purcell var leikin af fádæma fagmennsku og leikgleði og voru viðtökurnar eftir því. Frábærir tónleikar sem líða áheyrendum seint úr minni.

LA / Reykjavík – Sinfóníutónleikar 5. október 2017

Á efnisskrá LA/Reykjavík, tónleika Sinfóníuhljómsveitar Íslands, voru tvö stór hljómsveitarverk sem eiga rætur að rekja í fjölskrúðugt tónlistarlíf Los Angeles-borgar, enda báru tónleikarnir með sér tilvísun í tónlistarhátíðina Reykjavík Festival sem Fílharmóníusveit Los Angeles hélt þar í borg á síðasta ári. Fiðluleikarinn Leila Josefowicz lék Scheherezade 2 eftir John Adams af mikilli snilld og Hamrahlíðarkórarnir létu Sálmasinfóníu Stravinskís hljóma eins sakleysislega og tónskáldið hafði séð fyrir sér. Frábærir tónleikar í alla staði.

TOSCA

Uppfærsla Íslensku óperunnar á Toscu eftir Puccini var sérlega vel heppnuð. Frábær hljómsveit, einsöngvarar og kór runnu saman í afar sannfærandi heild. Sögusviðið var fært nær nútímanum sem gekk sérlega vel upp með búningum og leikmynd og sviðslausnir voru vel úthugsaðar. Ein sterkasta uppfærsla Íslensku óperunnar á síðustu árum.

Schumann & Mahler: Tíbrá Tónleikaröð – Ljóðatónleikar Jóhanns Kristinssonar og Ammiel Bushakevitz

Á þessum fyrstu opinberu einsöngstónleikum Jóhanns Kristinssonar flutti hann ljóð eftir Schumann og Mahler ásamt hinum margverðlaunaða píanóleikara Ammiel Bushakevitz. Blæbrigðarík túlkun beggja listamanna gerði þessa ljóðatónleika að einstakri upplifun þeirra sem á hlýddu.

 

Rokk, popp, raf, rapp og hip hop

 

PLATA ÁRSINS – RAPP OG HIP HOP

Aron Can – Í nótt

Platan Í nótt er önnur plata Arons Can á tveimur árum og tikkar í flestöll þau box sem hin „erfiða“ plata númer tvö á að gera. Utan að tónlistarlega er hún einkar farsæl. Textarnir eru lengri og flóknari en á frumburðinum, algjörar efasemdir í bland við ungæðislega ákveðni. Þversagnarkenndur hræringur og eitt af mörgu sem er heillandi við þennan hæfileikararíka pilt.

Alvia – Elegant Hoe

Draugalegt, dulmagnað flæði, letilegir taktar og nett sýrðar hljóðmottur undir. Alvia er engri lík þar sem hún rappar á kynþokkafullan, hvíslandi hátt, er ertandi og stríðandi en um leið gamansöm og flippuð. Einstök sýn listakonunnar vekur svo sannarlega eftirtekt.

Joey Christ – Joey

Joey Christ hafði lengi verið á kantinum í íslensku hipphoppi, stuðningsaðili sér frægari aðila en hér brýst hann fram einn og sviptir upp heljarinnar hipphoppveislu og fær góða og gegna vini til að hjálpa sér við fjörugt atið.

Hr. Hnetusmjör – KÓPBOI

Sonur Kópavogs hefur verið að byggja upp aðdáendahóp með kraftmiklum tónleikum og myndböndum og seint á síðasta ári gaf hann út plötu til að undirstinga þann árangur. Vaxandi stjarna sem er til alls líklegur á þessu ári.

Jói Pé og Króli – Gerviglingur

Þeir félagar ruddust óvænt inn á sviðið á þessu ári: Kornungir, sjarmerandi og helferskir. Tónlistin hérna er einlæg og ástríðufull, skemmtileg og ber með sér heilnæmt „Hei, gerum þetta bara!“ viðhorf. Gerviglingur er sönn og náttúruleg, plata sem er bara gerð einu sinni.

Cyber – Horror

Helsvalt og valdeflandi femínistarapp þar sem engin grið eru gefin frá fyrsta tóni. Heildaráran er skuggaleg og súrrealísk, lög eins og „Horfa“ líða um í valíumgufu og „Skríða“ býr yfir ógnvekjandi andrúmslofti. Íslenskt jaðar-hipphopp eins og það gerist best.

