Bríet, Auður, Ingibjörg Turchi, GDRN, Ólafur Arnalds, Hjaltalín og Ásgeir með flestar tilnefningar í ár!

Tilkynnt var í dag hvaða tónlistarfólk, hópar, viðburðir og fleiri hljóta tilnefningar til Íslensku tónlistarverðlaunanna 2021 fyrir hið fordæmalausa tónlistarár 2020. Verðlaunin verða veitt í Silfurbergi Hörpu miðvikudagskvöldið 14. apríl.

Tónlistarárið 2020 verður lengi í minnum haft fyrir margar sakir. Sköpunarkraftur og áræðni íslensks tónlistarfólks fór ekki framhjá neinum, á sama tíma þegar heimsfaraldur gekk yfir alla heimsbyggðina með öllum þeim takmörkunum á hinu hefðbundna lífi sem við þekkjum. Sjálfsbjargarviðleitnin skilaði sér í fjölmörgum skemmtilegum viðburðum á rafrænu formi, tónlist var áberandi í ljósvakamiðlum og síðast en ekki síst var uppskera nýrrar tónlistar með mesta móti. Innsendingar til verðlaunanna gáfu glögga mynd af því hversu blómlegt tónlistarstarfið var árið 2020 en metfjöldi barst í öllum flokkum verðlaunanna.

Flestar tilnefningar til Íslensku tónlistarverðlaunanna í ár hlýtur Bríet Ísis Elfar fyrir tónlistina á plötu sinni Kveðja, Bríet en tilnefningarnar eru sjö talsins auk þess sem Pálmi Ragnar Ásgeirsson samstarfsmaður Bríetar er tilnefndur sem lagahöfundur ársins. Ingibjörg Turchi hefur fengið mikið lof gagnrýnenda og djassáhugafólks fyrir plötu sína Meliae en hún var m.a. valin plata ársins hjá Morgunblaðinu í fyrra. Ingibjörg ásamt  Auði hljóta næstflestar tilnefningar, sex talsins, Ólafur Arnalds hlýtur fimm og þau GDRN, Hjaltalín og Ásgeir hljóta fjórar. Um 120 flytjendur og hópar eru tilnefndir í ár og eru það fleiri en þrjátíu sem hljóta fleiri en eina tilnefningu í ár.

Íslensku tónlistarverðlaunin verða afhent í Hörpu miðvikudaginn 14. apríl og verður verðlaunahátíðin í beinni útsendingu á RÚV. Kynnir kvöldsins er ein fyndnasta kona landsins, grín- og leikkonan Saga Garðarsdóttir.

Helsti stuðningsaðili Íslensku tónlistarverðlaunanna í ár er NOVA en verðlaunahátíðin er haldin árlega af Samtóni, sem eru regnhlífarsamtök aðildarfélagana í íslensku tónlistarlífi. Þetta er því sannarlega uppskeruhátíð íslensks tónlistarfólks.

 

Eftirtaldir hljóta tilnefningu til Íslensku tónlistarverðlaunanna 2021:

 

POPP-, ROKK-, RAPP & HIPP HOPP- OG RAFTÓNLIST

POPP – PLATA ÁRSINS

BRÍET – Kveðja, Bríet
GDRN – GDRN
Hjaltalín – Hjaltalín
JFDR – New Dreams
Ásgeir – Sátt

ROKK – PLATA ÁRSINS

Skoffín – Skoffín hentar íslenskum aðstæðum
Sólstafir – Endless Twilight of Codependent Love
Auðn – Vökudraumsins fangi
Celebs – Tálvon hinna efnilegu
Dream Wife – So When You Gonna…

RAPP&HIPPHOPP – PLATA ÁRSINS

CYBER – VACATION
JóiPé x Króli – Í miðjum kjarnorkuvetri
Logi Pedro – Undir bláu tungli

RAFTÓNLIST – PLATA ÁRSINS

Ultraflex – Visions of Ultraflex
gugusar – Listen To This Twice
Mikael Lind – Give Shape to Space
Moff & Tarkin – Man of the Match
Volruptus – First Contact

POPP – LAG ÁRSINS

Esjan – BRÍET
Think About Things – Daði Freyr
Vorið – GDRN
Það bera sig allir vel – Helgi Björns
Stundum – Moses Hightower

ROKK – LAG ÁRSINS

Haf trú – HAM
Visitor – Of Monsters and Men
Eldborg – Auðn
Prince – MAMMÚT
Kraumar – Celebs

RAPP&HIPPHOPP – LAG ÁRSINS

Ungi Besti & Milljón – Vera Illuga
Auður og Floni – Týnd og einmana
JóiPé x Króli – Geimvera
CYBER – calm down
Logi Pedro – Ef Grettisgata gæti talað

RAFTÓNLIST – LAG ÁRSINS

Inspector Spacetime – Hvað sem er
Ólafur Arnalds – Loom (feat. Bonobo)
JFDR – Think Too Fast
Ultraflex – Full of Lust
Kuldaboli – Ískaldur veruleikinn

TÓNLISTARVIÐBURÐUR ÁRSINS

Heima með Helga
Auður í Vikunni með Gísla Marteini
Listagjöf Listahátíðar í Reykjavík
HAM í Listasafni Reykjavíkur
Big Party Post-Club International

TEXTAHÖFUNDUR ÁRSINS

Bríet Ísis Elfar
Jóhannes Bjarki Bjarkason
Andri Ólafsson & Steingrímur Karl Teague
Einar Georg Einarsson, Júlíus Aðalsteinn Róbertsson og Ásgeir Trausti Einarsson
Benedikt H. Hermannsson

