Reglur og útskýringar á flokkum

INNSENDINGARGJALD

Grunngjald fyrir hverja innsendingu er kr. 5000 nema verið sé að skrá myndband, tónleika og tónlistarhátíð en þessir þrír flokkar eru gjaldfrjálsir. Skráningargjald fyrir einn og sama titilinn/verkið í nokkra verðlaunaflokka er aldrei hærra en kr. 15.000 fyrir einstaka skráningu.

Dæmi um skráningu: Listamaður sækir um í flokknum Popp fyrir eina plötu og skráir í fjóra verðlaunaflokka: Plötu ársins, Lag ársins, Söngvara ársins og Plötuumslag ársins. Um einn titil er að ræða og gjaldið er því kr. 15.000 (en ekki 20.000). Annað dæmi: Listamaður sækir um í flokknum Popp en fyrir tvær plötur, og skráir báðar plöturnar í Plötu og Lag ársins. Um er að ræða tvo titla í tvo flokka, og því er gjaldið 20.000. Dæmi þrjú: Ef plötufyrirtæki sæki um í flokknum Plötu ársins fyrir tíu listamenn er gjaldið 10 x 5.000 kr. eða 50.000 kr.

Innsendingargjald þarf að greiða í umsóknarferlinu (undir Skráning: Skrá verk) til að geta klárað umsóknina. Tilnefning er ekki tekin gild, fyrr en greiðsla hefur borist.

Skráning til Íslensku tónlistarverðlaunanna fer fram á vefsíðu www.iston.is frá og með 12. desember 2016 til og með 15. janúar 2017.

Í skráningarferlinu er tekið við rafrænum eintökum af tilnefndum verkum en það má einnig skila geisladiskum og vínýlplötum á skrifstofu STEFs. Dómnefndir munu hlusta á öll innsend verk.

Flokkar háðir frumflutningi og/eða útgáfu

Grunnreglur

Gjaldgengir eru þeir höfundar og/eða flytjendur sem eru íslenskir ríkisborgarar eða hafa verið með lögheimili á Íslandi á tímabilinu.
Ef um fleiri höfunda og/eða flytjendur eru að ræða (t.d. í hljómsveit) eiga a.m.k. 50% þeirra að uppfylla skilyrðið um ríkisborgararétt og/eða lögheimili á Íslandi.
Verk eru gjaldgeng séu þau frumflutt eða frumútgefin á Íslandi á tímabilinu 1 jan. til 31 des. 2016.

Lag/Tónverk ársins

Gjaldgeng eru þau verk eftir íslenska höfunda eða höfunda sem búa og starfa á Íslandi sem frumflutt/eða frumútgefin voru á Íslandi á tímabilinu og lögð eru fram til dómnefndar af útgefanda. Útgefanda er í sjálfs vald sett hvort hann kýs að miða við frumflutning eða frumútgáfu verks en óheimilt er að leggja verk fram aftur ef það hefur áður verið lagt fram á öðru undangengnu tímabili. Komi upp sú staða að verk hafi verið frumútgefið á einu ári en notið vinsælda eða vakið athygli á tímabilinu sem ÍTV miðar við hverju sinni er heimilt að leggja það fram sem verk ársins. Skal dómnefnd þá túlka aðstæður þröngt, meta gjaldgengi verksins og rökstyðja niðurstöðu komi til tilnefningar, þó gildir sú takmörkun sem áður er getið um framlögun verks á öðru undangengnu tímabili. Útgefanda er einungis heimilt að leggja hvert verk fram í einum tilnefningaflokki. Til að mynda einungis í Lag ársins (popp) og þá ekki í Lag ársins (rokk) eða í Tónverk ársins (Djass/Blús). Tilnefna skal verk en höfundur/ar skal veita verðlaunum viðtöku.

Hljómplata ársins

Gjaldgengar eru þær hljómplötur íslenskra flytjenda eða flytjenda sem búa og starfa á Íslandi sem lagðar eru fram til dómnefndar og voru frumútgefnar á tímabilinu. Gjaldgengi hljómplötu er óháð því hvort hún innihaldi frumflutning verka eða áður útgefin verk en skilyrði er að amk 80% hljóðritanna á hljómplötunni hafi ekki verið gefin út áður, á öðru tímabili. Útgefanda er einungis heimilt að leggja hverja hljómplötu fram í einum tilnefningaflokki. Til að mynda einungis í Hljómplata ársins (popp) og þá ekki í Hljómplata ársins (rokk). Aðalflytjandi hljómplötunnar skal veita verðlaunum viðtöku.