 

PLATA ÁRSINS – ROKK

LEGEND – Midnight Champion

Mögnuð, rafbundin rokkplata runnin undan ranni Halldóri og Krumma, sem stundum er kenndur við Mínus. Heilsteypt og einkar sannfærandi, unnin af tilfinnanlegri einlægni og innlifun. Epískt verk í raun, sem skírskotar í gotneska tónlist níunda áratugarins og iðnaðartónlist þess tíunda en framborin á séríslenskan máta engu að síður.

Sólstafir – Berdreyminn

Vörpulegt verk frá Sólstöfum. Sveitin heldur áfram að þróast á Berdreyminn, þessi fyrrum svartþungarokkssveit á erfitt með að standa kyrr og píanó, kórar og blíðar söngmelódíur styðja vel við einstaka sýn þessarar farsælu sveitar

HAM – Söngvar um helvíti mannanna

Söngvar um helvíti mannanna með HAM er straumlínulagaðra verk en síðasta hljóðversplata en viðheldur þeirri rokksköddun sem þessi besta hljómsveit í heimi er landskunn fyrir. Drungi og dulmögnun víkja fyrir hreinskiptni og hráleika.

Mammút – Kinder Versions

Kinder Versions er fjórða breiðskífa Mammút og sú fyrsta sem sveitin gefur út í gegnum hina öflugu útgáfu Bella Union. Þetta er verk sem þarf að vinna fyrir, blær níunda áratugarins svífur yfir vötnum og undiraldan þung. Melódía og grúv er þó í umvörpum og Katrína Mogensen á sannkallaðan stjörnuleik í söng.

ROFOROFO – ROFOROFO

Einn óvæntasti gleðigjafi síðasta árs. Plata þessi sleppur skemmtilega undan skilgreiningum, það blasir ekkert við. Ómar Guðjónsson skipar sveitina ásamt Tommy Baldu og er með rætur í djassi en plata þessi er góð birtingarmynd á því stílaflökti sem Ómar hefur alla tíð stundað.

 

PLATA ÁRSINS – POPP

Kiriyama Family – Waiting For…

Vandað og vel unnið popp. Þroskaðar lagasmíðar sem fluttar eru af mikilli fagmennsku þar sem gælt er við hljóðheim níunda áratugarins með góðum árangri. Söngkonan Hulda Kristín Kolbrúnardóttir er ein sú áhugaverðasta af yngri kynslóðinni.

JFDR – Brazil

Jófríður Ákadóttir er vel þekkt í íslensku tónlistarlífi fyrir störf sín með hljómsveitunum Samaris og Pascal Pinon. Brazil er fyrsta sólóverkefni Jófríðar en á plötunni er lágstemmd angurværð dregin fram með fáguðum lagasmíðum og útsetningum.

Björk – Utopia

Platan er hlý og hamingjurík en um leið meðvitað á jaðrinum, tónlistarlega. Hún deilir sama drama og var á síðasta verki um leið og hún stillir upp andstæðum, viðkvæmri fegurð og grimmilegum hroða. Það gerir engin tónlist eins og Björk Guðmundsdóttir.

Moses Hightower – Fjallaloft

Eitursvalt en um leið angurvært jazz-skotið popp með fönk hjartslætti. Moses-mönnum vex ásmegin með hverri plötu og virðast ávallt óhræddir við að fara í ýmsar áttir í sinni listsköpun. Raddsamsetningar Steingríms Teague og Andra Ólafssonar hljóma eins og einn og sami maðurinn. Tvíhöfða bræðingsbjörn sem dáleiðir hlustandann.

Högni – Two Trains

Tilkomumikil og djúp tónlist, með skírskotun í nútímatónlist og utangarðslistir. Með þessari fyrstu sólóplötu sinni stimplar Högni sig inn svo um munar og ekki tilviljun að verkið var tilnefnt til Norrænu tónlistarverðlaunanna.

Nýdönsk – Á plánetunni jörð.

Ein besta plata Nýdanskra í mörg ár. Frábærar popp lagasmíðar með textum Björns Jörundar sem lyfta andanum sem aldrei fyrr. Nýdönsk sanna það að þeir eru óumdeilanlegt náttúruafl í íslensku poppi.