LAGAHÖFUNDUR ÁRSINS

Pálmi Ragnar Ásgeirsson
Hjaltalín
Guðrún Ýr Eyfjörð Jóhannesdóttir
Auðunn Lúthersson
Moses Hightower

SÖNGVARI ÁRSINS

Högni Egilsson
Jón Jónsson
Auðunn Lúthersson
Ásgeir Trausti Einarsson
Matthías Matthíasson

SÖNGKONA ÁRSINS

Bríet Ísis Elfar
Jófríður Ákadóttir
Guðrún Ýr Eyfjörð Jóhannesdóttir
Jelena Ciric
Rakel Mjöll Leifsdóttir

TÓNLISTARFLYTJANDI ÁRSINS

BRÍET
Auður
HAM
Daði Freyr
Bubbi Morthens

TÓNLISTARMYNDBAND ÁRSINS Í SAMSTARFI VIÐ ALBUMM.IS

Sumarið sem aldrei kom – Jónsi. Leikstjórn: Frosti Jón Runólfsson.
https://www.youtube.com/watch?v=z04sE7L2DVw

Pictures – Ásgeir. Leikstjórn: Einar Egilsson
https://www.youtube.com/watch?v=jRmatUn6aRY

Ljós – Auður feat. BRÍET og Drengur.  Leikstjórn: Kristinn Arnar Sigurðsson aka krassasig
https://www.youtube.com/watch?v=KNneHAYZetQ

Hvíti dauði – Teitur Magnússon (feat. Gunnar Jónsson Collider). Leikstjórn: Jón Bjarki Magnússon
https://www.youtube.com/watch?v=87JeT0ppWiU

Píla – Joey Christ ft. Lil Binni. Leikstjórn: Rough Cult
https://www.youtube.com/watch?v=IauLXt4Bn40

Take the Seasons – Oscar Leone. Leikstjórn: Midnight Mar
https://www.youtube.com/watch?v=qGyqPklZoOo

Easy – aYia. Leikstjórn: Salomon Ligthelm
https://www.youtube.com/watch?v=o6IJZXZ2dzY

Back To The Sky – Ólafur Arnalds, JFDR. Leikstjórn: Arni & Kinski
https://www.youtube.com/watch?v=SwX4b8ohI5o

BJARTASTA VONIN Í SAMSTARFI VIÐ RÁS 2

Kristin Sesselja
Inspector Spacetime
Skoffín
gugusar
Salóme Katrín

Tónlistarkonan gugusar

SÍGILD OG SAMTÍMATÓNLIST

PLATA ÁRSINS

Elfa Rún Kristinsdóttir – Baroque Violin Sonatas
Víkingur Heiðar Ólafsson – Debussy-Rameau
Peter Máté – John Speight, Solo Piano Works
Halldór Smárason – STARA: Music of Halldór Smárason
Páll Ragnar Pálsson – Atonement

TÓNVERK ÁRSINS

Finnur Karlsson – Accordion Concerto
Hafdís Bjarnadóttir – Sumar
Bára Gísladóttir – VÍDDIR
Hugi Guðmundsson – BOX, konsert fyrir harmónikku og lírukassa
Snorri Sigfús Birgisson – Konsert fyrir hljómsveit

TÓNLISTARVIÐBURÐUR ÁRSINS – HÁTÍÐIR

Listagjöf Listahátíðar í Reykjavík
Myrkir Músíkdagar
Reykholtshátíð 2020
Sönghátíð í Hafnarborg
Sumartónleikar í Skálholti 2020

TÓNLISTARVIÐBURÐUR ÁRSINS – TÓNLEIKAR

70 ára afmælistónleikar Sinfóníuhljómsveitar Íslands (5. mars)
KIMI: Afkimar
Brák og Bach
The Modern Romantic – Stuart Skelton (Sönghátíð í Hafnarborg)
Ekkert er sorglegra en manneskjan – Friðrik Margrétar-Guðmundsson

SÖNGKONA ÁRSINS

Álfheiður Erla Guðmundsdóttir
Hallveig Rúnarsdóttir
Heiða Árnadóttir
Herdís Anna Jónasdóttir
Sigríður Ósk Kristjánsdóttir

SÖNGVARI ÁRSINS

Elmar Gilbertsson
Kristinn Sigmundsson
Stuart Skelton
Sveinn Dúa Hjörleifsson
Sverrir Guðjónsson

TÓNLISTARFLYTJANDI ÁRSINS – EINSTAKLINGAR

Anna Guðný Guðmundsdóttir
Elfa Rún Kristinsdóttir
Víkingur Heiðar Ólafsson
Halla Steinunn Stefánsdóttir
Sæunn Þorsteinsdóttir

TÓNLISTARFLYTJANDI ÁRSINS – HÓPAR

Sinfóníuhljómsveit Íslands
Barokkbandið Brák
Elektra Ensemble
Strokkvartettinn Siggi
Cantoque Ensemble

BJARTASTA VONIN TILKYNNT Í HÖRPU 14. APRÍL

Ingibjörg Turchi og hljómsveit

DJASS- OG BLÚSTÓNLIST

PLATA ÁRSINS

Melismetiq Live – Melismetiq
Make – MONOGLOT
Meliae – Ingibjörg Turchi
hits of – hist og
Four Elements – Haukur Gröndal og Frelsissveit Íslands

TÓNVERK ÁRSINS

Geneva – Ari Bragi Kárason
Svörður – Agnar Már Magnússon
Þú varst ástin mín – Sigurður Flosason
Four Elements – Haukur Gröndal
I don’t want to sleep – Mikael Máni Ásmundsson og Kristín Birgitta Ágústsdóttir

