Upplýsingar fyrir

þátttakendur

Þátttökuskilyrði

Íslensku tónlistarverðlaunin eru opin öllum íslenskum útgáfum/verkum sem hafa komið út á Íslandi á tímabilinu 1. janúar til 31. desember 2017.

Til að útgáfa teljist íslensk verður aðalflytjandi eða aðalhöfundur að búa og starfa á Íslandi eða vera íslenskur.

Tekið er við tilnefningum til og með 15. janúar 2018.
Tilnefningar verða kynntar um miðjan febrúar.
Verðlaunahátíðin fer fram í Silfurbergi Hörpu miðvikudaginn 14. mars 2018.
Verðlaun verða veitt í allt að 30 flokkum að meðtöldum heiðursverðlaunum.

Dómnefndir

Aðaldómnefndir ÍTV 2017 verða fjórar talsins, ein fyrir hvern grunnhóp tónlistarstefna:

Popp, rokk, rapp og raftónlist
Djass og blús
Sígild- og samtímatónlist
Opinn flokkur 

Flokkarnir rapp, hip hop, raftónlist, leikhús- og kvikmyndatónlist ásamt þjóðlagatónlist eru háðir þeim afmörkunum að nægilega margar frambærilegar tilnefningar berist í þessa tilteknu flokka. Opinn flokkur inniheldur Plötu ársins í Opnum flokki og Plötu ársins í flokknum Kvikmynda- og leikhústónlist en þar að auki er Plötuumslag ársins valið.

Dómnefndir eru skipaðar af framkvæmdastjórn Íslensku tónlistarverðlaunanna. Hver aðaldómnefnd er minnst skipuð fimm aðilum og er reynt eftir bestu geta að gæta jafnræðis hvað aldur, kyn, störf og annað varðar. Í ár var opið umsóknarferli um setu í dómnefndum og þær skipaðar í kjölfarið.

Dómnefndir í Sígildri og samtímatónlist og Poppi, rokki og annarri tónlist eru skipaðar sjö aðilum en dómnefnd í Djass og blús og Opnum flokki eru skipaðar fimm aðilum .

Dómnefndir eru skipaðar fagfólki úr íslensku tónlistar- og menningarlífi og reynt er eftir bestu getu að gæta jafnræðis hvað aldur, kyn, störf og annað varðar við val á fólki í fagnefndir.

Þátttaka

Útgefandi/ábyrgðarmaður verður að skrá verk til þátttöku og sjá til þess að aðgangur að verkinu sé veittur.

Innsendingargjald fyrir hverja tilnefningu er kr. 5000. Sendi sami umsjónaraðili/listamaður inn fleiri en eina tilnefningu fyrir einn og sama titilinn eða listamanninn greiðir hann þó aldrei hærra gjald en kr. 15.000. Innsendingargjald þarf að greiða í umsóknarferlinu (undir Skráning: Skrá verk) til að geta klárað umsóknina.

Útgefandi/ábyrgðarmaður velur þann undirflokk sem hann telur rétt að tilnefna hljómplötuna/verkið í. Dómnefnd er heimilt að leggja til breytingu á flokkun hljómplötu/verks ef svo ber undir með leyfi stórnar Íslensku tónlistarverðlaunanna.

Grunngjald fyrir hverja innsendingu er kr. 5000 nema verið sé að skrá myndband, tónleika og tónlistarhátíð þar sem skráning er gjaldfrjáls. Skráningargjald fyrir einn og sama titilinn/verkið í nokkra verðlaunaflokka er aldrei hærra en kr. 15.000 fyrir einstaka skráningu.

Dæmi um skráningu: Listamaður sækir um í flokknum Popp fyrir eina plötu og skráir í fjóra verðlaunaflokka: Plötu ársins, Lag ársins, Söngvara ársins og Plötuumslag ársins. Um einn titil er að ræða og gjaldið er því kr. 15.000 (en ekki 20.000). Annað dæmi: Listamaður sækir um í flokknum Popp en fyrir tvær plötur, og skráir báðar plöturnar í Plötu og Lag ársins. Um er að ræða tvo titla í tvo flokka, og því er gjaldið 20.000. Dæmi þrjú: Ef plötufyrirtæki sæki um í flokknum Plötu ársins fyrir tíu listamenn er gjaldið 10 x 5.000 kr. eða 50.000 kr.

Innsendingargjald þarf að greiða í umsóknarferlinu (undir Skráning: Skrá verk) til að geta klárað umsóknina. Tilnefning er ekki tekin gild, fyrr en greiðsla hefur borist.

Skráning til Íslensku tónlistarverðlaunanna fer fram á vefsíðu www.iston.is frá 1. desember 2017 til og með 15. janúar 2018.

Í skráningarferlinu er tekið við rafrænum eintökum af tilnefndum verkum en það má einnig skila geisladiskum og vínýlplötum á skrifstofu STEFs. Dómnefndir munu hlusta á öll innsend verk.

Réttur ÍTV

Við skráningu til þátttöku veitir útgefandi/ábyrgðarmaður ÍTV leyfi til þess að nota allt að 30 sekúndna bút úr innsendu verki við markaðssetningu og kynningu á ÍTV. Þegar um kynningu á endanlegum tilnefningum og verðlaunahöfum er að ræða má nota lög/verk í heild sinni. Þátttakandi er ábyrgur fyrir því að öll leyfi séu fyrir hendi.