 

PLATA ÁRSINS – RAFTÓNLIST

Vök – Figure

Hljómsveitin Vök finnur fótum sínum glæsilega forráð á þessari feykisvölu en umfram allt fumlausu plötu. Heilsteypt og einkar sannfærandi verk þar sem auðugum hljóðheimi raftónlistarinnar er stefnt saman við aðgengilegar laglínur og góðar lagasmíðar.

Auður – Alone

Dúnmjúk sálartónlist af nýja skólanum þar sem löngunarfullum, ástríkum textum er fundinn farvegur í tilraunakenndum samruna rytma og raftónlistar. Platan rúllar í þægilegum innilokunarkenndarham og Auður vinnur afskaplega vel með þagnir og stemningu. Innblásinn flutningur gerir Alone að einkar stæðilegu verki.

Kiasmos – Blurred

Þeir félagar Ólafur Arnalds og Janus Rasmussen hafa stýrt Kiasmos-fleyi sínu af mikilli farsæld undanfarin ár og vakið eftirtekt bæði hér heima og erlendis. Á plötunni Blurred hnykkja þeir enn frekar á mætti sínum og megin en á ferðinni er hljómrík og einkar svöl raftónlist

 

SÖNGVARI ÁRSINS – VERÐLAUN ÞVERT Á FLOKKA

Daníel Ágúst

Daníel hefur verið ein flottasta rödd Íslands í áratugi. Hann sýnir það og sannar að hann er í toppformi og hefur sjaldan hljómað betur. Röddin fyllir vel út í rýmið og hann með sínum afslappaða hljómi lætur mann trúa því sem hann segir á nýjustu plötu Nýdanskra.

Krummi Björgvinsson

Krummi kemur sterkur til leiks á plötu LEGEND og sýnir enn og aftur að hann er hörku rokksöngvari. Platan er heilsteypt og sannfærandi og á Krummi mjög stóran þátt í því að skapa stemmninguna á plötunni með röddinni og öllum hennar blæbrigðum.

Steingrímur Teague

Steingrímur hefur skemmtilegan sjarma og fallegan hljóm í röddinni. Einstök rödd sem nýtur sín vel í þessari kraftmiklu hljómsveit, Moses Hightower. Heyrist um leið hver syngur sem er draumur hvers söngvara. Flottur fílingur sem smitar útfrá sér

Kristinn Óli (Króli)

Kristinn Óli ásamt félaga sínum JóaPé komu eins og stormsveipur í íslenskt tónlistarlíf með einu vinsælasta lagi ársins B.O.B.A. Þarna kemur Króli skemmtilega fram sem rappari, söngvari, laga og textasmiður. Ferskur andblær í rappið og einlægnin skín í gegn og unun á að hlýða

Auður

Með sinni silkimjúku rödd og flottum R’n’B hljómi kemur Auður með ferskan blæ í íslenska tónlist. Góð túlkun á ástríðufullum textum. Flott og eftirtektarverð rödd sem gaman verður að fylgjast með þroskast og dafna.

 

SÖNGKONA ÁRSINS – VERÐLAUN ÞVERT Á FLOKKA

Katrína Mogensen

Ein áhugaverðasta íslenska söngkona landsins undanfarin ár. Með hverju árinu í starfi sínu með hljómsveitinni Mammút hefur Katrína styrkt stöðu sína sem einn af kyndilberum íslenskra söngkvenna af yngri kynslóðinni.

Dísa

Dísa Jakobs sjarmeraði landsmenn upp úr skónum á árinu og nú sem söngkona hinna síungu Stuðmanna. Dísa hefur í senn svo undurblíða rödd og þétta að hrein unun er að hlýða á. Söngkona sem fær hjörtun til að slá örar.

Margrét Rán

Margrét Rán sýnir hér enn og aftur hversu eitursvöl hún er í hlutverki söngkonu og lagahöfundar. Hljómur raddarinnar er afar heillandi, fínlegur og dreyminn jafnt á upptökum og í lifandi flutningi um heim allan með hljómsveitinni Vök

Svala

Svala Björgvins gekk í endurnýjun lífdaga meðal Íslendinga á liðnu ári. Engin efaðist um hæfileikana en ekki allir sem áttuðu sig á þeim. Hennar fagmannlegu vinnubrögð og frammistaða á árinu setja hana á stall með okkar bestu söngkonum.

Una Stef

Frábær söngkona og lagahöfundur sem loksins er að brjótast út í íslensku tónlistarlífi svo um munar. Röddin seiðandi og sálarfull. Hæfileikar hennar eru slíkir að það kæmi engum á óvart að hún kæmist út fyrir litla Ísland með sína tónlist og flutning.