LAGAHÖFUNDUR ÁRSINS

Ingibjörg Elsa Turchi
Sigurður Flosason
hist og (Eiríkur Orri Ólafsson, Róbert Reynisson og Magnús Trygvason Eliassen)
Mikael Máni Ásmundsson
Þórir Úlfarsson (Thor Wolf)

TÓNLISTARFLYTJANDI ÁRSINS – EINSTAKLINGAR

Haukur Gröndal
Sigurður Flosason
Leifur Gunnarsson
Andrés Þór
Stína Ágústsdóttir

TÓNLISTARFLYTJANDI ÁRSINS – HÓPAR

Frelsissveit Íslands
Ingibjörg Turchi og hljómsveit
hist og
Brim
Sölvi Kolbeinsson & Magnús Trygvason Eliassen

TÓNLISTARVIÐBURÐUR ÁRSINS – TÓNLEIKAR

Jazzhátíð Reykjavíkur
Jazz í Borgarbókasafninu: Beint á ská og Jazz í hádeginu
Síðdegistónar í Hafnarborg
Ingibjörg Turchi og hljómsveit: Útgáfutónleikar Meliae í Kaldalóni
Charlie Parker with strings á Jazzhátíð Reykjavíkur

BJARTASTA VONIN TILKYNNT Í HÖRPU 14. APRÍL

 

ÖNNUR TÓNLIST: OPINN FLOKKUR, ÞJÓÐLAGA- OG HEIMSTÓNLIST, KVIKMYNDA- OG LEIKHÚSTÓNLIST

PLATA ÁRSINS – KVIKMYNDA- OG LEIKHÚSTÓNLIST

Defending Jacob – Atli Örvarsson og Ólafur Arnalds
Thin Ice – Biggi Hilmars
We’re Here – Herdís Stefánsdóttir
The Vasulka Effect – Hugar
Chasing the Present – Snorri Hallgrímsson

PLATA ÁRSINS – ÞJÓÐLAGATÓNLIST

Brek – Brek
Elín Hall – Með öðrum orðum
Baggalútur – Kveðju skilað
Jelena Ciric – Shelters one
Ásgeir Ásgeirsson – Persian path

PLATA ÁRSINS – OPINN FLOKKUR

The Ghost Choir – The Ghost Choir
Ólafur Arnalds – some kind of peace
Red Barnett – Astronauts
K.óla – PLASTPRINSESSAN
Gyða Valtýsdóttir – EPICYCLE II

LAG/TÓNVERK ÁRSINS – OPINN FLOKKUR

Gyða Valtýsdóttir og Úlfur Hansson – Morphogenesis
Ólafur Arnalds –  Defending Jacob Theme
Magnús Jóhann – Sálmur fyrir Sollu systur
Kira Kira – We The Feels
Red Barnett – Astronaut

PLÖTUUMSLAG ÁRSINS

Ingibjörg Turchi – Meliae: Klara Arnalds
BRÍET – Kveðja, Bríet: Bríet Ísis Elfar, Sigurður Erik Hafliðason, Þorgeir Blöndal
Mikael Lind – Give Shape to Space: Sigga Björg Sigurðardóttir, Harry Towell
K.óla – PLASTPRINSESSAN: Kata Jóhanness, Katrín Helga Ólafsdóttir, Ása Bríet Brattaberg, Arína Vala Þórðardóttir, Ída Arínudóttir, Elvar S. Júlíusson
Jesper Pedersen – Katydids: Páll Ivan frá Eiðum

UPPTÖKUSTJÓRN ÁRSINS

EPICYCLE II – Gyða Valtýsdóttir: Upptökustjórn: Albert Finnbogason, Hljóðblöndun: Gyða Valtýsdóttir, Jónsi og Albert Finnbogason

Meliae – Ingibjörg Turchi: Upptökustjórn: Birgir Jón Birgisson, Hljóðblöndun og hljómjöfnun: Ívar Ragnarsson

STARA – Halldór Smárason: Upptökustjórn: Dan Merceruio og Daniel Shores

Kveðja, Bríet – BRÍET: Upptökustjórn: Pálmi Ragnar Ásgeirsson, Hljómjöfnun: Friðfinnur Oculus Sigurðsson

Hjaltalín – Hjaltalín: Upptökustjórn: Styrmir Hauksson og Hjaltalín

Íslensku tónlistarverðlaunin 2021 verða haldin hátíðleg í Silfurbergi Hörpu, laugardagskvöldið 17. apríl. Uppskeru tónlistarársins 2020 verður þá fagnað en segja má að uppskera þess árs hafi verið með besta móti, þrátt fyrir fordæmalausa tíð. Veislustjóri verður engin önnur en Saga Garðarsdóttir grín- og leikkona.

Árið 2020 mun án efa seint gleymast öllum þeim sem upplifðu það og sömuleiðis þeim sem rýna munu í spjöld sögunnar í framtíðinni. Svo fordæmalaust var árið með öllum sínum heimsendapestum, náttúruhamförum og heimaskrifstofum. Allt það fólk sem stóð í framlínunni, heilbrigðisstarfsfólk, kennarar, fólk í þjónustustörfum og umönnun – unnu kraftaverk. Um það verður ekki deilt.

Eitt af því sem við megum einnig þakka fyrir hér heima er framlag tónlistarinnar. Hún skipaði stórt hlutverk í því að viðhalda gleðinni á erfiðum tímum. Íslenskt tónlistarfólk kom víða við, brást við aðstæðum á einstakan máta og allt þetta skilaði sér í aragrúa af frábærri tónlist. Árið 2020 var nefnilega þrátt fyrir allt býsna gjöfult ár þegar kemur að útgáfu. Húrra fyrir íslenskri tónlist!