Opinn flokkur er virkjaður ef margar umsóknir berast sem falla ekki beint undir aðra flokka.

Textahöfundur ársins

Gjaldgengir eru allir textahöfundar sem vöktu athygli á árinu fyrir frumflutning og/eða frumútgáfu verks eða verka á íslensku. Tilnefna skal fyrir áberandi framlag við ákveðið verkefni, svo sem fyrir texta á ákveðinni hljómplötu eða lifandi flutning.

Flokkar óháðir útgáfu

Söngvari / söngkona ársins

Gjaldgengir eru allir íslenskir söngvarar og söngkonur og allir söngvarar og söngkonur sem búa og starfa á Íslandi og sem vöktu athygli á á tímabilinu, óháð útgáfu. Söngvari/söngkona skal veita verðlaunum viðtöku.

Tónlistarflytjandi ársins

Gjaldgengir eru allir íslenskir flytjendur eða flytjendur sem búa og starfa á Íslandi sem vöktu athygli á tímabilinu, óháð útgáfu. Tekið skal sérstakt tillit til starfsemi flytjanda á sviði lifandi flutnings. Flytjandi skal veita verðlaunum viðtöku.

Tónlistarviðburður ársins

Gjaldgengir eru allir tónlistarviðburðir sem fram fóru á Íslandi á tímabilinu og þóttu skara fram úr hvað metnað, skipulagningu og framkvæmd varðar. Skipuleggjandi viðburðarins skal veita verðlaununum viðtöku.

Tónlistarhátíð ársins

Gjaldgengar eru allar tónlistarhátíðir sem fram fóru á Íslandi á tímabilinu og þóttu skara fram úr hvað metnað, skipulagningu og framkvæmd varðar. Skipuleggjandi hátíðarinnar skal veita verðlaununum viðtöku.

Aðrir flokkar

Bjartasta vonin

Gjaldgengir eru allir íslenskir “nýliðar” eða “nýliðar” sem búa og starfa á Íslandi sem vöktu athygli á tímabilinu, óháð útgáfu. Sérstökum aðila verður falið að tilnefna í þessum flokki og skal skilgreining á nýliða vera í höndum hans sem skal þó geta rökstutt val sitt með sterkum hætti og ber honum að túlka hugtakið þröngt. Heimilt er að tilnefna hvort sem er flytjanda eða höfund. Óheimilt er að tilnefna aðila í þennan flokk sem áður hefur hlotið tilnefningu til ÍTV, gefið hefur út hljómplötu sem aðalflytjandi eða vakið hefur verulega athygli á einhverju tímabili sem er undangengið tímabili ÍTV hverju sinni. Tilnefndur aðili skal veita verðlaunum viðtöku.

Rás eitt og Rás tvö eru sérstakir samstarfsaðilar að verðlaununum Bjartasta vonin. Samstarfið felst m.a. í dagskrárgerð og kosningu á vef RÚV.

Heiðursverðlaun Íslenku tónlistarverðlaunanna, valið er í höndum stjórnar Samtóns

Stjórn Samtóns velur ár hvert þann aðila sem heiðra skal sérstaklega fyrir framlag sitt til íslenskrar tónlistar.

Tónlistarmyndband ársins

Gjaldgeng eru öll myndbönd þar sem um er að ræða myndband við íslenskt lag eða íslenskt tónverk. Leikstjórinn má vera íslenskur eða erlendur.  Myndband ársins er valið í samvinnu við Albumm.is. sem tilnefnir 8 – 10 myndbönd en svo kjósa lesendur Albumm.is myndband ársins ásamt dómnefnd.

Þátttökuskilyrði

Skoðaðu þátttökuskilyrði.

Meira

Flokkar

Skoðaðu flokka sem sótt er um.

Meira

Dómnefndir

Skoðaðu dómnefndir í ár.

Meira