 

LAG ÁRSINS – ROKK

Þú lýgur – HAM

Það er ótrúlegt að hljómsveit sem lögð var í dvala í áratugi snúi aftur betri en aldrei fyrr. HAM áttu ótrúlega spretti á plötunni Svik, Harmur og dauði og enn og aftur toppa þeir sig á söngvar um helvíti mannanna. Epísk lög og magnaðir textar hafa löngum einkennt HAM og það heyrist vel í Þú lýgur.

Midnight Champion LEGEND

Titilag nýjustu plötu LEGEND sem að fylgir eftir Fearless frá árinu 2012. Hljóðheimurinn er sem fyrr dimmur og rafrænn og greinilegt að Legend hafa náð gríðargóðum tökum á forminu. Lagið er seiðandi, rúllar áfram og eykur kraftinn þegar á líður. Söngur Krumma Björgvinssonar ber Midnight Champion uppí hæstu hæðir.

Breathe Into Me – Mammút

Fyrsta smáskífan af plötunni Kinder Versions sló í gegn öldum ljósvakans. Lag og plata gerð til að auka hróður Mammút utan landssteinana. Þetta er töff, töff er gott.

Take Me Back – Roforofo

Óvæntasta ánægja ársins var samnefnd plata Roforofo. Þeir Ómar Guðjónsson og Tommy Baldu galdra þar fram seyð sem erfitt er að pinna niður, er þetta rokk eða er þetta rokkaður djass? Skiptir ekki máli, tónlistin er góð, og aldrei eins og í þessu skothelda lagi.

Alpha Dog – Pink Street Boys

Rokk þarf ekki að vera flókið, það vita æringjarnir í Pink Street Boys. Hér er draugur MC5 og Stooges endurvakinn á áhrifaríkan hátt, þetta er drullugt, hrátt og sveitt – einfalt og hittir alla rokkara beint í hjartastað.

Bergmál – Dimma

Vinsælasta útvarpslag plötunnar Eldrauna og afar vinsælt tónleikalag. Dimma á hug og hjörtu aðdáenda sinna og hafa með miklum dugnaði orðið ein allra vinsælasta rokksveit landsins

 

LAG ÁRSINS – POPP

Stundum – Nýdönsk

Sjúklega svalt lag og svo flókið í sínum einfaldleika. Rödd Daníels, textinn og frábær strengjaútsetning gera þetta lag eitt af þeim bestu sem Nýdönsk hefur sent frá sér.

Blow My Mind – Védís

Dillandi og vel útfærð laglína í bland við sérlega vel heppnaða útsetningu gerir Blow Your Mind að einu af þessum lögum sem festast við hugann og skilgreina tímabil. Védís er hér í toppformi, rödd hennar og túlkun hafa aldrei verið betri.

Hvað með það – Daði Freyr & Gagnamagnið

Daði Freyr söng sig inn í hug og hjörtu Íslendinga í Söngvakeppni sjónvarpsstöðvanna á síðasta ári með laginu Hvað með það. Lagið er sérlega vel samið popplag með skemmtilegum grípandi laglínum sem auðvelt er að syngja með. Útsetning er til fyrirmyndar.

Fjallaloft- Moses Hightower

Moses Hightower í sínu besta formi. Útsetningin sérlega skemmtileg og áhugaverð. Lagið er eins og tónverk, leikur sér að því að skipta um takt og stemmingu og ekki skemmir frumlegur textinn.

Hringdu í mig – Friðrik Dór

Friðrik Dór er ein af stórstjörnum íslenskrar popptónlistar og hefur einstakt lag á að fanga hug og hjörtu hlustenda. ‘Hringdu í mig’ var mest spilaða lag Rásar 2 á síðasta ári og er grípandi smellur sem svíkur engan.

The One- Una Stef

Flottur taktur, hljómagangur, brass, seiðandi og sálarfull rödd Unu ásamt töff bakröddum gera lagið The One áhugavert. Kynþokkinn drýpur af þessu öllu og verður til flott grúv sem fékk heilmikla spilun á síðasta ári. Allt gengur upp.

 

LAG ÁRSINS – RAPP OG HIP HOP

City Lights – Cell 7

Lagið City Lights er listilega vel samið, taktfast með frábærum melódíuköflum. Cell7 sýnir hér enn og aftur að hún er ein af færustu röppurum landsins.