Innsendingar til Íslensku tónlistarverðlaunanna hófu að berast á Degi íslenskrar tónlistar 1. desember síðastliðinn og rann frestur út 17. janúar í ár. Skemmst er frá því að segja að öll met voru slegin í innsendingum en um 1200 innsendingar bárust í formi platna, tónverka, viðburða, einstaklingsverðlauna, myndbanda og hönnunar.

Það hefur því ekki verið öfundsvert starf allra þeirra sem eiga sæti í dómnefndum að kynna sér allar þær metnaðarfullu innsendingar sem bárust. Dómnefndirnar eru fjórar talsins; ein í flokki popp-, rokk-, rapp/hipphopp- og raftónlistar, önnur í sígildri og samtímatónlist, sú þriðja í djass- og blústónlist og loks svokölluðum opnum flokki. Þar er tekin fyrir önnur tónlist, heims-, þjóðlaga-, kvikmynda- og leikhústónlist. Það eru hátt í þrjátíu manns sem koma að þessu starfi.

Tilkynnt verður um tilnefningar til verðlaunanna þann 24. mars en verðlaunin sjálf verða eins og áður segir afhent í Hörpu, 17. apríl en sjónvarpað verður frá verðlaunakvöldinu í beinni útsendingu á RÚV.

Íslensku tónlistarverðlaunin og símafyrirtækið NOVA hafa hafið samstarf um tónlistarverðlaunin 2021 og í kjölfarið ákveðið að fella niður öll gjöld vegna innsendinga til verðlaunanna. Þrátt fyrir afar erfitt ár fyrir tónlistariðnaðinn, þar sem lítið hefur verið um tónleika- og annað viðburðahald, hefur þó gróskan verið gríðarleg og útgáfan sem betur fer afar auðug. Með þessu vilja ÍSTÓN og Nova leggja áherslu á að styðja við íslenskt tónlistarfólk og hvetja þau áfram til dáða.

Opnað var fyrir skráningu til Íslensku tónlistarverðlaunanna 2021 í gær, 1. desember 2020, sem er jafnframt Dagur íslenskrar tónlistar. Allt tónlistarfólk er hvatt til þess að senda sín verk frá þessu viðburðarríka og eins og sumir segja „fordæmalausa” ári sem 2020 hefur sannarlega verið. En gjöfult hefur árið verið þegar kemur að íslenskri tónlist og útgáfan afar blómleg. Við gleðjumst yfir því. Hægt verður að tilnefna tónlist, hljómplötur, tónverk, rafræna viðburði og allt það sem tónlistarárið gaf af sér og eru verðlaunin byggð upp á fjórum meginflokkum. Hægt verður að skrá inn ný verk til og með 15. janúar 2021.

Hverjir geta sent inn og hvar?
Öllu íslensku tónlistarfólki, öllum tónskáldum, útgefendum og öðrum hagsmunaaðilum sem gefið hafa út nýja íslenska tónlist, haldið tónleika eða sent frá sér ný lög, tónverk eða myndbönd árið 2020 er frjálst að senda inn tilnefningar í viðeigandi flokka.

Flokkarnir fyrrgreindu eru:
1. Sígild og samtímatónlist.
2. Djass- og blústónlist.
3. Popp-, rokk-, hipphopp- og raftónlist
4. Önnur tónlist: Önnur tónlist er opinn flokkur, þar sem kvikmynda- og leikhústónlist, þjóðlaga- og heimstónlist eiga sér heimili.

• Veitt verða verðlaun fyrir tímabilið 1. janúar til 31. desember 2020
• Skilafrestur á innsendingum rennur út á miðnætti 15. janúar 2021
• Tilnefningar til Íslensku tónlistarverðlaunanna verða kynntar um miðjan febrúar 2021
• Veitt verða 38 verðlaun í 4 flokkum auk heiðursverðlauna.
• Verðlaunahátíðin fer fram í Hörpu miðvikudaginn 10. mars 2021
• Íslensku tónlistarverðlaunin verða í beinni útsendingu á RÚV
• Skráningargjöld hafa verið felld niður í samvinnu við aðalbakhjarl verðlaunanna; NOVA.

Skráning á tilnefningum til Íslensku tónlistarverðlaunanna fer fram hér (https://istonumsokn.firebaseapp.com/)

GDRN, Víkingur Heiðar, Auður, Karl Olgeirsson, Valdimar, Jónas Sig og JóiPé og Króli fengu flest verðlaun þegar Íslensku tónlistarverðlaunin fyrir tónlistarárið 2018 voru veitt í Hörpu í kvöld. Jón Ásgeirsson fékk sérstök heiðursverðlaun á athöfninni og boðið var upp á fjölbreytt skemmtiatriði úr ýmsum áttum.

Fjölbreytni og fagmennska var í fyrirrúmi á glæsilegri verðlaunahátíð tónlistargeirans þegar íslensku tónlistarverðlaunin voru afhent í Silfurbergi Hörpu í kvöld. Það má með sanni segja að bjartar vonir síðustu ára séu tilbúnar að stimpla sig inn og gott betur því á sviði stóð ný kynslóð verðlaunahafa á íslensku tónlistarverðlaununum sem átti stóran þátt í að setja sinn svip á kvöldið og gera það eftirminnilegt. Undanfarið hefur mikið verið rætt um að kynslóðarskipti séu að eiga sér stað í íslensku tónlistarlífi og ekki verður undan því hlaupið að leiða hugann að því þegar litið er til verðlaunahafa kvöldsins.