B.O.B.A – JóiPé & Króli

Það eru fá íslensk lög sem geta státað sig af einni milljón áhorfa á YouTube en það gerir B.O.B.A með þeim JóaPé & Króla. Frábærar laglínur og orkumikill flutningur gerðu lagið eitt af þeim vinsælustu á síðasta ári og skaut tveimur unglingum samstundis upp á stjörnuhimininn.

Annan – Alvia

Tónlist Alviu Islandiu slær nýjan tón í íslensku rappi. Tilraunakenndur hljóðheimur hennar byggður á endurómun og bergmálum liggur undir einstökum rappstíl og seyðandi ákalli Alviu í Annan.

Joey Cypher – Joey Christ (ft. Herra Hnetusmjör, Birnir, Aron Can)

Joey Cypher fékk kannski ekki jafn mikla spilun í útvarpi og önnur þekkt rapplög en það var engu að síður eitt af því allra vinsælasta á síðasta ári og státar af flutningi frá mörgum af helstu rappstjörnum Íslands.

Fullir vasar – Aron Can

Aron Can heldur sínu striki og kemur fram með þetta sterka lag sem hefur mikið verið spilað og sungið um allt. Viðlagið límist á heilann og sterkur takturinn ásamt textanum situr eftir hjá hlustandanum um ókomna tíð.

Já ég veit – Birnir (ásamt Herra Hnetusmjör)

Hressandi samspil Birnis og Hr.Hnetusmjörs sem standa á bak við fullt af flottum lögum s.l árs. Þetta er uppfullt af ungri og ósnortinni lífsgleði, með skemmtilegum texta og góðu flæði.

 

LAG ÁRSINS – RAFTÓNLIST

BTO – Vök

Hljómsveitin Vök hefur vaxið gríðarlega síðan að sveitin sigraði Músíktilraunir 2014. Á árinu kom út fyrsta stóra platan, Figure, sem að sýnir þessa þróun vel. Lagið BTO er rafpopp í hæsta gæðaflokki og eitt af þeim lögum sem verður betra þegar Vök flytur það á sviði.

I ́d Love – Auður

Fyrirhafnarlaus samruni raf- og sálartónlistar er eitt helsta einkenni Auðs sem lagasmiðs. Hann nýtir hljóðheim raftónlistarinnar til þess að draga fram taktfastan þunga sálartónlistarinnar og er lagið I’d Love einstaklega vel heppnað.

X – Hatari

Hljómsveitin Hatari hefur vakið gríðarlega athygli á árinu fyrir svalar lagasmíðar, vandaða ímyndarvinnu og frábæra tónleika. Samblanda af rokki og raftónlist með ótrúlega grípandi texta “ Það kostar milljarð að fá krabbamein og líftóruna að losna við það”.

 

LAGAHÖFUNDUR ÁRSINS – VEITT ÞVERT Á FLOKKA

Moses Hightower

Vinsældir Moses Hightower eiga ekki að koma á óvart. Tónlistin er aðgengileg án þess að vera ódýr, það er djúpt á þessu og lögin eru framreidd af fyrsta flokks tónlistarmönnum. Það sem gefur þessu öllu aukna vigt er að lagasmíðalega þræða Moses-liðar glæsilega einstigið á milli furðu- og áhlýðilegheita.

Snorri Helgason

Snorri hefur alltaf verið lunkinn lagahöfundur. Formið sem að hann er að vinna með á „Margt býr í þokunni“ fer honum gríðarlega vel og greinilegt að mikil vinna hefur verið lög í bæði lög og texta sem passa gríðarlega vel saman og hvert lag í raun eins og örsaga.

Björk

Eftir að hafa lagt hjarta sitt á borð fyrir alla á hinni mögnuðu Vulnicura lagði Björk sig eftir nokkuð opnari og bjartari tónaheim á Utopia . Skringilegheitin voru engu að síður til staðar áfram. Utopia er ótrúlegt ferðalag og Björk er nú sem fyrr okkar fremsti og frumlegasti tónlistarmaður.

Nýdönsk

Hljómsveitin Nýdönsk er á stalli með helstu þjóðargersemum. Á nýjustu plötu sinni tók hún nokkuð djarfan vinkil á lagasmíðarnar. Í stað snaggaralegra, grípandi popplaga er lagt upp með strengi hlöðnum smíðum (sem Haraldur Vignir Sveinbjörnsson vélar um) og flæðið er lárétt, lög streyma áfram í hægð og með epísku öldufalli.