Tónlistarkonan GDRN, eða Guðrún Ýr Eyfjörð Jóhannesdóttir eins og hún heitir fullu nafni hlaut fern verðlaun á hátíðinni og má segja að þetta hafi verið kvöldið hennar. Plata GDRN, Hvað ef var valin poppplata ársins en hér er á ferðinni einstaklega frambærileg frumraun þar sem allt smellur saman, frábærar lagasmíðar og áhugaverðir textar. Lagið Lætur mig sem hún syngur með Flóna og samið með ra:tio var valið popplag ársins og Guðrún Ýr var kosin söngkona ársins í flokki popp, rokk, raf- og hiphopptónlistar. Að endingu fékk GDRN verðlaun fyrir myndband ársins við lagið Lætur mig en myndbandinu er leikstýrt af Ágústi Elí Ásgeirssyni. Frábær uppskera hjá vaxandi listakonu.

Auðunn Lúthersson (Auður) er búinn að stimpla sig rækilega inn og átti hreint út sagt frábært ár í fyrra og uppskar eftir því á verðlaunaafhendingu kvöldsins. Plata hans Afsakanir var valin plata ársins í raftónlist auk þess sem Auður var valinn lagahöfundur ársins 2018 en platan þykir afar heilsteypt verk sem einkennist af sterkum lagasmíðum og nær óaðfinnanlegri upptökustjórn og hljóðblöndun. Þess má geta að Auður hlaut flestar tilnefningar í ár eða alls átta talsins en hann hlaut jafnframt tvenn verðlaun á Íslensku tónlistarverðlaunum árið 2017.

Í heildina voru um 37 verðlaun afhent á verðlaunaafhendingunni en þess fyrir utan voru verðlaunin fyrir plötuumslag ársins afhent sérstaklega í þættinum Menningunni á RÚV kvöldið áður. Hér verður tæpt á öllu því helsta og neðar í tilkynningunni má finna heildarupptalningu allra verðlaunahafa.

Plata ársins 2018 í Rapp og hiphopp var að þessu sinni skífan Afsakið hlé með JóaPé & Króla. Þeir félagarnir áttu líka lag ársins í flokki rapptónlistar en þar var lagið Í átt að tunglinu sem bar af í ár að mati dómnefndar og ekki má betur sjá en að JóiPé & Króli eru komnir til að vera.

Í flokki sígildrar og samtímatónlistar var það Víkingur Heiðar Ólafsson sem fór heim með verðlaunagripinn fyrir plötu ársins fyrir hljóðritun á hljómborðstónlist eftir Johann Sebastian Bach. Óhætt er að fullyrða að Víkingur geri tónlist þessa mikla meistara barokksins frábær skil en Víkingur Heiðar var einnig valinn tónlistarflytjandi ársins úr röðum einstaklinga en á liðnu ári hélt hann frábæra útgáfutónleika til þess að fagna útgáfu plötu með tónlist Johann Sebastians Bach auk þess sem hann frumflutti nýjan píanókonsert Hauks Tómassonar.

Spectra eftir Önnu Þorvaldsdóttur var valið tónverk ársins í sígildri og samtímatónlist en hljóðheimur þess og línur eru hvort tveggja í senn seiðandi en jafnframt ögrandi tónvefur að mati dómnefndar.

Strokkvartettinn Siggi var valinn tónlistarflytjandi ársins úr röðum hópa en kvartettinn hefur frá upphafi verið í fremstu röð kammerhópa og unnið ötullega að nýsköpun í tónlistarlífi hér á land. Söngvari ársins var valinn Oddur Arnþór Jónsson fyrir burðarhlutverk  í óperunni Brothers eftir Daníel Bjarnason þar sem hann túlkaði hlutverk Michael stórkostlega í eftirminnilegri uppfærslu, bæði hvað varðar leik og söng. Söngkona ársins er Hallveig Rúnarsdóttir sem blómstraði í verkefnum sínum á liðnu ári og hefur einstakt lag á að snerta hjörtu áheyrenda. Hún heillaði áhorfendur meðal annars með söng sínum í Klassíkin okkar og skemmti ungum sem öldnum í titilhlutverkinu í frumflutningi á óperunni Gilitrutt eftir Hildigunni Rúnarsdóttur.

Óperan Brothers eftir Daníel Bjarnason í uppsetningu Íslensku Óperunnar hlaut Íslensku tónlistarverðlaunin sem tónlistarviðburður ársins í sígildri og samtímatónlist. Þessi uppfærsla á magnþrunginni óperu þótti stórfengleg og vel skipuð frábærum listamönnum í hverju hlutverki, bæði innan sviðs og utan. Einsöngvarar ásamt og kór Íslensku óperunnar og Sinfóníuhljómsveit Íslands undir stjórn tónskáldsins Daníels Bjarnasonar sköpuðu eina eftirminnilegustu óperusýningu sem sett hefur verið upp hér á landi. Tónlistarviðburður ársins úr flokki hátíða eru Óperudagar í Reykjavík en með fádæma framtakssemi og sterkri listrænni sýn hafa stjórnendur Óperudaga sýnt fram á nýja möguleika og hinar fjölbreyttustu birtingarmyndir óperuformsins, auk þess að fara nýstárlegar leiðir í að ná til og heilla áhorfendur.

Verðlaun fyrir útgáfu ársins í flokki kvikmynda og leikhústónlistar voru veitt í þriðja sinn og komu í hlut Davíðs Þórs Jónssonar fyrir músíkina við kvikmyndina Kona fer í stríð. Í huga dómnefndar er tónlistin við mynd Benedikts Erlingssonar algerlega órofa hluti af myndmáli myndarinnar.