Mammút

Mammút vöktu mikla athygli á sínum tíma þegar að sveitin sigraði Músíktilraunir árið 2004. Sveitin hefur síðan gefið út fjórar plötur sem eru heilsteypt verk og þróun sveitarinnar er mikil. Á Kinder Versions eru Mammút að horfa út fyrir landssteinana og það fer þeim vel

 

TEXTAHÖFUNDUR ÁRSINS – VEITT ÞVERT Á FLOKKA

Björn Jörundur/Daníel Ágúst

Textar Nýdanskra hafa í nær þrjá áratugi verið á öðrum stað en aðrir popptextar á Íslandi. Leikur þeirra að orðum og hugtökum er alltaf skemmtilegur og um leið áhugaverður. Hvort sem ort er um ástina, dauðann eða félagslíf plantna.

Jói Pé og Króli

„Ég veit ég er búinn að fokk‘upp/Þú hringir ekki lengur.“ Einn af kostum yfirstandandi rappbylgju er að þar fær rödd unga fólksins að heyrast og við fáum reynslusögur úr heimi sem er oftast hulin þeim sem eldri eru. Jói Pé og Króli eru í forvígi þessa, einlægir og skemmtilegir textar á skapandi íslensku.

Snorri Helgason

Textar Snorra Helgasonar eru hugljúfir og fallegir um leið og þeir eru kómískir og skemmtilegir. Það er eiginleiki sem ekki öllum er gefinn. Minnir oft á texta hljómsveitar allra landsmanna á fyrstu árum þeirra. Snorri fer þó sínar eigin leiðir og er einn af betri textahöfundum þjóðarinnar.

Alvia Islandia

Það er engin eins og Alvia Rán, sem stendur á bakvið Alviu Islandiu. Textarnir eru súrrelískir og skemmtilegir, brugðið er á leik með bæði íslensku og ensku og það tælt, ögrað og hneykslað. En svo gerist hún einlæg, eins og í þessari snilldarlínu: „Ég gyðja eins og Bassett / en flækt eins og cassette.“

Katrína Mogensen

Textar Katrínu Mogensen – söngkonu Mammút – sem prýða nýjustu plötu sveitarinnar, Kinder Versions, eru einstaklega áhrifaríkir og einlægir. Ástin og endalausar flækjur hennar er borin á borð kinnroðalaust og söngurinn styður rækilega við sterkt innihaldið.

 

TÓNLISTARVIÐBURÐIR ÁRSINS

Gloomy Holiday Sigur Rósar í Hörpu

Hugmyndin var tiltölulega einföld, að taka þekkt jólalög og setja þau í „Sigur Rósar“-legan búning, hægja á þeim og setja í þunglamalegri útsetningar. Tónleikarnir fóru fram á Norður og niður hátíð Sigur Rósar en voru og sendir beint út á RÚV. Skemmst frá að segja fór þjóðin, eða sá hluti hennar sem er hvað virkastur á Fésbókinni, á hliðina og sitt sýndist hverjum. Hnakkrifist var um ágæti framtaksins og niðurstaðan einir umtöluðustu og umdeildustu tónleikar seinni tíma.

Sigur Rós á Norður og Niður

Gulldrengirnir í Sigur Rós héldu ferna tónleika á Norður og niður hátíð sinni og sönnuðu enn og aftur af hverju hún er jafn dáð og dýrkuð og raun er. Ekki nóg með að Guð gráti gulltárum yfir lagasmíðunum heldur er sveitin orðin afskaplega vel smurð tónleikavél; ofsalega þétt og hljómmikil.

Jülevenner Emmsjé Gauti og félagar í Gamla Bíó

Í helberu sprelli ákvað Emmsjé Gauti að taka þátt í vaxandi jólatónleikamenningu Íslands og sló hugmynd hans í gegn. Fjölda tónleika var bætt við þá upprunalegu og Gauta tókst að setja á svið skemmtilega tónleika sem tóku sig ekki of alvarlega – og var það reyndar galdurinn að þeim.