Í flokki popp og rokktónlistar réð fjölbreytnin ríkjum í ár en verðlaun skiptust á nokkrar hendur. Valdimar átti rokkplötu ársins, en platan Sitt sýnist hverjum þykir afar sterkt verk þar sem að textarnir spila stóra rullu og hljóðheimurinn er bæði stór og mikilfenglegur. Valdimar Guðmundsson var valinn söngvari ársins fyrir frábæra frammistöðu sína Sitt sýnist hverjum en Valdimar býr yfir einstaklega fallegri rödd með ótal blæbrigðum, flauelsmjúk og kraftmikil í senn. Verðlaunin fyrir rokklag ársins féllu í skaut Benny Crespo’s Gang fyrir lagið Another Little Storm en lagið þykir að mati dómnefndar gríðarlega vel samið, grípandi og vel flutt. Textahöfundur ársins var Svavar Pétur Eysteinsson sem á nýjustu plötu Prins Póló heldur áfram að syngja skemmtilega texta af barnslegri einlægni, í bland við alvarleika og þráðbeinan sannleik enda oftast gott kaffi þegar Svavar Pétur á í hlut.

Lagahöfundur ársins var eins og fyrr hefur komið fram Auðunn Lúthersson (Auður) og söngkona ársins var valin Guðrún Ýr Eyfjörð Jóhannesdóttir (GDRN).

Hljómsveitin Hatari hlaut Íslensku tónlistarverðlaunin sem tónlistarflytjandi ársins og kemur sú nafnbót eflaust engum á óvart enda er sveitin kraftmikið listrænt atriði sem fær alla sem á horfa til þess að staldra við og hlusta (og jafnvel dansa smá líka).

Aldrei fór ég suður var valinn tónlistarviðburður ársins 2018 en á síðustu 15 árum hefur hátíðin fest sig rækilega í sessi sem einn af stóru viðburðunum í íslensku tónlistarlífi. Á Aldrei fór ég suður eiga allar tegundir íslenskrar dægurtónlistar sér samastað og í fyrra var slegið aðsóknarmet en talið er að íbúafjöldi Ísafjarðarbæjar hafi tvöfaldast á meðan á hátíð stóð.

Sólhvörf var valin þjóðlagaplata ársins en þar tekur sveitin Umbra hlustandann í heillandi ferðalag þar sem tónlist tengd dimmum vetrardögum er í forgrunni. Virkilega vönduð plata þar sem lögin eiga það sameiginlegt að vera framúrskarandi útsett og flutt. Arnór Dan hlaut verðlaun fyrir lag ársins í opnum flokki, en í laginu Stone By Stone fetar Arnór Dan nýjar brautir þar sem fegurð og framúrstefna fá að njóta sín til fullnustu í firnagóðri tónsmíð.

Gyða Valtýsdóttir átti plötur ársins í opnum flokk en á Evolution þykir hún sýna gríðarlega sterk höfundareinkenni á sinni fyrstu sólóplötu með frumsömdu efni. Þversögn einkennir plötuna en hún er kraftmikil og sannfærandi, en um leið viðkvæmnisleg og blíð.

Veit voru verðlaun fyrir upptökustjórn og það var Ómar Guðjónsson sem hlaut þau fyrir heilsteypta hljóðmynd á plötu Jónas Sig, Milda hjartað. Hljóðheimur Milda hjartans, skírskotar að sumu leyti til flauelsmýktar söngvaskálda áttunda áratugarins en tekur líka til hráleika og kynngikrafts, eins og heyra má í smellinum „Dansaðu“. Heildarhljómurinn er lífrænn og umlykjandi og heldur hlustandanum föngnum allt til enda segir í umsögn dómnefndar.

Milda hjartað hlaut fleiri verðlaun en á þriðjudaginn var tekið smá forskot á sæluna en þá voru veitt verðlaun fyrir plötuumslag ársins í þættinum Menningunni á RÚV. Verðlaunin fyrir plötuumslag komu í hlut Ámunda Sigurðarsonar hönnuðar og Jónatans Grétarssonar ljósmyndara en það var umslagið fyrir plötu Jónasar Sig., Milda hjartað sem bar sigur úr bítum. Sterk ljósmynd af andliti höfundar undirstrikar titil plötunnar og efniviðinn vel. Jónas er í senn mildur í fasi og einbeittur, nákvæmlega eins og djúpir textarnir sem fjalla um styrk kærleikans í viðsjárverðum samtímanum.

Í flokki djass og blús var það Karl Olgeirsson sem stóð uppi með tvenn verðlaun, fyrir djassplötu ársins og sem lagahöfundur ársins. Plata Karls, Mitt bláa hjarta þykir með afbrigðum góð en hún inniheldur fjórtán nýja djasssöngva. Bæði tónsmíðar og textar eru grípandi með hnyttnum skírskotunum í íslenskan veruleika en fjöldi söngvara og hljóðfæraleikara kemur fram á plötunni og er hún kærkomin viðbót í flóru íslenskra djasssöngva. Lagasmíðar plötunnar þykja sem fersk vindhviða inn í tónlistarlífið, fjölbreytt og aðgengileg án þess að gefa nokkurn afslátt af fagurfræði eða innihaldi.