Páll Óskar í Laugardalshöllinni

Páll Óskar setti upp RISA-tónleika í Laugardalshöll þar sem engu var til sparað í orðsins fyllstu merkingu en um var að ræða stærsta tónleikaverkefni sem Páll Óskar hefur ráðist í á sínum langa og gifturíka ferli. Glimmer-dúðuð Höllin víbraði bókstaflega af þeirri mögnuðu lífs- og sálargleði sem þessi einstaki listamaður er kunnur fyrir.

Ásgeir Trausti í hægvarpi Rúv

Ein sérstakasta tónlistaruppákoma ársins var þegar Ásgeir Trausti tók tónlist upp í 24 tíma hægvarpi og setti hana beint á vínyl fyrir tilstuðlan vínylskurðarvélar og hver vínylplata algjörlega einstakur gripur. Frumsamin lög sem tökulög voru á efnisskránni en upptökur fóru fram í Hljóðrita. Naskur vottur til yfirstandandi vínylendurreisnar og sönnun á því að Ásgeir er ekki allur þar sem hann er séður.

 

TÓNLISTARFLYTJANDI ÁRSINS

Jói Pé og Króli

Þeir félagar, Jói Pé og Króli, komu eins og stormsveipur inn í íslenskt tónlistarlandslag á síðasta ári og náðu að samþætta rappaðdáendur og þá sem eru alls ekki inn í þeim heimi. Árið var þeirra og ungæðislegur sjarminn lét engan ósnortinn.

Mammút

Eftir að hafa verið starfandi í meira en áratug setti Mammút mark sitt á erlenda grundu svo eftir var tekið á síðasta ári. Plata þeirra Kinder Versions er þeirra besta verk til þessa og erlendir tónlistaraðdáendur sem og innlendir fengu að njóta sveitar sem er nú á hátindi ferils síns.

HATARI

Það þarf að hrista reglulega upp í hlutunum og það gerði sveitin HATARI svo um munaði á árinu. Strangpólitísk og ögrandi sveit, þar sem stungið var á kýlum hægri vinstri. Metnaðarfull tónleikaframkoma hennar var svo punkturinn yfir i-ið.

Svala

Söngkonan Svala Björgvinsdóttir sigraði hug og hjörtu landsmanna að nýju á liðnu ári. Hennar fagmannlega framkoma í tengslum við Söngvakeppni sjónvarpsins kom mörgum sem þekktu ekki nægilega til hennar á óvart. Svala tók svo Tónaflóð Rásar 2 á Menningarnótt í sínar hendur og var framkoma hennar umtöluð. Svala gaf öllum þeim sem efuðust um hana, trú að nýju.

Bubbi

Í 38 ár hefur Bubbi verið iðnasti tónlistarmaður landsins, það dylst engum. Á liðnu ári gerði Bubbi mikið af því að koma fram og má segja að hann hafi farið aftur í ræturnar. Með reglulegum uppákomum á öldurhúsum í Reykjavík eða kirkjum landsins hefur Bubbi messað yfir söfnuði sínum meira en oft áður. Bubbi er einn af þeim sem er alltaf góður á tónleikum. Meira að segja þegar hann er ekki upp á sitt besta.

HAM

HAM hefur í mörg ár verið talin ein allra besta tónleikasveit íslenskrar rokk sögu. Það breyttist ekki á síðasta ári. HAM kom fram á hinum ýmsu hátíðum og tónleikum og má segja að hljómsveitin hafi sjaldan eða aldrei verið jafn þétt og þung í dramatísku og dökku rokki sínu. Ef það er hægt.

 

PLÖTUUMSLAG ÁRSINS

Pink street Boys – Smells like boys

Áhrifamikið plötuumslag sem minnir um margt á plötuumslög þungarokkssveita frá níunda áratugnum. Sannkallað listaverk þar sem bleikur litur og teikningar dansa í takt við kraftmikið rokkið.

Snorri Helgason – Margt býr í þokunni

Plötuumslagið er fallegt, heilsteypt og hnitmiðað. Hönnun, útlit og frágangur er samofið tónlistinni og skapar þannig hinn fullkomna heildarsvip.

Fufanu – Sports

Afar forvitnilegt plötuumslag. Augljós vísun í ógleymanlegt myndband Fufanus en einnig í æskuna og hið íslenska sumar. Plötuumslag sem einfaldlega sogar mann að sér.

Vök – Regime

Stílhreint og fágað plötuumslag. Fellur vel að tíðarandanum og hljóðheim hljómsveitarinnar með fallegum litum og skemmtilegri grafík.