Bugða eftir Agnar Már Magnússon hlaut verðlaun sem tónverk ársins í djass og blús en þar hlykkjast raddir píanós og gítars hverjar um aðra í fallegu og áhugaverðu samtali sem unun er að hlýða á. Tónlistarflytjandi ársins úr hópi einstaklinga var Kjartan Valdemarsson, en Kjartan er einn virkasti og ástsælasti tónlistarmaður þjóðarinnar. Hann hefur leikið inn á fjöldann allan af hljómplötum, á tónleikum og unnið mikið í leikhúsi, útvarpi og sjónvarpi – ýmist sem tónskáld, útsetjari eða hljóðfæraleikari. Tónlistarflytjandi ársins úr flokki stærri sveita og hópa var Stórsveit Reykjavíkur en starfsemi hennar var með blómlegasta móti á síðasta ári. Hljómsveitin hélt marga fjölbreytta og metnaðarfulla tónleika þar sem lögð var áhersla á nýja tónlist, bæði innlenda sem erlenda.

 Tónleikaraðir Jazzklúbbsins Múlans var kosinn tónlistarviðburðir ársins 2018. Í fyrra var tuttugasta og fyrsta starfsár Múlans og var árið að vanda metnaðarfullt og sýndi gott þversnið af því sem er að gerast í íslensku djasssenunni. Fjöldi tónleika voru 43 og fram komu margir af fremstu tónlistarmönnum og -konum landsins ásamt nokkrum vel völdum erlendum gestum.

Björtustu vonirnar

Forseti Íslands, herra Guðni Th. Jóhannesson, veitti þrenn verðlaun á hátíðinni sem komu í hlut bjartra vona í íslensku tónlistarlífi.
Í flokki sígildrar og samtímatónlistar er það Björk Níelsdóttir sem er bjartasta vonin. Björk hefur verið að skapa sér sess sem einn af áhugaverðustu tónlistarmönnum okkar. Hún starfar sem tónskáld, hljóðfæraleikari og einsöngvari og syngur jafnt þjóðlagatónlist, sígilda og samtímatónlist Hún starfar með kammerhópunum Duplum dúó og Stirni emsemble hér heima auk þess að taka þátt í erlendu samstarfi. Einstaklega fjölhæf og næm listakona sem verður afar spennandi að fylgjast með í framtíðinni.

Í flokki djass og blús er það Daníel Helgason gítarleikari sem hlýtur þessa nafnbót í ár.

Daníel Helgason er einstaklega fjölhæfur gítarleikari og kemur víða við í starfi sínu sem flytjandi lifandi tónlistar og í hljóðverum landsins. Hann er einn fárra íslenskra gítarleikara sem hefur tileinkað sér kúbanska tresgítarinn og kafað í stílbrögð tónlistar Suður Ameríku. Ásamt flytjandastarfinu er Daníel afkastamikið tónskáld og meðlimur tríósins DÓH sem sendi frá sér plötuna DÓH á árinu.

Bjartasta vonin í poppi, rokki, rappi og raftónlist var tilnefnd af starfsfólki Rásar 2 eins og undanfarin ár. Kosning fór fram á vef Rásar 2 en það er Bríet sem hlýtur nafnbótina í ár, bjartasta vonin 2019. Bríet gaf út sína fyrstu smáskífu árið 2018 og vakti strax mikla athygli enda setur eiðandi rödd Bríetar, næmni hennar og góð túlkun hana í fremstu röð söngkvenna. Það má búast við því að árið 2019 verði spennandi en von er á nýju efni auk þess sem hún er nú þegar farin að þreifa fyrir sér erlendis.

Heiðursverðlaun

Jón Ásgeirsson hlýtur heiðursverðlaun Samtóns í ár en það var mennta og menningarmálaráðherra Lilja Alfreðsdóttir sem afhenti Jóni verðlaunin og ekki annað sagt en að Jón Ásgeirsson sé verðskuldaður heiðursverðlaunahafi Íslensku tónlistarverðlaunanna.
Jón Ásgeirsson er fæddur á Ísafirði 1928 og varð því níræður á síðasta ári. Jón hefur á langri æfi verið afkastamikið tónskáld, kennari og höfundur kennslubóka í tónlist. Á meðal kammerverka hans má nefna strengjakvartetta, blásarakvintetta, oktett fyrir blásara og Sjöstrengjaljóð fyrir strengjasveit. Konsertarnir eru sex fyrir ýmis hljóðfæri; síðast var flautukonsert hans frumfluttur á tónleikum Sinfóníuhljómsveitar Íslands í janúar á þessu ári.

Jón Ásgeirsson er einna þekktastur fyrir söngtónlist sína; sönglög, kórverk og óperur. Þá samdi Jón ballettinn Blindisleik sem sýndur var í Þjóðleikhúsinu árið 1979. Einsöngslög Jóns eru um 90 talsins. Hæst ber lög hans við ljóð Halldórs Laxness: Maístjörnuna, Hjá lygnri móðu og Vor hinsti dagur, þá má nefna sönglagaflokkinn Svartálfadans við ljóð Stefáns Harðar Grímssonar og hvert mannsbarn á Íslandi þekkir kórlag hans við vísur Vatnsenda-Rósu: Augun mín og augun þín. Á meðal stærri kórverka Jóns eru Tíminn og vatnið við ljóð Steins Steinarrs og Á þessari rímlausu skeggöld við samnefnt kvæði Jóhannesar úr Kötlum.

Jón kenndi um árabil við Kennaraskóla Íslands, síðar Kennaraháskóla Íslands. Hann var skipaður prófessor við skólann árið 1996, fyrstur allra til þess að gegna slíkri stöðu í listgreinum á Íslandi. Tólf árum síðar, árið 2008, var honum veitt doktorsnafnbót í heiðursskyni fyrir framlag hans til tónlistaruppeldis í skólum landsins.