Björk – Útópía

Frumlegt, heiðarlegt og djarft. Sannkölluð veisla fyrir augað, töfrandi og fangar vel draumaheim plötunnar. Umslag í anda Bjarkar og myndar samfellu í höfundarverki hennar.

Continuum – Traumwerk

Einstaklega fallegt og faglega unnið plötuumslag sem fangar augað. Forsíðan er í raun listaverk út af fyrir sig, þar sem útskorin forsíða og bakgrunnur undir henni mynda naumur, forvera nútíma nótnaskriftar.

 

TÓNLISTARMYNDBAND ÁRSINS 2017
ALBUMM.IS & ÍSLENSKU TÓNLISTARVERÐLAUNIN

Blissful – Make It Better

Leikstjóri: Einar Egils.

https://www.youtube.com/watch?v=AmwROOL2JiA&feature=youtu.be 

Virkilega vel hugsað myndband sem fangar 90´s danstónlistar (rave) menninguna á íslandi. Lúkkar mjög vel og skemmtilegt fyrir augað!

 

Rj skógar – Trophy Kid

Leikstjóri:  RJ Skógar.

https://www.youtube.com/watch?v=WcFrHr8_DVc

Einstaklega vel gert og teiknað. Mjög skemmtilegur söguþráður sem margir eflaust kannast við. Það er greinilegt að mikill tími fór í myndbandið en hver rammi er hugsaður til hins ýtrasta.

 

Úlfur úlfur – Bróðir

Leikstjóri: Magnús Leifsson.

https://www.youtube.com/watch?v=DagGsFPmDBA

Hver rammi er þaulhugsaður og eru litirnir í myndbandinu einstaklega smekklegir. Bleiki reykurinn setur svo punktinn yfir i-ið!

 

sóley – Úa

Leikstjóri: Máni M. Sigfússon.

https://vimeo.com/218768977

Fallegt myndband með fílíng frá hreyfimyndatímanum nema í nútímalegri búning. Hvert skot dregur mann inn í ótrúlega þægilegan hugarheim.

 

Högni – Komdu með

Leikstjóri: Máni M. Sigfússon og Högni.

https://vimeo.com/241911387

Skemmtileg skipting á lýsingunni sem gefur sögunni skil á því sem er að gerast. Eins og ævintýri í draumaheimi.

 

Auður – I‘d Love

Leikstjóri: Auður og Ágúst Elí.

https://www.youtube.com/watch?v=z-1kjs8wzws&feature=youtu.be

Hugmyndin er virkilega flott og vel hugsuð út fyrir kassann! Auður er virkilega flottur í myndbandinu og smellpassar þetta allt saman. Hvernig er þetta gert?

 

Vök – BTO

Leikstjóri: Magnus Andersen.

https://www.youtube.com/watch?v=xJJSu1zN2kA&feature=youtu.be

Myndbandið nær að fanga áhorfandann, er sjónrænt og fallegt og djarfur takturinn er spunninn fagmannlega inn í myndbandið. Dáleiðandi.

 

Ólafur Arnalds – 0952

Leikstjóri: Eilifur Örn.

https://www.youtube.com/watch?v=kcwMbtwh4pY

Hér má sjá lífið fangað þar sem myndavélin fylgir fjölskyldu við matarborðið. Samvera, hlýja og söknuður, hið mannlega ástand í takt við tímann og það sem hann ber í skauti sér. Allt fléttast þetta fullkomlega saman við stórbrotna tónlist Ólafs Arnalds.

 

Alexander Jarl – Hvort annað

Leikstóri: Hawk Björgvinsson.

https://www.youtube.com/watch?v=yiJLKXCzW_M

Virkilega fagamannlegt og vel úr garði gert myndband. Töff saga sögð sem er í fullkomnum takti við tónlistina og daðurslegan og svalan textann.

 

Fufanu – White Pebbles

Leikstjóri: Snorri Bros.

https://www.youtube.com/watch?v=2fKdp2fb2DE

Myndbandið er afar flott og passar svo sannarlega vel við lag og texta. Áferð og spennandi umgjörð er skemmtileg og nær vel töffara andrúmsloftinu sem umlykur lagið og hljómsveitina.

 

Íslensku tónlistarverðlaunin verða veitt í Hörpu 14. mars næstkomandi og verða sýnd í beinni útsendingu á Rúv.

Fylgist með á Twitter og Facebook.