Fram komu

Saga Garðarsdóttir var kynnir kvöldsins í ár. Skemmtiatriði á Íslensku tónlistarverðlaununum í ár komu úr ýmsum áttum en áttu það öll sameiginlegt að vera tilnefnd til Íslensku tónlistarverðlaunanna. Fram komu  á hátíðinni: Hórmónar, Víkingur Heiðar Ólafsson, GDRN, Auður, Karl Olgeirsson ásamt Ara Braga Kárasyni og Ragnheiði Gröndal, Ylja og að lokum var það hljómsveitin Valdimar sem stimplaði hátíðina út.

– – –

Alls voru veitt 38 verðlaun fyrir tónlistarárið 2018 en það er Samtónn sem stendur að baki Íslensku tónlistarverðlaununum. Að baki Samtón standa FÍH, FHF, STEF, SFS, FTT og Tónskáldafélag Íslands, Tilgangur Samtóns er að vinna að sameiginlegum hagsmunum og styrkja stöðu höfunda, flytjenda, framleiðenda og annarra rétthafa að tónlist. Samtónn kemur fram sameiginlega fyrir hönd íslenskra rétthafa og tónlistarfólks.

Stjórn Íslensku tónlistarverðlaunanna skipa Margrét Eir Hönnudóttir, Kristján Freyr Halldórsson og Jóhann Ágúst Jóhannsson.

– – –

Sérstakar þakkir frá Íslensku tónlistarverðlaunum fá:
Concept Events, RÚV, Harpa, Lúxor, Instamyndir, Alda Music, Albumm, Isavia, Tónlistarsjóður og allir þeir sem komu fram á hátíðinni og lögðu hönd á plóginn á einn eða annan hátt

– – –

Verðlaunahafar Íslensku tónlistarverðlaunanna fyrir árið 2018 eru

Opinn Flokkur / Þjóðlagatónlist / Kvikmynda- og leikhústónlist

Útgáfa ársins – Kvikmynda- og leikhústónlist
Davíð Þór Jónsson – Kona fer í stríð

Plata ársins – Opinn flokkur
Gyða Valtýsdóttir – Evolution

Plata ársins – Þjóðlagatónist
Umbra – Sólhvörf

Lag/tónverk ársins opinn flokkur / Þjóðlagatónlist / Kvikmynda- og leikhústónlist
Arnór Dan, Stone by stone

Plötuumslag ársins
Jónas Sig. – Milda hjartað
Hönnun: Ámundi Sigurðsson
Ljósmyndir: Jónatan Grétarsson

Upptökustjórn ársins:
Ómar Guðjónsson fyrir Milda hjartað – Jónas Sig

Rokk, popp, raftónlist, rapp og hiphopp

Plata ársins – Popp:
GDRN – Hvað ef

Plata ársins – Rokk:
Valdimar – Sitt sýnist hverjum

Plata ársins – Rapp/Hiphopp:
JóiPé & Króli – Afsakið hlé

Plata ársins – Raftónlist:
Auður – Afsakanir

Lag ársins – Popp:
GDRN – Lætur mig

Lag ársins – Rokk:
Benny Crespo’s Gang – Another Little Storm

Lag ársins – Rapp/Hiphopp:
JóiPé & Króli – Í átt að tunglinu

Lagahöfundur ársins
Auðnn Lúthersson (Auður)

Textahöfundur ársins
Svavar Pétur Eysteinsson (Prins Póló)

Söngkona ársins
Guðrún Ýr Eyfjörð Jóhannesdóttir (GDRN)

Söngvari ársins
Valdimar Guðmundsson

Tónlistarviðburður ársins
Aldrei fór ég suður

Tónlistarflytjandi ársins
Hatari

Bjartasta von Rásar 2 og Íslensku tónlistarverðlaunanna
Bríet

Tónlistarmyndband ársins 2018 – Albumm.is og Íslensku Tónlistarverðlaunin
GDRN – Lætur mig ft. Floni & ra:tio
Leikstjóri: Ágúst Elí

Sígild og samtímatónlist

Plata ársins – Sígild og samtímatónlist
Johann Sebastian Bach – Víkingur Heiðar Ólafsson

Tónverk ársins – Sígild og samtímatónlist
Spectra – Anna Þorvalds

Tónlistarflytjandi ársins – einstaklingar : Sígild og samtímatónlist
Víkingur Heiðar Ólafsson

Tónlistarflytjandi ársins – hópar : Sígild og samtímatónlist
Strokkvartettinn Siggi

Söngvari ársins – Sígild og samtímatónlist
Oddur Arnþór Jónsson

Söngkona ársins – Sígild og samtímatónlist
Hallveig Rúnarsdóttir

Tónlistarviðburður ársins – Tónleikar : Sígild og samtímatónlist
Brothers eftir Daníel Bjarnason – Íslenska Óperan, Sinfóníuhljómsveit Íslands ásamt einsöngvurum og kór Íslensku óperunnar

Tónlistarhátíð ársins – hátíðir : Sígild og samtímatónlist
Óperudagar í Reykjavík

Bjartasta Vonin – Sígild og samtímatónlist
Björk Níelsdóttir

Djass og blús

Plata ársins – Djass og blús
Karl Olgeirsson – Mitt bláa hjarta

Tónverk ársins – Djass og blús
Bugða – Agnar Már Magnússon

Lagahöfundur ársins – Djass og blús
Karl Olgeirsson

Tónlistarflytjandi ársins – Einstaklingar : Djass og blús
Kjartan Valdemarsson

Tónlistarflytjandi ársins – Hópar : Djass og blús
Stórsveit Reykjavíkur

Tónlistarviðburðir ársins – Djass og blús
Tónleikaraðir Jazzklúbbsins Múlans

Bjartasta vonin – Djass og blús
Daníel Helgason

 

Heiðursverðlaun Samtóns og Íslensku tónlistarverðlaunanna

Jón Ásgeirsson